Marcos 12

Chakra arrendaqkunaman iwalatsiypa Jesús yachatsikunqan

Mateo 21.33-46; Lucas 20.9-19

1Tsaypitanam iwalatsiypa yachatsikur Jesús nirqan: <<Juk runash chakranman üvata plantaskatsir#Isa. 5.1-2. entëru kuchunpa perqatsinaq. Üvata jaruyänanpaqshi pözuta ruratsinaq. Chakranta täpananpaqshi törritapis shäratsinaq. Llapanta ruraskatsirnash chakranta arrendakuskir juklä markapa aywakunaq.

2<<Cosëcha qallaykuptinnash juk serviqninta kachanaq üva chakra arriendunpita cobrakamunanpaq. 3Tsay servikuq chaykuptinshi alläpa maqaskir jinallanta qarquskiyänaq. 4Tsayshi chakrayuq runa jukaq serviqninta yapay kachanaq. Tsaytapis qayaparninshi [saqmar] umantapis pakiskiyänaq. 5Tsaypitash jukaq serviqninta kachaptinpis wañuskatsiyänaq. Tsaynöllash atskaqta kachaptinpis wakinta maqayänaq y wakintana wañuskatsiyänaq.

6<<Serviqninkuna manana kaptinshi kuyay tsurintana kachanaq. Tsay tsurinta kacharshi ninaq: <Tsurïtaqa respitayanqam>. 7Tsayshi tsurin aywaykaqta rikaskir chakra arrendaqkuna yachatsinakuyänaq: <Taqaymi kay chakrawan quëdanqa. Noqantsik chakranwan quëdanapaq wañuskatsishun>. 8Chaykuptinnash willanakuyanqannölla wañuskatsir üva chakrapita jukläman jitaskiyänaq>>.

9Tsaynö willakuskirnam Jesús nirqan: <<Tsay üva chakrayuq ¡imatatan tsay runakunata ruranqa! ¿Manatsuraq llapanta wañutsinqa? Tsaypitam chakrantapis juktana arrendakunqa. 10¿Manaku liyiyashkanki Dios Yayapa palabran ninqanta? Tsaychömi nin:

<< <Waji shäritsiqkuna <<kay rumi manam allitsu>> nir jitariyanqanmi maestru rumiman tikrashqa.

11Tsaynö kananpaqmi Dios Yaya permïtishqa.

Tsaypitam mantsakashqa kaykantsik> >>.#12.11 Tsay rumimanmi Jesucristo iwalatsikurqan. Tsaynömi tantiyatsirqan chikiyaptinpis llapanpitapis mas poderyuq kananpaq Dios Yaya churanqanta.#Sal. 118.22-23.

12Jesús tsaynö niptinmi tantiyayarqan paykunapa contrankuna parlaykanqanta.#12.12 Chakrayuqmi Dios Yaya. Chakrayuq kachanqan serviqninkunanam Dios Yayapa profëtankuna. Chakrayuqpa tsurinnam Jesucristo. Chakra arrendaqkunam mana alli runakuna y Jesucristupa contrankuna. Tsaymi prësu achkutsiyta munarpis runakunapita mantsakur aywakuyarqan.

Impuestuta pägayänanpaq tapuyanqan

Mateo 22.15-22; Lucas 20.20-26

13Tsaypitanam fariseukunata y Herodespa favornin shäriqkunata Jesús kaqman kachayarqan llutanta parlatsiyänanpaq. 14Chaykurnam niyarqan: <<Rabí, musyayämi rasun kaqllata yachatsikunqaykita. Manam runakuna aläbayäshunaykipaqtsu yachatsikunki, sinöqa Dios Yaya munanqannöllam. Romachö mandakuq Césarpaq ¿impuestuta pägashwanku o manaku?>>#12.14 Israel runakunam yarpäyarqan Romapaq impuestuta pägar Dios Yayapa contran kayanqanta. Tsaymi: <<Impuestuta pägashun>> Jesús niptinqa: <<Diospa contranmi parlan>> niyanman karqan. <<Ama pägashuntsu>> niptinqa Roma autoridäkuna rabyayanmanmi karqan.

