Marcos 10

Majayuqkuna mana rakikäyänanpaq Jesús yachatsikunqan

Mateo 19.1-12

1Capernaúmpita aywarmi Judea provinciaman Jesús charqan. Tsaypitanam Jordán mayu tsimpanman päsayarqan. Tsayman atskaq runakuna qorikäyaptinmi imaypis yachatsinqannölla yachatsikurqan. 2Fariseukunapis tsayman aywarmi llutanta parlatsiyänan rayku Jesústa tapuyarqan: <<¿Warminpita ollqu rakikanmanku o manaku?>>

3Jesúsnam nirqan: <<Moisés qellqanqanchö ¿ima nintan?>>

4Fariseukunanam niyarqan: <<Moisésmi yachatsikurqan pipis warminpita rakikayta munarqa divorciu papelta firmapuskir qarqunanpaq>>.#Deut. 24.1-4; Mat. 5.31.

5Jesúsnam nirqan: <<Runakuna chukru shonqu kayaptinmi Moisés tsaynö yachatsikurqan. 6Dios Yayam kay patsata kamar ollquta y warmitapis kamarqan.#Gén. 1.27; 5.2. 7Tsaymi mamanpita y taytanpita ollqu yarqun warminwan mana rakikar täkunanpaq. 8Warminwan täkurmi jukllayllanöna kayanqa. Tsaynö kaykaptinqa mananam ishkaqnatsu kayan, sinöqa jukllayllanönam.#Gén. 2.24. 9Tsaymi Dios Yaya juntanqantaqa ni pipis rakinmantsu>>.

10Wajichö kaykarnam discïpulunkuna Jesústa tapuyarqan tsaynö yachatsikunqanpita. 11Tsaymi Jesús nirqan: <<Mayqan runapis warminpita rakikaskir juk warmiwan täkurqa adulteriu jutsatam ruraykan. 12Tsaynöllam mayqan warmipis ollqunpita rakikaskir juk runawan täkurqa adulteriu jutsata ruraykan>>.#Mat. 5.32; 1Cor. 7.10-11.

Wamrakunapaq Dios Yayata Jesús mañakunqan

Mateo 19.13-15; Lucas 18.15-17

13Tsaypitanam wamrakunata Jesúsman apayarqan umankunata yatar Dios Yayata mañakunanpaq. Apaqkunata discïpulunkuna michaykaqta 14rikarmi Jesús piñapar nirqan: <<Wamrakunata apayämunanta ama amatsayaytsu. Wamranö kaqkunapaqmi Dios Yayapa mandakuyninqa. 15Rasun kaqtam niyaq: Pipis Dios Yayapa mandakuyninta wamranö mana chaskirqa manam paypa mandakuyninman yaykunqatsu>>.

16Tsaypitam wamrakunata marqarkur umanta yataykur Dios Yayata mañakurqan.

Rïcu runa alläpa ajata salvakunanpaq Jesús ninqan

Mateo 19.16-30; Lucas 18.18-30

17Tsaypita Jesús aywaykaptinmi juk jöven cörrilla aywar puntanman qonqurikuykur nirqan: <<Rabí, alli runam kanki. ¿Imatatan ruräman mana ushakaq kawayta tarinäpaq?>>

18Jesúsnam nirqan: <<¿Imanirtan <alli runa> nimanki? Dios Yayallam alliqa. 19Musyankim mandamientukuna ninqanta: <Ama runa majikita wañutsinkitsu.#Éxo. 20.13; Deut. 5.17. Ama majayuq kaykar jukwan purikunkitsu.#Éxo. 20.14; Deut. 5.18. Ama suwakunkitsu.#Éxo. 20.15; Deut. 5.19. Ama manakaqkunata pitapis tumpankitsu.#Éxo. 20.16; Deut. 5.20. Ama runa majikita llullatsinkitsu. Mamaykita y taytaykita respitanki#Éxo. 20.12; Deut. 5.16.> >>.

