Marcos 9

1Tsaypitanam Jesús nirqan: <<Rasun kaqtam niyaq: Manaraq wañurmi wakiki rikäyanki Dios Yayapa mandakuynin poderninwan shamuykaqta>>.

Jesús chipakyaqman tikranqan

Mateo 17.1-13; Lucas 9.28-36

2Tsaypita soqta junaqtanam Pedruta, Santiaguta y Juanta pusharkur jirkaman Jesús witsarqan. Tsaychömi rikaraykäyaptin Jesús jukläyaman tikrarqan. 3Llatapanpis imayka jankanöraq yuraq tikraskirmi ñawitapis chiyätsiyparaq atsikyarqan. Mayjina taqsharpis manam ni pipis tsaynö yuraqätsintsu. 4Tsaychömi rikäyarqan Moisésta y Elíasta Jesúswan parlaykäyaqta.

5Tsaymi Jesústa Pedro nirqan: <<Rabí, allipaqmi kaychö kaykäyä. Kimsa tsukllata rurayämushaq: jukta qampaq, jukta Moiséspaq y juktana Elíaspaq>>.

6Mantsakashqa karmi mana cuentata qokurnin Pedro tsaynö nirqan.

7Tsaynö parlaykaptinmi pukutay tsapaskirqan. Pukutaypitanam Dios Yaya nimurqan: <<Paymi kuyay Tsurï.#Mat. 3.17; Mar. 1.11; Luc. 3.22. Pay niyäshunqaykita cäsuyay>>.

8Tsaynö nimuptin rikarkurmi ni pitapis rikäyarqannatsu sinöqa Jesúsllatanam rikaykuyarqan.

9Jirkapita uraykäyämuptinmi Jesús nirqan: <<Jirkachö rikäyanqaykita ama pitapis willayankitsu. Runapa Tsurin wañunqanpita kawaskamuptinraqmi willakuyanki>>.

10Tsaynö niptinmi pitapis willayarqantsu. Peru kikinkunapuram ninakuyarqan: <<Wañunqanpita kawamunanpaq parlar ¿imapaqraq parlan?>>

11Tsaymi Jesústa tapuyarqan: <<¿Imanirtan ley yachatsikuqkuna niyan Cristo shamunanpaq puntata Elíasraq shamunanpaq kanqanta?>>#Mal. 4.5-6.

12Jesúsnam nirqan: <<Rasunpam Elías puntata shamunqa llapanta alistananpaq. Tsaynö kaptinpis Diospa palabranchömi nin Runapa Tsurinta chikir alläpa ñakatsiyänanpaq kanqanta. 13Peru Elíasqa maynam shamushqa.#Mat. 11.14. Dios Yayapa palabran ninqannöllam payta wañutsiyarqan>>.

Juk jövinta Jesús kutikätsinqan

Mateo 17.14-20; Lucas 9.37-43a

14Jirkapita urämurmi tariyarqan ley yachatsikuqkunawan wakin discïpulunkuna piñanakuykäyaqta. Paykunatam atskaq runakuna juntapushqa kaykäyarqan. 15Jesústa rikaskirmi runakuna kushikurnin cörrilla aywar saludayarqan. 16Jesúsnam discïpulunkunata nirqan: <<¿Imanirtan ley yachatsikuqkunawan piñakuykäyanki?>>

17Juk runanam nirqan: <<Rabí, tsurïta supay upayätsinqanpita kutikaykatsinaykipaqmi apamushkä. 18Tsurïtam supay illaqpita patsaman ishkiskatsir pushuqaytapis kachutsin y kiruntapis requchyätsin. Tsarinqan höram qerunö chukru tikraskin. Tsaymi supayta qarquyänanpaq discïpuluykikunata rugakuptïpis puëdiyashqatsu>>.

19Jesúsnam nirqan: <<¡Mana creyikuq runakuna! ¡Imayyaqraq qamkunawan kaykäshaq! ¡Imayyaqraq qamkunata awantayäshayki! Mä tsay jövinta apayämuy>>.

20Tsaynö niptinmi jövinta apayarqan. Jesústa rikaykurmi jövinta supay shikwaskatsiptin pushuqayta kachur qochparqan. 21Jövinpa taytantanam Jesús tapurqan: <<¿Imaypitanatan supay ñakatsin?>>

Taytannam nirqan: <<Wamra kanqanpitanam. 22Atska kutim wañutsiyta munar ninamanpis yakumanpis ishkitsin. Llakipäyämarqa tsurïta kutikaykatsillay>>.

23Jesúsnam nirqan: <<¿Imanirtan <puëdirqa> nimanki? Rasunpa creyiptikiqa manam ni imapis ajatsu>>.

24Tsaynö niptinmi jövinpa taytan nirqan: <<¡Awmi, creyïmi! Mas creyikunäpaq yanapaykallämay>>.

25Atskaq runakuna tanqanakurraq shamuqta rikarmi tsay jövinchö supayta Jesús piñapar nirqan: <<¡Upayätsiq supay! ¡Kay jövinpita sas yarquy! ¡Kananpitaqa payman amana kutinkinatsu!>>

26Tsaymi tsay supay qayarar jövinta yapay ishkiskatsirqan. Tsaypita yarqurmi wañushqatanö dëjaskir supay aywakurqan. Jöven jitaraykaqta rikarmi wañushqana kanqanta niyarqan. 27Peru Jesúsnam makipita achkurkur kutikashqatana sharkatsirqan.

