Salmo 119
119
Salmo 119 (118)
Palabranpita Dios Yayata alabanqan#119.0 Hebreo idiömachömi kay salmupa cada pusaq linean paqta kaykan. Tsay pusaq lineakunachömi cada linea hebreo abecedariuchö kaykaq juk letrawan qallarin. Tsay lineakuna mayqan letrawan qallanqanta musyanaykipaqmi cada pusaq linea qallarinanchö letrapa shutin qellqashqa kaykan. Tsaynömi kay salmuchö Dios Yayapa palabran imanö kanqanta ninanpaq pusaq palabrakuna kayan. Tsay palabrakunam kayan ley, palabra, mandakunqan, estatütu, ninqan, mandamientu, yachatsikuy y äninqan.
Álef
1Kushishqam kawakuyan Dios Yaya munanqannö kawakuq runakuna.
Paykunam Dios Yayapa leyninkunata cumpliyan.
2Kushishqam kawakuyan Dios Yaya mandanqankunata cumpliqkuna.
Paykunam llapan shonqunkunawan payta ashiyan.
3Manam ni imaypis mana allikunata rurayantsu.
Masbienmi Dios Yayata cäsur imaypis allillata rurayan.#Sal. 1.1-2.
4Dios Yaya, yachatsikuynikitam qellqatsishkanki mana qonqar cumpliyänäpaq.
5¡Alläpa allim kanman estatütuykikuna ninqanta cumpliptï!
6Mandamientuykikunata cumplirqa manam ni imapita penqakushaqtsu.
7Mandakunqaykikunata yachakurmi llapan shonqüwan alabashayki.
8Estatütuykikunatam imaykanöpapis cumplishaq.
¡Ama dëjaykallämaytsu!
Bet
9¿Imanöraq jutsa rurayta jöven dëjanman?
Palabraykita cäsurmi jutsa rurayta dëjanqa.
10Llapan shonqüwanmi qamta ashiq.
Mandamientuykikunata imaypis cäsunäpaq yanapaykallämay.
11Qampa contrayki jutsata mana ruranäpaqmi palabraykita shonqüchö imaypis yarparaykä.
12 Dios Yaya, pïmaypis alabaykulläshuy.
Estatütuykikunata yachaykatsillämay.
13Llapan mandakunqaykitam willakuykä.
14Mandakunqaykikuna ninqannö kawakurmi imayka riquëzata tarir kushikunqäpitapis mas kushikü.
15Yachatsikuyniki ninqannö kawakunäpaqmi yarpachakü.
Munanqaykinö kawakunäpaqmi imaypis yarparä.
16Estatütuykikunata cumplirmi kushikü.
Palabraykitaqa manam imaypis qonqäshaqtsu.
Guímel
17Serviqniki karmi rugakullaq alli kawakunäpaq.
Palabraykitam imaypis cäsushaq.
18Ñawïta kichaqnö shumaq tantiyaykatsillämay.
Tsaynöpam leynikichö mantsakaypaq kaqkunata tantiyashaq.
19Kay patsachöqa qorpallam kä.#Sal. 39.12; 1Ped. 2.11.
Mandamientuykikunata mana qonqanäpaq yanapaykallämay.
20Llapan shonqüwanmi imay hörapis mandakunqaykikunata cumpliyta munä.
21Orgullösukunatam imaypis castiganki.
Mandamientuykikunata mana cäsuyanqanpitam maldicionashqa kayan.
22Runakuna chikiyämar manakaqman mana churayämänanpaq tsapaykayällämay.
Noqaqa mandakunqaykikunatam cäsü.
23Poderyuq runakunam conträ shäriyänanpaq willanakuyan.
Tsaynö kayaptinpis serviqniki karmi estatütuykikunata cumplinäpaq imaypis yarparäshaq.
24Mandakunqaykikunata cumplirmi kushikü.
Alli kawakunäpaqmi tsaykuna tantiyatsiman.
Dálet
25Wañunaykaqnönam kä.
