Salmo 55
55
Salmo 55 (54)
Qatikachaptin Dios Yayata mañakunqan
1 (1) Cantaqkunapa mandakuqninpaqmi. Cuerdayuq instrumentuta töcar kay salmuta cantayanki. David qellqanqan.
1 1 (2) Dios Yaya, mañakamunqaqta chaskiykallämay.
Rugakamunqaqta wiyaykallämay.
2 2 (3) Qayakamuptï wiyaykallämay.
Löcuyaypaqraqmi llakikuy tsariman.
3 3 (4) Conträkuna jurapäyämaptinmi alläpa mantsakü.
Jutsa ruraqkuna sufritsiyämaptinmi llakikü.
Imayka problëmamanmi jitarpayäman.
Alläpa rabyarmi conträ shäriyan.
4 4 (5) Wañuypam mantsakay achkuman.
Shonqüpis puruq puruqyanraqmi.
5 5 (6) Mantsakaywanmi tsuktsukyäraq.
Alläpa mantsakaymi achkumashqa.
6 6 (7) Tsaymi yarpachakur nï:
<<¡Palumapanö riprä kanman!
Tsayqa karupa pärir aywaskirchi tranquïlu kawaküman.
7 7 (8) Pärirchi karupa aywaküman.
Tranquïlum tsunyachö täküman. Selah
8 8 (9) Cörrillam qeshpir aywaküman.
Apäkuy wayrapita y apäkuy tamyapita tsinkaqnömi tsinkaräman>>.
9 9 (10) Conträkunam kikinkunapura piñakur pelyaqta rikä.
Dios Yaya, paykunata ushakaykatsillay.
Willanakurpis amana tantiyanakuyätsunnatsu.
10 10 (11) Paykunam paqasta junaqta markachö puriyan.
Llapanmi jutsa rurayllachö kawayan.
11 11 (12) Cällikunachöpis wañutsinakur y llullakurmi kayan.
12 12 (13) Conträ parlayaptin manam cäsümantsu.
Chikimaqnï qatikachämaptin qeshpirmi aywaküman.
13 13 (14) Peru confiakunqä y kuyay amïgü kaykar conträ shäriptinmi sïqa alläpa llakikü.
14 14 (15) Paywanmi paqta Dios Yayapa wajinmanpis aywarqä.
Paqtam kushi kushi parlar puriyarqä.
15 15 (16) Chikimaqnïkunapa supayninkuna illaqpita apatsun.
Paykunataqa kawaykaqllata pampayätsun.
Jutsa rurayllapaqmi shonqunkunachöpis yarparäyan.
16 16 (17) Peru noqam sïqa Dios Yayata mañakushaq.
Paymi conträkunapa makinpita salvamanqa.
17 17 (18) Alliqpa, tardipa y paqaspapis Dios Yayatam waqapäshaq.
Paymi waqapanqäta wiyamanqa.
18 18 (19) Conträ shäriyaptinmi tsapämanqa.
Maytsikaq chikimaqkuna kayaptinpis paymi salvamanqa.
19 19 (20) Conträkunaqa jutsa rurayta manam dëjayantsu.
Dios Yayapitapis manam mantsakuyantsu.
Tsaynö kaykäyaptinmi mañakunqäta wiyamar Dios Yaya penqakuyman churanqa.
Dios Yayam imayyaqpis rey. Selah
20 20 (21) Conträ shäriqkunam amïgunkunatapis maqayan.
Kuyanakur kawayänanpaq äniskirpis manam cumpliyantsu.
21 21 (22) Alli shimillankunapam parlapäyan, peru shonqunkunachöqa amïgunpa contranmi shäriyan.
Mishki mishkilla parlanqanmi alli afilashqa cutsillunöraq.
22 22 (23) Llapan llakikuynikikunata Dios Yayapa poderninman churaykuyay.#Mat. 6.25-34; 1Ped. 5.7.
Paymi imaykachö yanapayäshunki.
Cäsuqkunatam ni imaypis dëjanqatsu.
23 23 (24) Dios Yaya, wañutsikuqkuna y llullakuqkuna pöcu tiempulla kawayätsun.
Jövinllaraq kaykar wañuyätsun.
Noqam qamllaman imaypis confiakamü.
Currently Selected:
Salmo 55: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