28Tsaypita juk wajiman Jesús yaykuskiptinmi discïpulunkuna tapuyarqan: <<Noqakunaqa ¿imanirtan tsay supayta qarquyta puëdiyashkätsu?>>

29Jesúsnam nirqan: <<Tsaynö supaytaqa [ayunar] Dios Yayata mañakurraqmi qarquyanki>>.

Wañunanpaq kanqanta yapay willakunqan

Mateo 17.22-23; Lucas 9.43b-45

30Tsaypita aywarmi Galileapa discïpulunkunawan Jesús päsayarqan. Discïpulunkunallata yachatsiyta munarmi maypa aywayanqantapis runakuna musyayänanta munarqantsu. 31Discïpulunkunata yachatsirmi Jesús nirqan: <<Runapa Tsurintam chikiqninkunapa makinman entreganqa. Peru wañuskatsiyaptinmi kimsa junaqta kawamunqa>>.

32Tsaynö willaptinpis discïpulunkuna manam ima nikanqantapis tantiyayarqantsu. Peru mana tantiyarpis tapuytam sïqa mantsapäyarqan.

Wamranö kanapaq Jesús tantiyatsikunqan

Mateo 18.1-5; Lucas 9.46-48

33Tsaypita Capernaúm markaman chaykur wajichö kaykarmi discïpulunkunata Jesús tapurqan: <<Nänita shamuykashqa ¿imapaqtan parlaykäyaruyki?>>

34Mas mandakuq kayta qechunakur piñanakushqa karmi tapuptinpis upälla kakuyarqan.#Luc. 22.24. 35Tsaypitanam Jesús jamaykur chunka ishkay discïpulunkunata qayaskir nirqan: <<Mayqanpis mas mandakuq kayta munarqa llapanpita mas qollmi shonqu karmi servikuqnö pïmaytapis yanapayanman>>.#Mat. 20.26-27; 23.11; Mar. 10.43-44; Luc. 22.26.

36Tsaypitanam llapanpa puntanchö juk wamrata marqarkur nirqan: 37<<Kay wamranö kaqkunata shutïchö pipis chaskirqa noqatam chaskiyäman. Noqata chaskimarqa kachamaqnï Taytätam chaskiyan>>.#Mat. 10.40; Luc. 10.16; Juan 13.20.

Supayta qarquyaptin mana amatsayänanpaq Jesús yätsinqan

Lucas 9.49-50

38Tsaypitanam Juan nirqan: <<Rabí, noqakunam rikäyashkä juk runa shutikichö supaykunata qarquykaqta. Peru noqantsikwan mana puriptinmi amatsayashkä>>.

39Jesúsnam nirqan: <<Ama amatsayankitsu. Pipis shutïchö milagruta ruraq kaqqa manam conträtsu parlan. 40Contrantsik mana karqa favornintsikmi kaykan.#Mat. 12.30; Luc. 11.23. 41Rasun kaqtam niyaq: Discïpulü kayanqaykipita pipis juk täza yakullatapis qarayäshurnikiqa premiutam chaskinqa>>.#Mat. 10.42.

Jutsaman pitapis mana ishkitsinanpaq Jesús ninqan

Mateo 18.6-9; Lucas 17.1-2

42<<Pipis noqaman creyikamuq juk wamrallatapis jutsaman ishkitsiptinqa mas allim kanman mulinu rumita kunkanman watarkur lamarman jitarpuyaptin. 43Makiki jutsata ruratsiyäshuptikiqa roquskiyay. Imaypis mana wañuq ninaman ishkan makiyuq jitarpushqa kayanqaykipa rantin mas allim kanman juk makiyuqllapis mana ushakaq kawayman yaykuyaptiki.#Mat. 5.30. 44[Infiernuchöqa runata ushakätsiq kurukuna manam imaypis wañuyanqatsu. Ninapis manam ni imay wañunqatsu.]

45<<Chakiki jutsata ruratsiyäshuptikiqa roquskiyay. Infiernuman ishkan chakiyuq jitarpushqa kayanqaykipa rantin mas allim kanman juk chakiyuqllapis mana ushakaq kawayman yaykuyaptiki. 46[Infiernuchöqa runata ushakätsiq kurukuna manam imaypis wañuyanqatsu. Ninapis manam ni imay wañunqatsu.]

47<<Ñawiki jutsata ruratsiyäshuptikiqa jipiskiyay. Infiernuman ishkan ñawiyuq jitarpushqa kayanqaykipa rantin mas allim kanman jukaq ñawikillawanpis Dios Yayapa mandakuyninman yaykuyaptiki.#Mat. 5.29. 48Infiernuchöqa runata ushakätsiq kurukuna manam imaypis wañuyanqatsu. Ninapis manam ni imay wañunqatsu.#Isa. 66.24.

49<<Sacrificiuta kachitsarkur#Lev. 2.13; Eze. 43.24. waykayanqannömi llapan runakunapis imayka ninapa päsaqnö ñakayanqa. 50Kachiqa allim. Peru qamyaskirqa manam imapaqpis välinnatsu.#Mat. 5.13; Luc. 14.34-35. Runa majikiwan kuyanakur alli kawakurqa qamkunapis kachinömi kayanki>>.

Currently Selected:

Marcos 9: qxn

Highlight

Copy

Compare