Änimanqaykinö alli kawayta qaraykallämay.
26Yarpachakunqäta willaptiqmi wiyamar yanapamashkanki.
Estatütuykikunata yachaykatsillämay.
27Yachatsikuynikikunata tantiyaykatsillämay.
Mantsakaypaq ruranqaykikunatam imaypis yarparäshaq.
28Llakikuywanmi jankatna aywapakaskï.
Palabraykiwan animaykatsillämay.
29Jutsa rurayllachö mana kanäpaq yanapaykallämay.
Llakipämar leynikikunata tantiyaykatsillämay.
30Munanqaykinö kawakuytam munä.
Ninqaykikunata cäsurmi kawakushaq.
31 Dios Yaya, mandakunqaykikunatam waran waran cäsü.
Penqakuyman ama churaykallämaytsu.
32Allikunallata yarpätsimaptikim shonqü alläpa kushikun.
Tsaymi imaypis mandamientuykikunata cäsushaq.
He
33 Dios Yaya, estatütuykikunata yachaykatsillämay.
Yachatsimaptikim wañunqäyaq cumplishaq.
34Leynikikunata cäsunäpaq tantiyaykatsillämay.
Tsaynöpam llapan shonqüwan cumplishaq.
35Mandamientuykikunata cumplinäpaq yanapaykallämay.
Cumplirmi kushishqa kawakushaq.
36Mandakunqaykikunata ruranäpaq imaypis yarpaykatsillämay.
Ama permïtiykuytsu pitapis suwapur rïcuyänäta.
37Ama permïtiykullaytsu mana allikunata rikapänäpaq.
Ninqaykinö alli kawakunäpaq yanapaykallämay.
38Serviqnikikunata äninqaykita cumpliykullay.
Qampita mantsakuq runa kaykaptïqa yanapaykallämay.
39Ninqaykikunam alläpa alli.
Cäsunqaqpita asipäyämaptin yanapaykallämay.
40Yachatsikuynikitam llapan shonqüwan kuyä.
Munanqaykinö kawakunäpaq yanapaykallämay.
Vav
41 Dios Yayallä, kuyakuq kaynikiwan yanapaykallämay.
Änimanqaykinölla salvaykallämay.
42Yanapamanqaykita rikarmi musyapämaq runakuna upälla kayanqa.
Palabraykimanmi imaypis confiakü.
43Palabraykita imaypis willakunäpaq yanapaykallämay.
Ninqaykimanmi confiakü.
44Leynikikunata cäsurmi imaypis kawakushaq.
45Yachatsikuynikikunata cumplirmi imaypis tranquïlu kawakushaq.
46Mandakunqaykikunatam reykunatapis yachatsishaq.
Yachatsikur manam ni pipitapis penqakushaqtsu.
47Mandamientuykikunatam kuyä.
Tsaykunata cumplirmi shonqü kushikun.
48Mandamientuykikunata kuyarmi kushishqa chaskï.
Estatütuykikunata cumplinäpaqmi imaypis yarparä.
Zayin
49Serviqniki kaptï änimanqaykita yarpaykullay.
Qammanmi confiakamü.
50Änimanqaykikunam imaypis animatsiman.
Tsaymi llakishqa kaptïpis consulaman.
51Orgullösu runakunam alläpa ofendiyäman.
Ofendiyämaptinpis leynikikunata manam ni imay dëjashaqtsu.
52 Dios Yayallä, yarparaykämi unay castäkunata ninqaykikunata.
Tsaykunata yarparkurmi imaypis kushikü.
53Mana alli ruraq runakunam alläpa rabyatsiyäman.
Leynikikunata manam cäsuyantsu.
54Juklä karu markachö karpis estatütuykikuna alli kanqanpitam cantukunatapis cantä.
55 Dios Yayallä, paqaskunapis qampaqmi yarparä.
Imaykanömi leynikikuna ninqanta cäsushaq.
56Imaypis yachatsikuynikikunatam cäsushaq.
