Popular Bible Verses from Marcos 13

Share

Noqa raykum pïmaypis chikiyäshunki. Tsaynö chikiyäshuptikipis wañuyanqaykiyaq creyikurqa salvakashqam kayanki.

¡Wiyaq wiyaqlla kayay! [Dios Yayata mañakuyay.] Manam musyayankitsu imay kutimunanpaq kanqanta>>.

<<Autoridäkunaman apayäshuptikipis ama llakikur niyankitsu <¿ima nishaqraq?> Tsay höram imata parlayänaykipaqpis Espíritu Santu tantiyatsiyäshunki. Manam kikikikuna yarpäyanqaykitatsu parlayanki, sinöqa Espíritu Santu tantiyatsiyäshunqaykillatam.

Ciëluwan kay patsa ushakaptinpis noqa ninqäkunaqa manam ushakanqatsu.

<<Runapa Tsurin imay junaq imay höra kutimunanpaq kanqanta manam ciëluchö angelkunapis ni Diospa Tsurinpis ni pipis musyayantsu. Tsaytaqa Taytällam musyan.

Guërra kaptin y guërra kananpaq kanqanta musyarpis ama mantsakäyaytsu. Puntataqa tsaykunaraqmi kanqa. Tsaynö kaptinpis kay patsaqa manaraqmi ushakanqaraqtsu.

Tsaymi alistakushqallana kayänayki. Wajiyuq imay kutimunanpaq kanqantapis manam musyayankitsu. Patsa qoyay, pullan paqas, gällu cantay höra o patsa waraytsuraq chämunqa. Mana yarpashqata chämurtaq puñukashqata tariyäshunkiman. Manam qamkunallatatsu nikäyaq, sinöqa llapan runakunatam. Tsaynö willaykäyaptiqqa wiyaq wiyaqlla kaykäyay>>.

Juk nacionmi jukaq nacionwan guërrata rurayanqa y jukaq marka runakunam juk marka runakunawan wañutsinakuyanqa. Tsaynöllam maytsaychö patsa kuyunqa. Muchuypis alläpam kanqa. Tsay ñakaykunaqa qallaykunanllaraqmi kanqa.

Manaraq kay patsa ushakaptinmi maytsay nacionchö noqapaq willakuyanqa.

Atskaqmi shutïchö shamur niyanqa <noqam Cristo kä>. Tsaynö nirmi atskaq runakunata engañayanqa.

<<Cuidädu kayanki. Chikiyäshurnikim prësu achkuskir autoridäkunaman apayäshunki. Sinagögakunachömi astayäshunki. Noqa raykum gobernadorkunaman y mandakuq reykunaman prësu apayäshunki. Tsaynöpam willakuynïta paykunatapis willayanki.

Tsay witsaymi Cristo tukuqkuna y llulla profëtakuna yuriyämunqa. Runakunata creyitsiyänan raykum mantsakaypaq milagrukunatapis rurayanqa. Tsaynö rurarmi Dios Yaya akranqan runakunatapis engañayta munayanqa.

<<Alläpa ñakaykuna päsaskiptinmi rupaypis tutapaskinqa, killapis atsikyanqanatsu, qoyllurkunapis shikwayämunqa y ciëlupis tsuktsukyanqa.