Marcos 15

Pilatuman Jesústa apayanqan

Mateo 27.1-2, 11-14; Lucas 23.1-5; Juan 18.28-38

1Tsaypita patsa waraykaptinnam mandakuq sacerdötikuna, Israel mayor runakuna, ley yachatsikuqkuna y llapan Sanedrín juezkunapis qorikaykur Jesústa wañutsiyänanpaq willanakuyarqan. Willanakuskirnam Jesústa watarkur Pilatuman apayarqan. 2Chaykatsiyaptinmi Pilato tapurqan: <<¿Rasunpaku Israel runakunapa mandakuqnin rey kanki?>>

Jesúsnam nirqan: <<Rasun kaqtam nikanki>>.

3Tsaychömi mandakuq sacerdötikuna Jesúspa contran imaykata niyarqan. 4Tsaymi Jesústa Pilato yapay tapurqan: <<¿Manaku ni imatapis ninki tsayläya contrayki nikäyaptin?>>

5Tsaynö niptinpis Jesús manam ni imata parlakurqantsu. Tsaymi Pilato mantsakashqa ni ima niyta puëdirqantsu.

Jesústa crucificäyänanpaq Pilato mandanqan

Mateo 27.15-26; Lucas 23.13-25; Juan 18.39—19.16

6Wata watam Pascuachö runakuna mañayanqan prësuta Pilato qarquq. 7Tsay watam Barrabás shutiyuq runa prësu qaykurarqan. Paymi autoridäkunapa contran shärinqanpita y wañutsikunqanpita compinchinkunawan carcelchö qaykuraykarqan. 8Tsaymi runakuna Pilatuman aywar juk prësuta tsay watapis qarqunanpaq mañayarqan. 9Pilatunam tapurqan: <<¿Munayankiku Israel runakunapa mandakuqnin reyta qarqunäta?>>

10Pilatum musyarqanna Jesústa chikir mandakuq sacerdötikuna payman apayanqanta.

11Tsaynö niptinmi mandakuq sacerdötikuna tsaychö kaykaq runakunata yachatsiyarqan: <<Barrabásta qarquy>> niyänanpaq. 12<<Barrabásta qarquy>> niyaptinmi Pilato nirqan: <<Israel runakunapa mandakuqnin reyta ¿imatatan rurashaq?>>

13Tsaynö niptinmi qayaykachar niyarqan: <<¡Crucificay!>>

14Pilatunam tapurqan: <<¿Ima mana allitatan rurashqa?>>

Peru tsaynö niptinpis masraqmi qayaykachar niyarqan: <<¡Crucificay!>>

15Tsaynö niyaptinmi runakunapita alli rikashqa kayta munar Barrabásta Pilato qarqurqan. Jesústanam alli astaykatsir crucificäyänanpaq soldädukunaman entregarqan.

Jesústa soldädukuna asipäyanqan

Mateo 27.27-31; Juan 19.2-3

16Tsaypitanam soldädukuna Jesústa apayarqan Pilatupa despächunpa patiunman. Llapan tröpa#15.16 Tröpa complëtum soqta pachak (600) soldädukuna kayarqan. soldädukuna tsayman qorikaskirmi 17granäti cäpata ashqurkatsir kashapita awashqa corönata umanman shukutsiyarqan. 18Tsaynö shukurkatsirmi asipar niyarqan: <<¡Alabashqa katsun Israel runakunapa mandakuqnin rey!>>

19Tsaypitam shoqushwan Jesústa umachö garutiyarqan. Toqapurmi adoraq tukurnin puntanman qonqurpakuyarqan. 20Tsaynö asiparmi granäti cäpata llushtiskatsir kikinpa llatapanta shukutsiyarqan. Tsaypitanam crucificaq apayarqan.

Jesústa crucificäyanqan

Mateo 27.32-44; Lucas 23.26-43; Juan 19.17-27

21Jesústa crucificaq apaykäyaptinmi Simón shutiyuq runa chakrapita kutiykämurqan. Paymi Cirene nacionpita y Alejandrupa y Rufupa taytan karqan.#Rom. 16.13. Paytam Jesús apaykanqan cruzta umrutsiyarqan. 22Tsaypitanam Jesústa chätsiyarqan Gólgota niyanqanman. Gólgota ninanqa Calavëra Sitiu ninanmi. 23Tsaychömi mïrrawan tallushqa vïnuta upyatsiyta munayaptinpis upyayta munarqantsu.#15.23 Tsaynö upyatsiyta munayarqan alläpa nanayta Jesús awantananpaqmi.

24Jesústa crucificaskirnam llatapanta mayqanpis apananpaq sortiyayarqan.#Sal. 22.18. 25Crucificäyanqan höram alliq las nuëvinö karqan. 26Imapita wañutsiyanqanta runakuna musyayänanpaqmi letrëruchö qellqashqa karqan: <<Kay runam Israel runakunapa mandakuqnin rey>>.

