Marcos 13

Templuta juchutsiyänanpaq kanqanta Jesús willakunqan

Mateo 24.1-2; Lucas 21.5-6

1Templupa patiunpita yarquykaptinmi juk discïpulun Jesústa nirqan: <<¡Rabí, rikay! ¡Kuyakuypaq jatusaq rumikunawanmi templuta y ñawpanchö kaq cuartukunatapis shäritsiyashqa!>>

2Jesúsnam nirqan: <<Kay llapan rikäyanqaykitam jankat juchutsiyanqa. Manam ni juk rumillapis perqaraykar quëdanqatsu>>.

Manaraq kutimuptin imanö kananpaq Jesús ninqan

Mateo 24.3-14; Lucas 21.7-19

3Templupa tsimpan Olivos lömachö kikillankuna jamaykarmi Pedro, Santiago, Juan y Andrés Jesústa tapuyarqan: 4<<Taytay, willaykayämay. ¿Imaytan ninqaykinö kanqa? Tsaynö kananpaq ¿ima señaltan kanqa?>>

5Jesúsnam nirqan: <<Cuidädutaq pipis engañayäshunkiman. 6Atskaqmi shutïchö shamur niyanqa <noqam Cristo kä>. Tsaynö nirmi atskaq runakunata engañayanqa. 7Guërra kaptin y guërra kananpaq kanqanta musyarpis ama mantsakäyaytsu. Puntataqa tsaykunaraqmi kanqa. Tsaynö kaptinpis kay patsaqa manaraqmi ushakanqaraqtsu. 8Juk nacionmi jukaq nacionwan guërrata rurayanqa y jukaq marka runakunam juk marka runakunawan wañutsinakuyanqa. Tsaynöllam maytsaychö patsa kuyunqa. Muchuypis alläpam kanqa. Tsay ñakaykunaqa qallaykunanllaraqmi kanqa.

9<<Cuidädu kayanki. Chikiyäshurnikim prësu achkuskir autoridäkunaman apayäshunki. Sinagögakunachömi astayäshunki. Noqa raykum gobernadorkunaman y mandakuq reykunaman prësu apayäshunki. Tsaynöpam willakuynïta paykunatapis willayanki. 10Manaraq kay patsa ushakaptinmi maytsay nacionchö noqapaq willakuyanqa.

11<<Autoridäkunaman apayäshuptikipis ama llakikur niyankitsu <¿ima nishaqraq?> Tsay höram imata parlayänaykipaqpis Espíritu Santu tantiyatsiyäshunki. Manam kikikikuna yarpäyanqaykitatsu parlayanki, sinöqa Espíritu Santu tantiyatsiyäshunqaykillatam.#Mat. 10.17-20; Luc. 12.11-12. 12Noqa raykum wawqinta, tsurinta y taytantapis wañutsiyänanpaq autoridäkunaman entregayanqa. 13Noqa raykum pïmaypis chikiyäshunki. Tsaynö chikiyäshuptikipis wañuyanqaykiyaq creyikurqa salvakashqam kayanki.#Mat. 10.22.

Ñakaykuna kananpaq kanqanta Jesús tantiyatsinqan

Mateo 24.15-28; Lucas 21.20-24

14<<[Profëta Daniel qellqanqannöllam] Dios Yaya mana munanqanta templuchö rikäyanki.#Dan. 9.27; 11.31; 12.11. (Kay qellqanqäta liyiqkuna shumaq tantiyakuyätsun.)#13.14 Kay qellqanqäta liyiqkuna shumaq tantiyakuyätsun ninqanqa manam Jesucristo ninqantsu, sinöqa kay libruta qellqaq Marcos yapanqanmi. Tsaynö kaykaqta rikar Judea markakunachö täkuqkuna jirkakunapa qeshpir aywakuyätsun. 15Waji jananchö kaykaqkuna#13.15 Tsay witsaymi wajita qatayanqanpa rantin teranti jananman tsaqllaskir qetäwan lashtayaq. Tsay jananchömi awakuyaq, aqakuyaq y trïgutapis akrakuyaq. imankunatapis mana jipir qeshpirnin aywakuyätsun. 16Chakrachö kaykaqkunapis punchunkuna jipiq ama kutiyätsuntsu.#Luc. 17.31. 17¡Allaw, imanöraq ñakayanqa qeshyaq warmikuna y llullu wawayuq warmikuna! 18Dios Yayata mañakuyay qeshpiyanqayki junaqkuna tamya killachö mana kananpaq.

