Marcos 14

Jesústa wañutsiyänanpaq willanakuyanqan

Mateo 26.1-5; Lucas 22.1-2; Juan 11.45-53

1Jesús tsaynö yachatsirqan Pascua#Éxo. 12.1-27; Deut. 16.1-8. fiesta y Levadürannaq Tantata Mikuna fiesta qallananpaq ishkay junaq faltaykaptinmi. Tsay junaqkunam mandakuq sacerdötikuna y ley yachatsikuqkuna willanakuyarqan runakunata mana musyatsiyllapa Jesústa imanöpapis achkuskir wañutsiyänanpaq. 2Tsaymi niyarqan: <<Fiestachöqa ama achkushuntsu. Tsaychö achkushqaqa contrantsikmi runakuna shäriyanqa>>.

Jesúspa umanman perfümita wiñanqan

Mateo 26.6-13; Juan 12.1-8

3Betania markachö leprösu niyanqan Simónpa wajinchö Jesús kaykaptinmi juk warmi charqan alabastro rumipita rurashqa pömuchö perfümin aptashqa. Tsay perfümi nardupita rurashqa karmi alläpa chaniyuq karqan. Mësachö Jesús kaykaptinmi tsay warmiqa pömupa shiminta pakiskir Jesúspa umanman wiñarqan.#Luc. 7.37-38. 4Tsayta rikaykurmi wakin tsaychö kaykaqkuna rabyar niyarqan: <<¿Imapaqtan tsay perfümita perditsin? 5Tsaypa rantinqa juk wata arupukur gänanqantsikpita maschö rantikushwan karqan.#14.5 Griëguchömi nin kimsa pachak (300) denariupita maschö rantikuyänanpaq kanqanta. Juk denarium juk junaq aruypa chanin karqan. Tsay qellaywan waktsakunata yanapashwan karqan>>.

Tsaynö nirmi tsay warmita piñapäyarqan.

6Jesúsnam nirqan: <<Dëjayay. ¿Imanirtan kay warmita rimayanki? Payqa allitam rurashqa. 7Waktsakunaqa qamkunawanmi imaypis kaykäyanqa.#Deut. 15.11. Peru noqam sïqa qamkunawan kashaqnatsu. 8Pampashqa kanäpaqmi payqa perfümita wiñapaykäman. 9Rasun kaqtam niyaq: Maytsaychöpis willakuynïta willakurmi kay warmi perfümita wiñämunqanta willakuyanqa>>.

Jesústa rantikunanpaq Judas Iscariote conträtuta ruranqan

Mateo 26.14-16; Lucas 22.3-6

10Jesúspa apostolnin Judas Iscariotim mandakuq sacerdötikunaman aywaykur Jesústa entregananpaq nirqan. 11Tsaymi sacerdötikuna kushikur pägayänanpaq äniyarqan. Judasnam yarpachakurqan imay höra Jesústa traicionananpaq.

Pascua mikuyta discïpulunkunawan Jesús mikunqan

Mateo 26.17-25; Lucas 22.7-14, 21-23; Juan 13.21-30

12Levadürannaq Tantata Mikuna fiesta qallanan junaqmi Pascuachö mikuyänanpaq cordëruta pishtayaq. Tsay junaqmi discïpulunkuna Jesústa tapuyarqan: <<Taytay, Pascua mikuyta mikunapaq ¿maychötan alistayämushaq?>>

13Tsaymi Jesús ishkay discïpulunkunata nirqan: <<Jerusalénman aywayay. Tsayman chaykurmi juk runa puyñuwan#14.13 Wakin runakunaqa uylluwan niyan. yakuta apaykaqta tariyanki. Tsay runapa qepanta aywayanki may wajimanpis chanqanyaq. 14Tsay wajiyuqta niyanki: <¿Mayqan kaq cuartuykichötaqshi discïpulunkunawan Pascua mikuyta Jesús mikunqa?> 15Wajiyuqnam altuschö jatun cuartu alistashqata rikätsiyäshunki. Tsaychö mikunapaq alistayanki>>.