20Tsay runanam nirqan: <<Rabí, tsaykunataqa wamra kanqäpitam llapanta cumplishkä>>.

21Tsaymi Jesús rikaykur llakiparnin nirqan: <<Jukraqmi cumplinaykipaq faltan. Llapan imaykaykikunata rantikuskir tsay qellayta waktsakunata qaray. Tsaynö ruraptikiqa ciëluchömi riquëzayki kanqa. Tsaypita [cruznikita matankakurkur] qatimay>>.

22Tsaynö niptinmi alläpa rïcu kar tsay jöven llakishqa aywakurqan. 23Aywaskiptinnam wakpa kaypa rikachakuskir discïpulunkunata Jesús nirqan: <<¡Alläpa ajam rïcu runakuna Dios Yayapa mandakuyninman yaykuyänanpaq!>>

24Tsaynö niptinmi discïpulunkuna mantsakashqa kayarqan. Tsaymi Jesús yapay nirqan: <<Kuyay wamräkuna, ¡alläpa ajam [rïcu kayanqanman confiakuq runakuna] Dios Yayapa mandakuyninman yaykuyänanpaq! 25Rïcu runa Dios Yayapa mandakuyninman yaykunqanpitaqa mas fäcilmi camëllupis awjapa uchkunpa päsanman>>.#Prov. 11.28.

26Tsaynö niptinmi discïpulunkuna masraq mantsakar kikinkunapura ninakuyarqan: <<Tsaynö kaptinqa ¿piraq salvakanman?>>

27Paykunata rikaykurmi Jesús nirqan: <<Runakuna salvakänanpaqqa alläpa ajam. Peru Dios Yayapaqmi sïqa imapis ajatsu>>.

28Pedrunam nirqan: <<Taytay, noqakunaqa llapan imaykäkunatapis jaqiskirmi qamta qatiräyaq>>.

29Jesúsnam nirqan: <<Rasun kaqtam niyaq: Pipis wajinta, wawqinkunata, paninkunata, mamanta, taytanta, [warminta,] tsurinkunata y chakrankunatapis noqa rayku y alli willakuynï rayku jaqiq kaqqa 30kay vïdachö pachak (100) kuti mastam chaskinqa. Tsaynöpam wajinkuna, wawqinkuna, paninkuna, mamankuna, tsurinkuna y chakrankunapis paypa kanqa. Peru creyimunqanpitam chikishqa kanqa. Tsaynö kaptinpis wak vïdachö mana ushakaq kawaytam tarinqa. 31Atskaqmi respitashqa kaykaqkuna manakaqman churashqa kayanqa. Manakaqman churashqa kaqkunanam respitashqa kayanqa>>.

Wañutsiyänanpaq kanqanta Jesús yapay willakunqan

Mateo 20.17-19; Lucas 18.31-34

32Jerusalénpa aywarmi discïpulunkunapa puntanta Jesús aywarqan. Jerusalénchö wañutsiyta munayanqanta musyaskirmi discïpulunkuna y paqtan aywaqkunapis mantsakuykar aywayarqan. Tsaymi chunka ishkay discïpulunkunata jukläman qayaskir ima päsananpaq kanqanta willar Jesús nirqan: 33<<Musyayankim Jerusalénman aywanqantsikta. Tsaychömi Runapa Tsurinta prësu achkuskir mandakuq sacerdötikunaman y ley yachatsikuqkunaman apayanqa. Paykunam wañutsiyänanpaq condenayanqa. Mana Israel autoridäkunaman entregayaptinmi 34asipäyanqa, astayanqa, toqapuyanqa y wañutsiyanqa. Peru kimsa junaqtam kawamunqa>>.

Santiaguwan Juan rugakuyanqan

Mateo 20.20-28

35Tsaypitanam Zebedeupa tsurinkuna Santiaguwan Juan Jesúsman witiykur niyarqan: <<Rabí, rugakuyälläshayki>>.