Jet
57 Dios Yaya, qamllam herenciä kanki.
Prometiqmi palabraykita imaypis cäsunäpaq.
58Llapan shonqüwanmi mañakullaq.
Äninqaykita cumplir yanapaykallämay.
59Imanö kawanqätam yarpachakushkä.
Tantiyakushkämi mandakunqaykikuna ninqannö kawakunäpaq.
60Imaykanöpapis mandamientuykikunatam cumpliyta munä.
61Mana alli runakuna tukuynöpa ofendiyämaptinpis leynikikunatam mana qonqar cäsü.
62Pullan paqas shärikuskirmi ninqaykikunata yarparkur agradëcikuq.
63Llapan qampita mantsakuqkunapa amïgunmi kä.
Paykunam munanqaykinö kawayan.
64 Dios Yaya, kay patsachö kuyakuynikita maytsaychömi rikä.
Estatütuykikunata yachaykatsillämay.#Sal. 33.5.
Tet
65 Dios Yaya, palabraykichö änimanqaykinöllam serviqniki kaptï alli rikaykämanki.
66Yachayyuq y alli yarpayyuq kanäpaq yanapaykallämay.
Mandamientuykikunamanmi confiakü.
67Unaymi jutsa rurayllachö kawar alläpa ñakarqä.
Peru kananmi sïqa palabraykita cäsur shumaq kawakü.
68Qammi llakipäkuq y alli ruraq kanki.
Estatütuykikunata shumaq yachaykatsillämay.
69Orgullösukuna manakaqta parlayämaptinpis llapan shonqüwanmi yachatsikuynikita cäsü.
70Mana alli ruraq runakunam llutanta yarpäyan.
Peru leynikikunata cumplirmi kushikü.
71Allipaqmi imaykatapis sufrishkä.
Tsaynöpam estatütuykikunata cäsunäpaq tantiyakushkä.
72Noqapaqqa waranqa waranqa qellaypita y qoripitapis leynikikunam mas välin.
Yod
73Kikikim makikiwan ruramar kamamashkanki.
Mandamientuykikunata tantiyanäpaq tantiyaykatsillämay.
74Palabraykiman confiakuptïmi qampita mantsakuqkuna noqawan tinkuskir kushikuyan.
75 Dios Yaya, musyämi ninqaykikuna alli kanqanta.
Mana allikunata ruraptï allipaqmi corrigimanki.
76Llakikuptï llakipämar kushikaykatsillämay.
Änimanqaykinölla yanapaykallämay.
77Llakipäkuq kaynikiwan alli kawayta qaraykallämay.
Leynikikunata cumplirmi kushikü.
78Orgullösu runakuna penqakuychö kaykuyällätsun.
Paykunam manakaqkunata parlayäman.
Peru noqaqa yachatsikuynikitam yarparaykä.
79Qampita mantsakuqkunawan mandakunqaykikunata yachaqkuna noqawan qorikäyätsun.
80Llapan shonqüwan estatütuykikunata cäsunäpaq yanapaykallämay.
Cäsukurqa manam imapitapis penqakushaqtsu.
Caf
81Salvamänaykipaq shuyaraykarmi vïdätapis cäsi oqrarqü.
Imanö karpis palabraykimanmi imaypis confiakü.
82Änimanqaykita shuyaraptïmi ñawïpis tsakaskinna.
Tsaymi llakikur rugakullaq: <<¡Imayraq shamunqa animatsimänanpaq!>>
83Qoshniwan yanayashqa puyñunö#119.83 Wakin runakunaqa uyllunö niyan. alläpa awkinnam kä.
Tsaynö karpis estatütuykikunataqa manam qonqätsu.
84¡Imayyaqraq tsaynö ñakar kawashaq!
¡Imayraq conträkunata castiganki!
85Leynikikunata mana cäsuqkunawan orgullösukunam imayka trampamannö ishkitsiyta munayäman.
86Llapan mandamientuykikunam rasun kaqlla.