16Tsaymi Jerusalénman discïpulunkuna aywar Jesús ninqannölla tariyarqan. Tsaychömi Pascua mikuyta alistayarqan.

17Patsa qoyaykaptinnam#14.17 Wakin runakunaqa patsa tsakaykaptinnam niyan. chunka ishkay discïpulunkunawan tsay wajiman Jesús chäyarqan. 18Mikuykarnam Jesús nirqan: <<Rasun kaqtam niyaq: Qamkunapita juknikim prësu achkuyämänanpaq traicionamanqa. Tsaynö traicionamanqa paqtä mikuykaqmi>>.#Sal. 41.9.

19Tsaynö niptinmi llakikurnin juknin juknin Jesústa tapuyarqan: <<¿Noqatsuraq kä?>>

20Jesúsnam nirqan: <<Qamkunapita juknikim kayanki. Paymi noqawan paqta tantata plätuchö tullpuykan. 21Rasunpam Runapa Tsurin qellqashqa kanqannölla ñakar wañunqa. Peru payta traicionaq runam sïqa alläpa llakipaypaq kanqa. Tsay runaqa ama yurinmantsu karqan>>.

Mushuq pactupaq Jesús yachatsikunqan

Mateo 26.26-30; Lucas 22.15-20; 1 Corintios 11.23-25

22Mikuykäyaptinmi tantata aptarkur Dios Yayata Jesús agradëcikurqan. Tantata pakiskirnam discïpulunkunata makyar nirqan: <<Kay tantata mikuyay. Kayqa noqapa cuerpümi>>.

23Tsaynöllam vïnuyuq cöpata aptarkur Dios Yayata agradëcikurqan. Tsaypitanam discïpulunkunata makyaptin llapan upyayarqan. 24Tsaypitanam nirqan: <<Kay vïnuqa Dios Yaya [mushuq] pactuta rurananpaq#Jer. 31.31-34. jichanqä yawarnïmi. Atskaq runakuna jutsankunapita perdonashqa kayänanpaqmi yawarnïta jichar wañushaq.#Éxo. 24.8; Zac. 9.11. 25Rasun kaqtam niyaq: Kananpitaqa vïnuta manam yapay upyashaqnatsu hasta Dios Yayapa mandakuyninchö mushuq vïnuta upyanqäyaq>>.

26Tsaynö niskirmi discïpulunkunawan salmukunata cantaskir Olivos lömaman aywayarqan.

Pedro nëgananpaq kanqanta Jesús ninqan

Mateo 26.31-35; Lucas 22.31-34; Juan 13.36-38

27Tsaypitanam Jesús nirqan: <<[Kanan paqasmi] llapayki dëjaskayämar aywakuyanki. Dios Yayapa palabranmi nin: <Üsha mitsikuqta wañuskatsiptïmi üshankuna wakpa kaypa witsikar aywakuyanqa>.#Zac. 13.7. 28Peru wañunqäpita kawaskamurmi qamkunapita mas puntata Galileaman aywashaq>>.#Mat. 28.16.

29Pedrunam nirqan: <<Wakin kaq dëjayäshuptikipis noqaqa manam dëjashaykitsu>>.

30Jesúsnam nirqan: <<Rasun kaqtam niq: Kanan paqas ishkay kuti gällu manaraq cantaptinmi kimsa kuti nëgamanki>>.

31Pedrunam nirqan: <<Ishkantsikta wañutsimäna kaptinpis manam nëgashaykitsu>>.

Tsaynöllam wakin discïpulunkunapis niyarqan.

Getsemaníchö Jesús mañakunqan

Mateo 26.36-46; Lucas 22.39-46

32Getsemaní niyanqanman discïpulunkunawan chaykurmi Jesús nirqan: <<Dios Yayata mañakamunqäyaq kayllachö jamaykäyay>>.

33Tsaypitam Pedruta, Santiaguta y Juanta washaläman pusharqan. Tsaychömi alläpa llakikur 34nirqan: <<Wañunayparaqmi llakikuy tsarimashqa. Mana puñukar kayllachö shuyaykäyämay>>.

