Salmo 84
84
Salmo 84 (83)
Dios Yayapa templunchö kayta munanqan
1 (1) Cantaqkunapa mandakuqninpaqmi. Üvata jarur cantayanqayki tönuwan kay salmuta cantayanki. David Corépita miraqkuna qellqayanqan salmu.
1 1 (2) Llapanta mandaq Dios Yaya, alläpa kuyakuypaqmi täkunqayki templu.
2 2 (3) Templupa patiunchö kaytam alläpa munä.
Llapan shonqüwanmi imayyaqpis kawaq Diosta kushishqa alabä.
3 3 (4) Altarnikikuna cercanchömi pichuychanka y wayanïtupis qeshunkunata rurayan.
Tsaychömi wawankunatapis wiñatsiyan.
Qammi kanki llapanta mandaq Dios Yaya, mandamaq rey y Diosnillä.
4 4 (5) Wajikichö täkuqkunam alläpa kushikuyan.
Paykunam imaypis alabayäshunki. Selah
5 5 (6) Kushishqam kaykan yanapanqayki runa.
Paymi llapan shonqunwan templuykiman aywayta munan.
6 6 (7) Waqay Raqrapa päsaptinpis tamya tiempuchönömi tsakishqa pukyupita yaku pashtamunqa.#84.6 Waqay Raqrapa päsaptinpis ninqanqa ima desgracia päsaptinpis ninanmi. Tamya tiempuchönömi tsakishqa pukyupita yaku pashtamunqa nirqa bendición kananpaq kanqantam nin.
7 7 (8) Ima päsaptinpis kallpan manam ushakanqatsu.
Siónman chaykurmi poderösu Dios Yayapa puntanman yaykuyanqa.
8 8 (9) Llapanta mandaq Dios Yaya, mañakamunqaqta wiyaykallämay.
Jacob confiakunqan Dios Yaya, rugakamunqaqta chaskiykallämay. Selah
9 9 (10) Dios Yaya, akranqayki reyta yanapaykullay.
Paymi tsapäkunä escüdunö.
10 10 (11) Waranqa (1,000) junaq juklächö qoyäyanqäpa rantin mas allim kanman juk junaqllapis wajikichö qoyäyaptï.
Jutsasapakunapa wajinchö qoyäyanqäpa rantin mas allim kanman wajikipa punkullanchöpis täkuptï.
11 11 (12) Dios Yayam kawayta qaramantsik y imayka escüdunö tsapämantsik.
Paymi kuyamantsik y alliman churamantsik.
Munanqannö kawakuqkunatam alli kaqkunata alistapan.
12 12 (13) Llapanta mandaq Dios Yaya, qamman confiakamuq runam kushishqa kawakun.
Currently Selected:
Salmo 84: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
