Romanos 12
12
Dios Yayata servinapaq churamanqantsik
1Wawqikuna y panikuna, qamkunatam rugayaq Dios Yayapa poderninman kawaynikikunata churayänaykipaq. Pay llakipaykäyäshuptikiqa kawaykaq santu sacrificiu kaykuyällay. Tsaynö karmi Dios Yaya munanqannö rasunpa serviyanki. 2Wakin runakuna jutsata rurayaptinpis qamkunaqa jutsata ama rurayaytsu. Yarpaynikikunapis puntata kanqannöqa ama katsuntsu, sinöqa Dios Yaya munanqannöna katsun. Tsaynö kawarmi pay munanqannö kaway kushikuypaq kanqanta tantiyayanki.
3Dios Yayam llakipämar willakuqnin kanäpaq churamashqa. Tsaymi llapaykita niyaq: Wakin kaqpita mas yachayyuq kayanqaykita ama yarpäyaytsu. Payman creyikunapaq Dios Yaya yanapaykämashqaqa llapantsikpis välinqantsikta tantiyakushun. 4Cuerpuntsikchö atska partintsikkuna karpis juk cuerpullachömi kaykan. Tsaynö karpis manam tsay rurayllatatsu rurayan. 5Tsaynöllam Jesucristuman creyikuqkuna atskaq karpis juk cuerpunölla kantsik.#1Cor. 12.12.
6Tsaynö kashqam Dios Yaya cada ünuta churamantsik pay munanqannö servinapaq. Profëta kanapaq churamashqa payman confiakur willakuyninta willakushun. 7Yanapakunapaq churamashqa yanapakushun. Yachatsikunapaq churamashqa yachatsikushun. 8Animatsinapaq churamashqa animatsikushun. Imatapis qaranapaq churamashqa alli shonquntsikwan qarashun. Mandakunapaq churamashqa alli yarpaynintsikwan mandakushun. Llakipäkuq kanapaq churamashqa pitapis kushishqa yanapashun.#1Cor. 12.4-11.
Imanö kawakunapaq yätsinqan
9Janan shonqulla kuyanakuyanqaykipa rantin llapan shonquykikunawan kuyanakuyay.
Mana alli ruraykunapaq ama ichikllapis yarpäyaytsu. Tsaypa rantin allita rurar kawakuyay.
10Aylluykikunawan kuyanakuyanqaykinö kuyanakuyay. Tsaynölla juknin jukninwan respitanakuyay. Kikillaykikuna alli kawayänaykipaq yarpachakuyanqaykipa rantin wakin kaqkunapis alli kawayänanpaq yarpachakuyay.
11Ama qela kayaytsu, masbien kushi kushilla Dios Yayata serviyay.
12Dios Yayata shuyäkur kushishqa kawakuyay.
Imaykata ñakarpis payman confiakuyay.
Imaypis payta mañakuyay.
13Jesucristuman creyikuq majiki faltapukuptin imaykallawanpis yanapayay. Pipis wajikikunaman chäyämuptin patsatsiyay.#Heb. 13.2; 1Ped. 4.9.
14Chikishuqnikipa contran ama parlayaytsu. Masbien Dios Yaya yanapananpaq mañakuyay.#Mat. 5.44; Luc. 6.28.
15Kushishqa kaqkunawan kushikuyay. Waqaq kaqkunawan waqayay.
16Juknin jukninwanpis alli kawakuyay. Allish tukuq kayanqaykipa rantin qollmi shonqu kaqkunawanpis kuyanakur kawakuyay. Ama yachayyuq tukuyaytsu.#Prov. 3.7.
17Chikiyäshuptikipis ama chikiyaytsu. Masbien pïmay rikänanpaq allita rurar kawakuyay. 18Imaykanöpapis llapan runakunawan shumaq kawakuyay.
19Kuyashqa wawqikuna y panikuna, chikiyäshuqnikikunapa contran ama venganzata ashiyaytsu. Masbien Dios Yaya juzgananpaq paypa poderninman churayay. Dios Yayapa palabranmi nin: <<Mana allikunata rurayanqanpitam kikï juzgashaq>>.#Deut. 32.35.
20Mastam nin:
<<Chikishuqniki mallaqaptin mikuynin qaraykuy.
Yakunaptinpis yakun makyaykuy.
Tsaynö ruranqaykipitam alläpa penqakunqa>>.#Prov. 25.21-22.
21Runakuna llutanta rurayaptinpis qamkunaqa allillata rurayay.
Currently Selected:
Romanos 12: qxn
Highlight
Share
Compare
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