35Tsaypita washaläninkunaman aywaykurmi patsaman pelatakuykur Dios Yayata mañakurqan wañuypita salvananpaq. 36Mañakurmi nirqan: <<Abba, Taytallä, qampaqqa imapis manam ajatsu. Cöpachö wiñaraykaq castïguykita ama upyaykatsillämaytsu.#Sal. 75.8; Isa. 51.17; Jer. 25.15-29; Hab. 2.16. Peru noqa munanqänöqa ama katsuntsu, sinöqa qam munanqaykinö kaykullätsun>>.

37Tsaypita discïpulunkuna kaqman kutir puñukashqata tariskirmi Pedruta nirqan: <<Simón, ¿imanirtan puñuykanki? ¿Manaku juk hörallapis rikchayta puëdinki? 38Rikchayay. Dios Yayata mañakuyay Satanás mana tentayäshunaykipaq. Cäsuyämayta munarpis kikillaykikunapitaqa manam puëdiyankitsu>>.

39Tsaynö niskirmi yapay aywarnin puntata mañakunqannölla Dios Yayata mañakurqan. 40Tsaypita yapay kutirmi discïpulunkuna puñukashqata tarirqan. Alläpa puñuy venciptinmi puñukashqa kaykäyarqan. Tsaynö kaykaqta tariskiptinmi ni ima niyta puëdiyarqantsu. 41Kimsa kuti Diosta mañakuskir kutirmi nirqan: <<¿Jinallaku puñuykäyanki? ¡Rikchayay! Höra chämushqanam Runapa Tsurinta jutsasapa runakunaman entregananpaq. 42¡Shäriyay, aku aywashunna! Traicionamaq runam shamuykanna>>.

Jesústa prësu achkuyanqan

Mateo 26.47-56; Lucas 22.47-53; Juan 18.3-12

43Jesús tsaynö parlaykaptinmi espädankunawan y qerunkunawan atskaq runakunata pushashqa apostolnin Judas Iscariote charqan. Judas pushanqan runakunataqa mandakuq sacerdötikuna, ley yachatsikuqkuna y Israel mayor runakunam kachayarqan. 44Manaraq charmi pushanqan runakunata Judas yätsirnin nirqan: <<Mayqantapis mutsar saludanqä kaqmi Jesús kanqa. Payta prësu achkuyanki>>.

45Chaykurnam <<¡rabí!>> nir Jesústa mutsaykurqan. 46Tsaynö mutsaykuptinmi Jesústa prësu achkuskiyarqan. 47Achkuskiyaptinmi jukaq discïpulun espädanta jipiskir mas mandakuq sacerdötipa serviqninpa rinrinta walluskirqan.

48Runakunatanam Jesús nirqan: <<¿Imanirtan suwamannö espädaykikunawan y qeruykikunawan shayämushkanki? 49Waran waran templupa patiunchö qamkunawan paqta kaykaptï#Luc. 19.47; 21.37. ¿imanirtan tsaychö prësu achkuyämarqaykitsu? Peru Dios Yayapa palabran ninqannöllam llapanpis cumpliykan>>.

50Jesústa prësu achkuskiyaptinnam discïpulunkuna dëjaskir qeshpirnin aywakuyarqan. 51Juk jövinllam säbanaswan pitukushqa qepanta aywarqan. Tsay jövinnam prësu achkuyta munayaptin 52pituranqan säbanasta dëjaskir qalapätulla qeshpir aywakurqan.

Jesústa mas mandakuq sacerdöti tapunqan

Mateo 26.57-68; Lucas 22.54-55, 63-71; Juan 18.13-14, 19-24

53Tsaypitanam mas mandakuq sacerdötiman Jesústa apayarqan. Tsaymanmi mandakuq sacerdötikuna, Israel mayor runakuna y ley yachatsikuqkuna qorikäyarqan. 54Karu qepallanta aywarmi ruri patiuyaq Pedro yaykurqan. Yaykuskirmi templu cuidaq wardiakunawan ninachö mashakur jamaykarqan.