19<<Tsay witsaymi runakuna alläpa ñakayanqa. Dios Yaya kay patsata kamanqanpita manam ni imaypis tsaynöqa ñakayashqatsu. Tsaynöllam yapayqa imaypis manana tsaynö ñakayanqanatsu.#Dan. 12.1; Apoc. 7.14. 20Akranqan runakunata llakiparmi Dios Yaya tsay ñakay junaqkunata päsatsinqa. Mana päsatsiptinqa llapanmi wañur ushakäyanqa.

21<< <Dios Yaya kachamunqan Cristo kaychömi kaykan> niyäshuptiki ama creyiyankitsu. <Wakchömi kaykan> niyäshuptikipis ama cäsuyankitsu. 22Tsay witsaymi Cristo tukuqkuna y llulla profëtakuna yuriyämunqa. Runakunata creyitsiyänan raykum mantsakaypaq milagrukunatapis rurayanqa. Tsaynö rurarmi Dios Yaya akranqan runakunatapis engañayta munayanqa. 23Paykunata mana creyiyänaykipaq shumaq tantiyakuyay. Manaraq tsaynö kaptinmi musyayänaykipaq willayaq>>.

Jesús kay patsaman kutimunanpaq kanqan

Mateo 24.29-44; Lucas 21.25-33

24<<Alläpa ñakaykuna päsaskiptinmi rupaypis tutapaskinqa, killapis atsikyanqanatsu, 25qoyllurkunapis shikwayämunqa y ciëlupis tsuktsukyanqa.#Isa. 13.10; Joel 2.10, 31; 3.15; Apoc. 6.12-13. 26Tsaypitanam runakuna rikäyanqa Runapa Tsurin pukutay jananchö chipakyarraq alläpa poderösu kayninwan shamuykaqta.#Dan. 7.13; Apoc. 1.7. 27Tsaypitam angelninkunata kachamunqa akranqan kaqkunata maytsaypitapis qoriyämunanpaq.

28<<Hïgus jachata rikar tantiyayay. Raprankuna tseqllimuptinmi usya tiempu qallananpaqna kanqanta musyayanki. 29Tsaynöllam niyanqaqnö päsanqanta rikar musyayanki Runapa Tsurin kutimunanpaqna kanqanta. 30Rasun kaqtam niyaq: Kanan tiempu runakuna manaraq ushakäyaptinmi llapan niyanqaqkuna cumplinqa. 31Ciëluwan kay patsa ushakaptinpis noqa ninqäkunaqa manam ushakanqatsu.

32<<Runapa Tsurin imay junaq imay höra kutimunanpaq kanqanta manam ciëluchö angelkunapis ni Diospa Tsurinpis ni pipis musyayantsu.#Mat. 24.36. Tsaytaqa Taytällam musyan. 33¡Wiyaq wiyaqlla kayay! [Dios Yayata mañakuyay.] Manam musyayankitsu imay kutimunanpaq kanqanta>>.

34<<Shumaq tantiyakuyay. Juk runash wajinta cuidayänaq serviqninkunata dëjapuykur karupa aywakunaq. Punku kichaqtanash yätsinaq wiyaq wiyaqlla kaykänanpaq.#Luc. 12.36-38. 35Tsaymi alistakushqallana kayänayki. Wajiyuq#13.35 Wajiyuqpaq parlarmi kikinpaq Jesucristo parlan. imay kutimunanpaq kanqantapis manam musyayankitsu. Patsa qoyay, pullan paqas, gällu cantay höra o patsa waraytsuraq chämunqa. 36Mana yarpashqata chämurtaq puñukashqata tariyäshunkiman. 37Manam qamkunallatatsu nikäyaq, sinöqa llapan runakunatam. Tsaynö willaykäyaptiqqa wiyaq wiyaqlla kaykäyay>>.

Currently Selected:

Marcos 13: qxn

Highlight

Copy

Compare