Pitapis mana ofendiykaptïmi chikimaqnïkuna qatikachäyäman.
Dios Yaya, yanapaykallämay.
87Ichikllapam wañutsiyämashqatsu.
Tsaynö kaykarpis mana dëjarmi yachatsikuynikita cäsü.
88Llakipäkuq kaynikiwan wañuypita salvaykallämay.
Mandakunqaykikunatam imaypis cumplishaq.
Lámed
89 Dios Yaya, palabraykim imaypis mana ushakaq.#Isa. 40.8.
Ciëluchöpis mana ushakaqmi kaykan.
90Änimanqaykitam imaypis cumplinki.
Kay patsatapis mana kuyuqtam kamashkanki.
91Mandaptikim kay patsa kananyaqpis kaykan.
Llapan kamanqaykim podernikichö.
92Leynikikunata cäsurmi kushikü.
Mana cäsukurqa llakikuyllawanmi wañushqana käman karqan.
93Manam ni imaypis yachatsikuynikita dëjashaqtsu.
Tsaykunata cäsurmi alli kawaykä.
94Wamrayki kaykaptïqa salvaykallämay.
Yachatsikuynikitam imaypis cumplï.
95Mana alli runakunam wañutsiyämänanpaq shuyaraykäyäman.
Tsaynö kaptinpis mandakunqaykikunatam cäsü.
96Llapan imaykapis ushakaqlla kanqantam rikashkä.
Peru mandamientuykikunam sïqa ni imaypis ushakantsu.
Mem
97Llapan shonqüwanmi leynikikunata alläpa kuyä.
Tsaykunapaqmi imay hörapis yarparaykä.
98Mandamientuykikunatam imaypis yarparä.
Tsaymi chikimaqnïkunapitapis mas yachayyuq kä.
99Mandakunqaykikunata yarpararmi yachatsimaqnïkunapitapis mas yachayyuq kä.
100Yachatsikuynikikunata cäsurmi yachayyuq awkinkunapitapis mas yachä.
101Palabraykita cäsurmi jutsa ruraykunapita witikushkä.
102Ninqaykikunatam mana qonqar cumpliykä.
Cumplinäpaqmi kikiki yachatsimashkanki.
103Palabraykim alläpa mishkin.#Sal. 19.10.
Abëjapa mishkinpitapis masmi mishkin.
104Yachatsikuynikita yachakurmi mas alli yachayyuq tikrä.
Tsaymi imayka mana alli ruraykunapita witikushkä.
Nun
105Palabraykiqa aktsinömi.
Maypa aywaptïpis aktsipämaqnömi.#Prov. 6.23.
106Jurarmi änishkaq ninqaykikunata cäsunäpaq.
Äninqaqtam imaypis cumplishaq.
107 Dios Yayallä, imaykawanmi alläpa ñakaykä.
Palabraykichö ninqaykinölla alli kawakunäpaq yanapaykallämay.
108 Dios Yayallä, alabanqaqta chaskiykallämay.
Ninqaykikunata tantiyaykatsillämay.
109Conträkunam imaypis wañutsiyämayta munayan.
Tsaynö kaptinpis leynikikunataqa manam ni imay qonqätsu.
110Mana cäsushuqniki runakunam trampata churapaykäman.
Tsaynö kaptinpis yachatsikuynikitaqa manam ni imaypis dëjashaqtsu.
111Mandakunqaykikunatam herenciatanö chaskishkä.
Tsaymi shonqü alläpa kushikun.
112Estatütuykikunatam llapan shonqüwan cumpliyta munä.
Wañunqäyaqmi imaypis cäsushaq.
Sámej
113Allish tukuqkunatam alläpa chikï.
Peru leynikikunatam sïqa alläpa kuyä.
114Qammi tsinkakunä y tsapämaqnï escüdü kanki.
Änimanqaykimanmi imaypis confiakü.
115Mana alli runakuna, puntäpita witiyay.