55Tsaychömi mandakuq sacerdötikuna y llapan Sanedrín juezkuna Jesústa wañutsiyta munar testïgukunata ashiyarqan llullakur Jesúspa contran parlayänanpaq. Peru mayjina ashirpis wañutsiyänanpaqnöqa manam ni ima jutsantapis tariyarqantsu. 56Manakaqkunata parlar contran atskaq shärirpis kikinkunapuram contränakuyarqan. 57Tsaymi wakin runakuna manakaqta parlar Jesúspa contran shärir niyarqan: 58<<Noqakunam kay runa parlanqanta wiyayashkä: <Noqaqa templuta juchuskatsirmi kimsa junaqllachö juk templutana shäritsishaq. Tsay templutaqa manam runakunatsu shäritsiyanqa> >>.#Juan 2.19.

59Jesúspa contran tsaynö niyaptinpis manam wakin testïgukuna niyanqannötsu karqan.

60Tsaymi mas mandakuq sacerdöti sharkur Jesústa tapurqan: <<Tsaynö niyäshuptiki ¿manaku imatapis ninki? ¿Rasun kaqtaku niyan o manaku?>>

61Tsaynö tapuptinpis Jesúsqa manam ni imata nirqantsu. Tsaymi mas mandakuq sacerdöti yapay tapurqan: <<¿Qamku Diospa Tsurin Cristo kanki?>>

62Jesúsnam nirqan: <<Noqam Kä.#14.62 Noqam Kä nirmi Jesucristo tantiyatsirqan kikin Dios kanqanta. Tsaypaq masta musyanaykipaq liyinki Éxo. 3.14; Juan 10.30-33. Kananpitam Runapa Tsurinta rikäyanki poderösu Diospa derëcha kaq lädunchö jamaykaqta y pukutay jananchö ciëlupita shamuykaqta>>.#Dan. 7.13.

63Tsaynö niptinmi mas mandakuq sacerdöti alläpa rabyarnin sotänantapis rachiskir nirqan: <<¿Imapaqnatan mas testïgutapis wanantsik? 64Wiyayashkankinam Dios Yayapa contran parlanqanta. Kanan ¿imatatan niyanki?>>

Tsaymi Jesústa wañutsiyänanpaq llapan niyarqan.#Lev. 24.16. 65Tsaymi wakin kaqkuna toqapur ñawinta vendarkur kutar niyarqan: <<¡Pï kutashunqaykitapis mä niyämay!>> Tsaynöllam templuta cuidaq wardiakunapis maqayarqan.

Jesústa Pedro nëganqan

Mateo 26.69-75; Lucas 22.56-62; Juan 18.15-18, 25-27

66Ruri patiuchö Pedro kaykaptinmi mas mandakuq sacerdötipa serviqnin warmi charqan. 67Ninachö mashakuykaqta rikaykurmi Pedruta nirqan: <<Qampis Nazaretpita Jesúswanmi purishkanki>>.

68Pedrunam nëgar nirqan: <<Noqaqa manam payta reqïtsu. Imatachari parlakunkipis>>.

Tsaynö niskirmi patiu yaykunaman witikurqan. Tsay höram gällu cantaskirqan. 69Tsaychöpis tsay servikuq warmi Pedruta rikaykurmi tsaychö kaykaq runakunata nirqan: <<¡Kay runaqa Jesúswanmi purishqa!>>

70Tsaynö niptinmi Pedro yapay nirqan: <<Manam payta reqïtsu>>.

Tsaypita unay rätullatanam tsaychö kaykaq runakuna yapay niyarqan: <<Qamqa rasunpam paywan purishkanki. Galilea runam kanki. [Galilea runakunanömi parlankipis]>>.

71Pedrunam jurarnin nirqan: <<¡Tsay runataqa manam reqïtsu!>>

72Tsay höram gällu yapay cantaskirqan. Tsaymi Pedro yarpaskirqan Jesús ninqanta: <<Gällu manaraq ishkay kuti cantaptinmi kimsa kuti nëgamanki>>.

Tsayta yarpaskirmi alläpa llakikur waqarqan.

Currently Selected:

Marcos 14: qxn

Highlight

Copy

Compare