15Llutanta parlatsiyänan rayku tapuyanqanta musyarmi Jesús nirqan: <<¿Imanirtan llutanta parlatsiyämayta munayanki? Mä qellayta rikätsiyämay>>.

16Tsaynö niptinmi qellayta apayarqan. Tsayta rikaykurmi Jesús tapurqan: <<Kay qellaychö ¿pipa reträtuntan kaykan? Tsaynölla ¿pipa shutintan qellqashqa kaykan?>>

Paykunanam niyarqan: <<Mandakuq Césarpam>>.

17Tsaymi Jesús nirqan: <<Césarpa kaqtaqa Césarta entregayay. Dios Yayapa kaqtaqa Dios Yayata entregayay>>.#12.17 Dios Yayapa kaqmi vïdantsik.

Tsaynö niptinmi tsay runakuna ni ima niyta puëdiyarqantsu.

Wañushqakuna kawayämunanpaq kanqanta tapuyanqan

Mateo 22.23-33; Lucas 20.27-40

18Tsaypitanam saduceukunapis Jesústa tapuq aywayarqan. Paykunaqa manam creyiyantsu wañuqkuna kawayämunanpaq kanqanta.#Hech. 23.8. Tsaymi Jesústa tapuyarqan: 19<<Rabí, Moisés qellqanqanchömi nin: <Warmiyuq runa tsurinnaq wañuptin wawqinmi llumtsuynin viüdawan churakanqa. Tsaynöpam wamrankuna kaptin tsay wañuq wawqinpa tsurinkunanö kayanqa>.#Deut. 25.5. 20Kanan niyäshayki. Juk kutish qanchis wawqikuna kayänaq. Mayor kaqshi warmiwan churaskir manaraq tsurin kaptin wañuskinaq. 21Tsayshi qepan kaq wawqinna tsay viüdawan churakänaq. Paypis tsurin manaraq kaptinshi wañuskinaq. Tsaypita mas qepan kaqnash tsay viüdawan churakänaq. Paypis tsurin manaraq kaptinshi wañuskinaq. 22Tsaynöllash llapan wawqikuna tsay viüdallawan churakäyänaq. Tsurinkuna manaraq kaptinshi llapanpis wañuskiyänaq. Tsaypitanash tsay viüdapis wañuskinaq. 23Wañushqakuna kawayämunqan junaqqa ¿mayqanpa warminraq kanqa, qanchis wawqiwan churakashqa kaykaptinqa?>>

24Jesúsnam nirqan: <<Qamkunam llutanta yarpäyanki. Manam Dios Yayapa palabranta ni Dios Yaya poderyuq kanqantapis tantiyayankitsu. 25Kawaskamurqa mananam ni pipis churakanqanatsu, sinöqa ciëluchö angelkunanöllanam kayanqa. 26Wañushqakuna kawayämunanpaq kanqanta ¿manaku Moisés qellqanqanta liyiyashkanki? Lunyaykaq shirakapitam Moisésta Dios Yaya nirqan: <Noqaqa Abrahampa, Isaacpa y Jacobpa Diosninmi kä>.#Éxo. 3.6. 27Dios Yayaqa manam wañushqakunapa Diosnintsu, sinöqa kawaqkunapa Diosninmi. Tsayta mana tantiyarmi llutanta yarpäyanki>>.

