Romanos 4

Dios Yayaman Abraham creyikunqan

1Unay castantsik Abrahamta Dios Yaya imanö perdonanqanta yarpäshun. 2Allikunata ruranqanpita Dios Yaya perdonaptinqa Abraham aläbakunmanmi karqan. Peru manam allikunata ruranqanpitatsu perdonarqan, sinöqa pay ninqanta creyinqanpitam. 3Dios Yayapa palabranmi nin: <<Dios Yaya ninqanta Abraham creyiptinmi jutsannaqtana chaskirqan>>.#Gén. 15.6; Gál. 3.6.

4Musyanqantsiknömi arupukuq runaqa arunqanpita pägunta chaskin. Mana aruykar imatapis chaskirqa qarayllatam chaskin. 5Tsaynöllam jutsantsikpita Dios Yaya dembaldilla perdonamantsik. Manam allikunata ruranqantsikpitatsu perdonamantsik, sinöqa payman creyikunqantsikpitam.

6Dios Yaya dembaldilla perdonanqan runa kushishqa kawakunqantam rey Davidpis qellqarqan: 7<<Kushishqam kawakun Dios Yaya perdonanqan runa. Paypa jutsankunataqa Dios Yaya manam yarpannatsu. 8Kushishqam kawakun jutsannaqtana Dios Yaya chaskinqan runa>>.#Sal. 32.1-2.

Abrahamta manaraq señalakuptin Dios Yaya perdonanqan

9¿Señalakushqa Israel runakunallatsuraq perdonashqa kayan? ¿Manatsuraq señalakunni mana Israel runakunapis perdonashqa kaykäyan? Abrahamta Dios Yaya perdonaptin imanö kanqanta yarpäshun. Niyanqaqnömi Abraham creyiptin Dios Yaya jutsannaqtana chaskirqan. 10¿Señalakuskiptinraqtsuraq Abrahamta perdonarqan? Manam. Paytaqa manaraq señalakuptinmi perdonarqan.

11Abrahamta perdonaskirraqmi señalakunanpaq Dios Yaya nirqan.#Gén. 17.10. Tsaynömi señalakurqan Dios Yayaman creyikunqanpita perdonanqanta mana qonqananpaq. Tsaymi señalakunni kaqkunapis Abrahamnö creyikur paypa castan kayan. Tsaynöpam Dios Yaya paykunatapis perdonan.

12Tsaynöllam señalakushqa kaqkunapis Abrahamnö creyikur Abrahampa castan kayan. Abrahampa castan kayan manam señalakuyanqanpitatsu, sinöqa Abrahamnö manaraq señalakur creyikuyanqanpitam.

Abrahamnö creyikushqa salvamänapaq ninqan

13Manam leykunata cumpliyanqanpitatsu Abrahamta y paypita miraqkunata kay patsata entregananpaq#Gén. 17.4-6; 22.17-18. Dios Yaya prometirqan, sinöqa Dios Yayaman creyikuyanqanpitam. 14Leykunata cumpliqkunalla Dios Yaya prometinqanta chaskiyänan kaptinqa manakaqllapaqmi Dios Yayaman creyikuypis kanman karqan. Dios Yaya prometinqanpis manam välinmantsu karqan.#Gál. 3.18.

15Leyninkunata mana cumpliq kaqkunatam Dios Yaya castigan. Peru tsay leykunata musyaykarpis manam cumplintsiktsu. 16Tsaymi leyninkunata cumplinqantsikpitatsu Dios Yaya änimanqantsik salvacionta chaskintsik, sinöqa payman creyikunqantsikpitam. Tsaynöpam Israel y mana Israel runakunapis Abrahamnö creyikushqa Dios Yaya llakipämarnintsik salvamantsik. Abraham creyikunqannö Dios Yayaman creyikurmi Abrahampa castan kantsik.#Gál. 3.7.

17Dios Yayapa palabranmi Abrahampaq nin: <<Atska nación runakunapa taytan kanaykipaqmi churashkaq>>.#Gén. 17.5.

Dios Yaya tsaynö nirqan payman Abraham creyikushqa kaptinmi. Dios Yayam wañushqakunata kawatsimun y imapis mana kaqpita kaman.

Dios Yaya prometinqanta Abraham creyinqan

18Abrahamta prometirmi Dios Yaya nirqan: <<Atska nación runakunapa taytan kaptikim qampita miraqkuna yupaytapis mana puëdiypaq kayanqa>>.

Tsay prometinqanta Dios Yaya imanö cumplinanpaq kanqanta mana tantiyarpis Abrahamqa creyirqanmi.#Gén. 15.5. 19Tsay prometinqan witsaymi pachak (100) watayuqna Abraham karqan. Wamrayuq kananpaqpis awkinnam karqan. Warmin Sarapa costumbrin bäjaypis pärashqanam karqan. Tsaynö kaptinpis Abrahamqa Dios Yayamanmi creyirqan. 20Payqa prometinqanta manam düdarqantsu, sinöqa agradëcikurmi llapan shonqunwan confiakurqan. 21Prometinqanta Dios Yaya cumplinanpaq poderyuq kanqantam creyirqan. 22Tsaynö confiakunqanpitam Dios Yaya jutsannaqtana chaskirqan.

23Peru qellqashqachö ninqannömi Abrahamllatatsu Dios Yaya perdonarqan, 24sinöqa noqantsiktapis perdonamantsik Señornintsik Jesucristuta kawatsimuq Dios Yayaman creyikushqam. 25Jutsantsik raykum Jesucristo wañunanpaq Dios Yaya permïtirqan.#Isa. 53.4-5. Perdonamänapaqmi Dios Yaya kawatsimurqan.

Currently Selected:

Romanos 4: qxn

Highlight

Compare

Copy