27Jesústa crucificäyanqan lädunmanmi ishkay suwakunatapis crucificäyarqan, jukaqta derëcha lädunman y jukaqtana itsuq lädunman. 28[Tsay suwakunatawan crucificarmi Dios Yayapa palabranchö ninqanta cumpliyarqan. Tsaychömi nin: <<Jutsasapa runatanömi rikäyarqan>>.]#Isa. 53.12.

29Jesús crucificashqa kaykaqta rikarmi tsaypa päsaq runakuna asipäyarqan. Umankunatapis aywiparmi#Sal. 22.7; 109.25. niyarqan: <<¡Väya! Templuta juchuskatsir kimsa junaqllata shäritsinaykipaq nikarqa#Mar. 14.58; Juan 2.19. 30mä salvakur cruzpita bäjamuy>>.

31Tsaynöllam mandakuq sacerdötikuna y ley yachatsikuqkunapis Jesústa asipar kikinkunapura ninakuyarqan: <<Wakin kaqta salvarpis kikinqa manam salvakuyta puëdintsu. 32Israel runakunapa mandakuqnin rey Cristo karqa mä cruzpita bäjamutsun. Bäjamuptinqa creyishunmi>>.

Tsaynöllam Jesúspa lädunchö crucificashqa kaykaq runakunapis burlakuyarqan.

Jesús wañunqan

Mateo 27.45-56; Lucas 23.44-49; Juan 19.28-30

33Pullan junaqpita las tresyaqmi patsa tutapaskirqan. 34Tsay höram Jesús jinchi nirqan: <<Eloi, Eloi, ¿lama sabactani?>>

Tsay ninanqa <<Dios Yaya, Dios Yaya, ¿imanirtan dëjamashkanki?>> ninanmi.#Sal. 22.1.

35Tsaynö ninqanta wiyaykurmi tsaychö kaykaq wakin runakuna niyarqan: <<Profëta Elíastam qayaykan>>.

36Tsaynö niyaptinmi juk runa sas aywar puchquq vïnuman esponjata tullpurkur shoqushpa puntanman watarqan. Tsayta Jesúspa shiminman shoqunanpaq churarmi#Sal. 69.21. nirqan: <<Mä rikäshun cruzpita jipinanpaq Elías shamunqakush>>.

37Tsaypitanam jinchi qayaraskir Jesús wañuskirqan. 38Tsay höram templu rurinchö tsaparaq cortïna#Éxo. 26.31-33; 2Crón. 3.14. janaqpita urayaq rachiskirqan. 39Jesúspa puntanchö kaykaq capitanmi Jesús [qayaranqanta wiyar y] wañunqanta rikar nirqan: <<¡Rasunpam kay runaqa Diospa Tsurin kashqa!>>

40Tsaychömi warmikunapis karullapita rikaraykäyarqan. Paykunawanmi kayarqan María Magdalena, Santiagupa y Josépa maman María y Salomépis. 41Tsay warmikunam Galileachö Jesús puriptin yanapar qatiräyarqan.#Luc. 8.2-3. Tsaynöllam tsaychö kaykäyarqan Jesúswan Jerusalénman aywaq atskaq warmikunapis.

Jesústa pampayanqan

Mateo 27.57-61; Lucas 23.50-56; Juan 19.38-42

42Jamay junaqpaq alistakuyänan junaq tardina kaptinmi#15.42 Jamay junaqpaq alistakuyänan junaqqa viernismi karqan. Israel runakunapaqqa jamay junaqmi qallan viernes las seis de la tardi. 43Arimateapita José Pilatuman aywarnin mana mantsakuypa rugakur nirqan: <<Jesúspa ayanta pampanäpaq dëjapaykallämay>>.

Joséqa Israel runakunapa autoridäninmi karqan. Paypis Dios Yayapa mandakuynintam shuyaraykarqan.

44Tsaynö rugaptinmi Pilato yarpachakur nirqan: <<¿Wañushqanatsuraq kanman?>> Tsaymi wañushqana kanqanta musyananpaq capitanta qayatsirqan. 45Wañushqana kanqanta willaptinmi Jesúspa ayanta pampananpaq Joséta änirqan.

46Tsaymi lïnupita rurashqa säbanasta rantiskir Jesúspa ayanta cruzpita jipiskir piturqan. Tsaypitam qaqachö uchkushqa sepultüraman churaykur jatun rumiwan punkuta tsaparqan. 47María Magdalena y Josépa maman Maríam Jesústa mayman pampayanqanta rikäyarqan.

Currently Selected:

Marcos 15: qxn

Highlight

Copy

Compare