Romanos 5

Dios Yaya salvamanqantsikpita kushikunqantsik

1Señornintsik Jesucristuman creyikur perdonashqa karmi Dios Yayawan allina kawaykantsik. 2Jesucristuman creyikushqam Dios Yaya llakipämarnintsik perdonamantsik. Tsaymi gloriaman pushamänapaq kanqanta musyar kushikuntsik.

3Tsaynöllam kushikuntsik imaykata sufrirpis payman creyikunapaq Dios Yaya tantiyatsimanqantsikta musyar. 4Creyikunapaq tantiyatsimashqam Dios Yaya munanqannö kawayta yachakuntsik. Pay munanqannö kawarmi gloriaman qorimänapaq kanqanta musyantsik. 5Qorimänapaq kaqtaqa manam manakaqllapaqtsu shuyaykantsik. Dios Yayam qaramanqantsik Espíritu Santuwan tsayta musyatsimantsik. Espíritu Santum Dios Yaya rasunpa kuyamanqantsikta shonquntsikchö musyatsimantsik.

6Salvakayta mana puëdishqam Dios Yaya destinanqan junaq noqantsik rayku Jesucristo wañurqan. 7Alli ruraq runapa rantin pipis wañuyta mana munaptin talvezchi pillapis paypa rantin wañunman. 8Peru Jesucristum sïqa jutsayuq kaykashqapis noqantsik rayku wañurqan. Tsaynöpam Dios Yaya kuyamanqantsikta musyatsimantsik.

9Jesucristo yawarninta jichanqanpita Dios Yaya perdonaykämarnintsikqa ¿manatsuraq castïgunpita salvamäshun? 10Dios Yayapa contran kaykashqa Tsurin wañunqanpita perdonaykämarnintsikqa ¿manatsuraq kawamunqanpita salvamäshun? 11Manam tsaypis tsayllatsu, sinöqa Señornintsik Jesucristo wañunqanpita perdonashqana karmi Dios Yayata kushishqa alabantsik.

Adánpita wañuy shamuptinpis Jesucristupita salvación shamunqan

12Jutsata y wañuytapis juk runalla kay patsaman apamunqanpitam#Gén. 3.6-19. llapan runakuna jutsata rurar wañuyan.

13Diospa leyninkuna manaraq kaptinpis runakunam jutsata rurayarqan. Jutsata rurarpis jutsayuq kayanqantaqa manam musyayarqantsu. 14Peru Adán kawanqanpitam runakuna wañuyan. Tsaynömi Adánnö jutsata mana ruraykarpis wañuyan.#5.14 Adánqa Dios Yaya ninqanta musyaykarmi jutsata rurarqan (Gén. 2.16-17; 3.11-12). Wakin kaq runakunam Dios Yaya ninqanta mana musyar jutsata rurayan. Tsaymi Adánnö jutsata mana ruranqanta nirqa Dios Yaya ninqanta mana musyar jutsata ruranqanta nin.

Manam Adánnötsu Jesucristuqa kaykan. 15Jutsata Adán ruranqanpitam maytsikaq wañuyan. Jesucristo wañunqanpitam maytsikaq salvakäyan. Tsaynömi salvakäyan Dios Yaya y Jesucristo llakipäkuq kayaptin.

16Adánqa jutsata rurashqa karmi Dios Yaya kachamunqan Jesucristuman iwalantsu. Jutsata Adán ruranqanpitam llapan runa castigashqa kayänanpaq kayan. Jesucristo noqantsik rayku wañunqanpitam Dios Yaya perdonamantsik.

17Jutsata Adán ruranqanpita llapan runakuna wañuyaptinpis Jesucristuman creyikuqkunam sïqa mana ushakaq kawayta tariyanqa. Tsaynömi tariyanqa Dios Yaya llakipäkuq kayninwan dembaldilla perdonaptin.

18Adán mana cäsukuq kanqanpitam llapan runakuna castigashqa kayänanpaq kayarqan. Peru Jesucristo cäsukuq kanqanpitam sïqa llapan runakuna perdonashqa kar salvacionta tariyanqa.

19Tsaymi juk runalla Dios Yayata mana cäsunqanpita llapan runakuna jutsasapa kayan. Tsaynöllam juk runalla Dios Yayata cäsunqanpita atskaq runakunata jutsannaqtana Dios Yaya chaskinqa.

20Dios Yayam leyninkunata musyatsimashkantsik jutsasapa kanqantsikta musyanapaq. Jutsasapa kaykashqapis Dios Yaya llakipäkuq kayninwanmi llapan jutsantsikpita perdonamantsik. 21Runakuna jutsankunapita wañuyaptinpis Dios Yaya llakipämarnintsikmi Señornintsik Jesucristo wañunqanpita perdonamantsik puntanchö imayyaqpis kawanapaq.

Currently Selected:

Romanos 5: qxn

Highlight

Compare

Copy