Mas cäsunapaq kaq mandamientu

Mateo 22.34-40; Lucas 10.25-28

28Jesús alli contestanqanta wiyarmi ley yachatsikuq runapis tapurqan: <<¿Mayqan mandamientutatan mas cäsushwan?>>

29Jesúsnam nirqan: <<Mas cäsukunapaq kaq mandamientum nin: <Israel runakuna, shumaq wiyakuyay. Diosnintsikqa jukllayllam. 30Dios Yayata kuyayanki llapan shonquykikunawan, llapan voluntänikikunawan, llapan yarpaynikikunawan y llapan kallpaykikunawan>. [Tsayqa mas cäsunapaq kaq mandamientum.]#Deut. 6.4-5. 31Tsaynöllam jukaq mandamientupis nin: <Kikiki kuyakunqaykinö runa majikita kuyanki>.#Lev. 19.18. Tsay ishkan mandamientukunata cumplinatam Dios Yaya munan>>.

32Tsaymi ley yachatsikuq runa nirqan: <<Rabí, rasun kaqtam ninki. Rasunpam jukllaylla Dios Yayaqa. Paypita masqa manam juk dios kantsu.#Deut. 4.35. 33Tsay ishkay mandamientukunata cumplinqantsikmi llapan sacrificiupitapis mas alli kaykan>>.#Ose. 6.6.

34Shumaq tantiyaykur niptinmi Jesús nirqan: <<Qamqa Diospa mandakuyninman yaykunaykipaqnam kaykanki>>.

Alli contestaptinmi pipis tapuyta valorarqannatsu.

Davidpitapis Cristo mas mandakuq kanqan

Mateo 22.41-46; Lucas 20.41-44

35Templupa patiunchö yachaykätsirmi runakunata Jesús nirqan: <<¿Imanirtan ley yachatsikuqkuna niyan Davidpa Tsurin Cristo kanqanta? 36Espíritu Santu tantiyatsiptinmi kikin Davidpis nirqan: <Mandamaqnïtam Dios Yaya nirqan: Derëcha kaq lädüman jamakamuy llapan chikishuqnikikunata podernikiman churamunqäyaq>.#Sal. 110.1.

37<<Tsaynö nikaptinqa ¿imanöpatan Cristuqa Davidpa Tsurin kanman kikin Davidpis mandaqnin kanqanta nikaptinqa?>>#12.37 Cristuqa manam David casta kanqantatsu nëgarqan, sinöqa Davidpita mas poderyuq kanqantam nirqan.

Jesús tsaynö yachatsikuptinmi runakuna kushikuyarqan.

Ley yachatsikuqkunawan fariseukuna mana alli ruraq kayanqanta Jesús ninqan

Mateo 23.1-12; Lucas 20.45-47

38Tsaypitanam Jesús nirqan: <<Cuidädu ley yachatsikuqkunanö kayankiman. Paykunaqa allish tukurmi chaki puntanyaq shumaq llatapashqa puriyan. Pläzakunachöpis saludar respitayänantam munayan. 39Sinagögakunachöpis punta puntachöraqmi jamakuyan. Mikuyänanpaq qayatsiyaptinpis mësamanraqmi jamayan. 40Viüdakunapa imantapis qechuyan. Tsaynöllam santu tukurnin unayyaq Dios Yayata mañakuyan. Tsaynö kayanqanpitam Dios Yaya mana llakipaypa masraq castiganqa>>.

Waktsa viüda ofrendata churanqan

Lucas 21.1-4

41Tsaypitanam templuchö ofrenda wiñäyänan cäja frentinchö Jesús jamaykar rikarqan runakuna ofrendata wiñäyaqta. Tsaynöllam rikarqan rïcu runakuna maytsika qellayta wiñäyaqta. 42Tsayman chaykurmi juk waktsa viüdapis ishkay centävullata wiñarqan. 43Tsayta rikarmi discïpulunkunata qayaykur Jesús nirqan: <<Rasun kaqtam niyaq: Kay waktsa viüdam llapanpitapis mas atskata wiñashqa. 44Wakin kaqkunaqa sobraqllatam wiñäyashqa. Peru kay viüdam sïqa tsaylla rantipakunanpaq kaykaptinpis llapanta wiñashqa>>.

Currently Selected:

Marcos 12: qxn

Highlight

Copy

Compare