Noqaqa Diosnïpa mandamientunkunatam cumplishaq.
116Alli kawakunäpaq änimanqaykinö yanapaykallämay.
Manakaqllapaqqa ama confiakushaqtsu.
117Yanapamaptikim chikimaqnïkunapita salvakushaq.
Estatütuykikunatam imaypis cumplishaq.
118Estatütuykikunata mana cäsuqkunatam rikaytapis munankitsu.
Mana allikunata rurayänanllapaqmi paykunaqa yarparäyan.
119Mana alli runakunatam taqratanö chikinki.
Noqaqa mandakunqaykikunatam kuyallä.
120Qampita alläpa mantsakurmi tsuktsukyäraq.
Tsaymi ninqaykikunata cäsukü.
Ayin
121Ninqaykikunatam imaypis cumplï.
Sufritsimaqkunapa poderninpita jipiykallämay.
122Alli kawakunäpaq yanapaykallämay.
Orgullösu runakuna mana sufritsiyämänanpaq tsapaykallämay.
123Salvamänaykipaq shuyaraykaptiqmi ñawïpis tsakaskinna.
Änimanqaykita cumplinaykipaqmi shuyaraykä.
124Alläpa kuyakuq kaynikiwan yanapaykallämay.
Serviqniki karmi rugakullaq estatütuykikunata yachatsimänaykipaq.
125Qamta serviqnikim kallä.
Mandakunqaykikunata tantiyanäpaq yachayta qaraykallämay.
126 Dios Yaya, runakunam leynikikunata cäsuyantsu.
Tsay runakunataqa sas castigaykullay.
127Fïnu qorita kuyayanqanpitapis masmi mandamientuykikunata kuyä.
128Tsaymi llapan yachatsikuynikita cäsü.
Mana allikunata manam rurätsu.
Pe
129Alläpa kushikuypaqmi mandakunqaykikuna.
Tsaymi imaykanöpis cäsü.
130Palabraykita yachatsikuyaptinmi runakunapa shonqunkuna atsikyan.
Qollmi shonquyuqkunam sas tantiyakuyan.
131Llapan shonqüwanmi mandamientuykikunata yachakuyta munä.
132Kuyashuqnikikunata imaypis llakipanqaykinölla noqatapis llakipämar yanapaykallämay.
133Änimanqaykita cumplir alli kawakunäpaq yanapaykallämay.
Jutsa ruray ama venciykallämätsuntsu.
134Runakuna sufritsiyämaptin libraykallämay.
Imaykanöpis yachatsikuynikikunatam cäsuyta munä.
135Kuyakuq kaynikiwan rikaykallämay.
Estatütuykikunatapis yachaykatsillämay.
136Leynikikunata mana cäsuyaptinmi alläpa llakikur waqä.
Tsade
137 Dios Yaya, rasun kaqllatam qamqa juzganki.
Ninqaykikunapis allim.
138Mandakunqaykikuna allilla karmi rasunpa confiakuypaq.
139Chikimaqnïkuna palabraykita mana cäsuyaptinmi alläpa rabyakü.
140Yapay yapaymi prometinqaykikunata cumplishkanki.
Tsaymi prometinqaykikunata kuyä.
141Manakaqman churayämaptinpis yachatsikuynikitaqa manam ni imay qonqashaqtsu.
142Qamqa rasun kaqllatam juzganki.
Leynikikunapis rasun kaqllam.
143Alläpa llakikur ni imanakayta mana puëdiptïpis mandamientuykikunam kushikatsiman.
144Mandakunqaykikunam imaypis alli.
Alli kawakunäpaq shumaq tantiyaykatsillämay.
Qof
145 Dios Yaya, llapan shonqüwanmi rugakurniki mañakuq.
Estatütuykikunata cäsunäpaq yanapaykallämay.
146Rugakurmi mañakullaq salvaykamänaykipaq.
Mandakunqaykikunatam imaykanöpis cumplishaq.