36Jesúsnam nirqan: <<¿Imallataraq?>>

37Paykunanam niyarqan: <<Mandakuq kanaykipaq Dios Yaya churashuptiki juknïta derëchaykiman y juknïtana itsuqnikiman jamaykatsiyämanki>>.

38Jesúsnam nirqan: <<Manam imata mañakayämanqaykita musyayankitsu. ¿Noqa upyanäpaq kaq cöpata#10.38a Cöpapaq parlarqa Dios Yaya rabyar jutsa ruraqkunata castigananpaq kanqantam nirqan. Tsaypaq masta musyanaykipaq liyinki Sal. 75.8; Isa. 51.17; Jer. 25.15-29; Hab. 2.16. upyayankimantsuraq? ¿Awantayankimantsuraq bautizayämänanpaq kanqannö bautizayäshuptiki?>>#10.38b Bautizayämänanpaq kanqannö bautizayäshuptiki ninanqa wañutsiyämänanpaq kanqannö wañutsiyäshuptiki ninanmi.

39Paykunanam niyarqan: <<Awmi, taytay>>.

Jesúsnam nirqan: <<Rasunpam noqa upyanäpaq kaq cöpata upyayanki y bautizayämänanpaq kanqannömi bautizayäshunki. 40Peru derëcha kaq lädüman ni itsuq kaq lädüman <jamakamuy> ninäpaqqa manam noqapitatsu. Tsaymanqa jamayanqa Taytä dispöninqan kaqkunallam>>.

41Tsaynö rugakuyanqanta wiyaykurmi wakin discïpulunkuna Juantawan Santiaguta rabyapäyarqan. 42Tsaymi discïpulunkunata qayaskir Jesús nirqan: <<Musyayanqaykinöpis nacionchö mandakuqkunaqa runakunata munayanqantam ruratsiyan. 43Peru qamkunachöqa manam tsaynö kanmantsu. Mayqaykipis mandakuq kayta munarqa servikuqnölla runa majikikunata yanapayay.#Luc. 22.25-26. 44Alli rikashqa kayta munarqa pïmaypaqpis servikuqnö kayay.#Mat. 23.11; Mar. 9.35; Luc. 22.26. 45Runapa Tsurinpis manam servishqa kananpaqtsu shamushqa, sinöqa servinanpaq#Luc. 22.27; Juan 13.12-15. y runakuna rayku wañur atskaqta salvananpaqmi>>.

Bartimeuta Jesús kutikätsinqan

Mateo 20.29-34; Lucas 18.35-43

46Tsaypitanam Jericó markaman chäyarqan. Jericópita discïpulunkunawan y mas atskaq runakunawan yarquykäyaptinmi Timeupa tsurin Bartimeo limushnata mañakur nänichö jamaraykarqan. Paymi qapra karqan. 47<<Nazaret runa Jesúsmi päsaykan>> niyaptinmi qayaykachar nirqan: <<¡Davidpa Tsurin Jesús, llakipaykallämay!>>

48Qayaykachaptinmi upälla kananpaq runakuna piñapäyarqan. Piñapäyaptinpis masmi qayaykachar nirqan: <<¡Davidpa Tsurin, llakipaykallämay!>>

49Qayaykachanqanta wiyaskirmi Jesús ichiykur tsay qaprata qayatsirqan. Tsaymi qaprata runakuna niyarqan: <<Ama mantsakuytsu. Jesúsmi qayashunki. Sas aywashun>>.

50Tsaynö niyaptinmi sas sharkurnin punchunta jitaskir Jesús kaqman aywarqan. 51Jesúsnam tapurqan: <<¿Imachö yanapanaqtatan munanki?>>

Qapranam nirqan: <<¡Rabí, ñawï kutikänantam munallä!>>

52Jesúsnam nirqan: <<Kananqa aywakuy. Confiakamunqaykipitam ñawiki kutikanqana>>.

Tsaynö niptinmi jina höra ñawin kichakaskirqan. Tsaypitam Jesúspa qepanta aywarqan.

Currently Selected:

Marcos 10: qxn

Highlight

Copy

Compare