147Tsaka tsakallana shärikuskirmi yanapamänaykipaq mañakamü.
Palabraykimanmi confiakü.
148Änimanqaykita yarpararmi kushishqa rikchaykar warä.
149 Dios Yaya, kuyakuq kaynikiwan wiyaykallämay.
Imaypis allillata ruraq kanqaykinö alli kawayta qaraykallämay.
150Chikimaqnïkunam janächöna kayan.
Paykunaqa leynikikunata manam cäsuyantsu.
151 Dios Yaya, qammi imaypis lädüchö kaykanki.
Rasunpa kaqmi llapan mandamientuykikuna.
152Unaypitanam mandakunqaykikunata musyä.
Mandakunqaykikunaqa imayyaqpis kaykanqam.
Resh
153Imayka ñakaypita salvaykallämay.
Leynikikunatam ni imaypis qonqätsu.
154Janä shärir salvaykallämay.
Prometinqaykita cumplir alli kawakunapaq yanapaykallämay.
155Estatütuykikunata mana cäsuyaptinmi jutsa ruraqkunata yanapankitsu.
156 Dios Yaya, alläpa llakipäkuqmi kanki.
Munanqaykinö kawakunäpaq yanapaykallämay.
157Chikimaqnï conträkunam atskaq kayan.
Peru noqaqa mandakunqaykikunatam imaypis cäsü.
158Conträkunata rikaptïmi shonqüpis alläpa rabyan.
Paykunam palabraykita cäsuyantsu.
159 Dios Yaya, yachatsikuynikitam alläpa kuyä.
Kuyakuq kaynikiwan alli kawakunäpaq yanapaykallämay.
160Palabraykiqa llapanpis rasun kaqllam.
Ninqaykikunam imaypis kanqa.
Sin/Shin
161Imankunatapis mana imanaykaptïmi poderyuq runakuna conträ shäriyan.
Peru tsaynö kaptinpis palabraykitam cäsü.
162Änimanqaykikunata musyarmi alläpa kushikü.
Alläpa chaniyuq tesöruta tariqnömi kushikü.
163Llullakuyta manam imaypis munätsu.
Leynikikunatam alläpa kuyä.
164Ninqaykikuna allillata ruranäpaq tantiyatsimaptinmi imay hörapis alabaq.
165Leynikikunata kuyaqkunam kushishqa kawakuyan.
Tsaymi paykunataqa pipis jutsaman ishkitsintsu.
166 Dios Yaya, salvamänaykipaqmi shuyaraykä.
Tsaymi mandamientuykikunata cäsur kawakuykä.
167Llapan shonqüwanmi mandakunqaykikunata cäsü.
Tsaykunatam alläpa kuyä.
168Imanö kawakunqätam musyanki.
Yachatsikuynikita y mandakunqaykikunata cäsurmi kawakü.
Tav
169 Dios Yaya, mañakamunqaqta äniykallämay.
Palabraykichö ninqaykinölla tantiyaykatsillämay.
170Rugakamuptiq chaskiykallämay.
Prometinqaykita cumplir libraykallämay.
171Estatütuykikunata yachatsimaptikim kushikuypita cantar alabaq.
172Llapan mandamientuykikunam alli kawakunäpaq.
Palabraykita cantarmi llapan shonqüwan alabashayki.
173Yachatsikuynikita cäsunäpaq kaykaptïqa shamur yanapaykallämay.
174 Dios Yaya, imayka mana allikunapita salvaykallämay.
Leynikikunata cäsurmi kushikü.
175Kawanqäyaqqa qamllatam alabashayki.
Ninqaykikunata tantiyatsimar yanapaykallämay.
176Imanakayta mana puëdirmi oqrakashqa üshanö kaykä.#Isa. 53.6; Jer. 50.6; Eze. 34.11-16.
Tsaynö karpis mandamientuykikunatam mana qonqar cumpliykä.
Serviqniki kanqä rayku shamur yanapaykallämay.
Currently Selected:
Salmo 119: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
