Marcos 11

Jerusalénman Jesús yaykunqan

Mateo 21.1-11; Lucas 19.28-40; Juan 12.12-19

1Jerusalénman Jesús aywarmi Olivos lömachö Betfagé y Betania markakunaman chäyarqan. Tsaypitam ishkaq discïpulunkunata mandar 2nirqan: <<Taqay markaman aywayay. Chaykurmi pipis manaraq montashqa mallwa ashnu wataraykaqta tariyanki. Tsay ashnuta paskaskir apayämuy. 3Pipis <¿imanirtan ashnuta paskaykäyanki?> niyäshuptikiqa <Señor Jesúsmi wanan. Sasllam kutitsiyämushaq> niyanki>>.

4Discïpulunkuna aywarmi tariyarqan waji punkuchö mallwa ashnu wataraykaqta. Tsay wajiqa näni kuchunchömi karqan. Paskaykäyaptinmi 5tsaychö kaykaq runakuna tapuyarqan: <<¿Imanirtan ashnuta paskaykäyanki?>>

6Discïpulukuna Jesús yachatsinqannölla niyaptinmi <<tsaypunqa apayay ari>> niyarqan.

7Ashnuta chaykatsir punchunkunata karunarkuyaptinmi Jesús montarqan. 8Montashqa aywaptinmi maytsikaq runakuna punchunkunata jakunkunata näniman mashtar Jesústa kushishqa chaskiyarqan. Wakin kaqnam palmakunapa rämankunata pakiskir näniman mashtayarqan. 9Tsaymi puntanta y qepanta aywaqkuna kushikur niyarqan: <<¡Hosana!#11.9 Israel runakunam Hosana niyarqan Dios Yayata alabar. ¡Dios Yayapa shutinchö shamuq runa alabashqa kaykullätsun! 10¡Paymi unay aylluntsik Davidnö mandamaqnintsik rey kananpaq shamuykan! ¡Ciëluchöpis alabashqa kaykullätsun!>>

11Jerusalénman chaykurmi templupa patiunman Jesús aywarqan. Tsaychö rikapakuskirmi tardina kaptin chunka ishkay discïpulunkunawan Betania markaman kutiyarqan.

Hïguspa yuranta Jesús tsakitsinqan

Mateo 21.18-19

12Waränin junaq Betaniapita Jerusalénman Jesús kutiykarmi mallaqarqan. 13Tsaymi hïguspa yuranta raprayuqtana karupita rikaykur wayuyninta ashiq aywarqan. Ashirpis wayunanpaq tiempun manaraq kaptinmi rapranllata tarirqan. 14Tsaymi nirqan: <<¡Kananpitaqa manam ni imaypis wayunkinatsu!>>

Tsaynö ninqantam discïpulunkuna wiyayarqan.

Templuchö rantikuqkunata Jesús qarqunqan

Mateo 21.12-17; Lucas 19.45-48; Juan 2.13-22

15Jerusalénman chaykurnam templupa patiunman yaykuskir rantikuqkunata y rantipakuqkunatapis Jesús qarqurqan. Tsaynöllam qellay trukatsiqkunapa mësankunatapis#11.15 Jesús kawanqan witsaymi Roma runakunapa qellayninta Israel runakuna üsayaq imallatapis rantiyänanpaq. Peru Dios Yayapaq ofrendata apayänanpaqmi sïqa templuman apananpaq kaq qellaytaraq trukatsiyaq. y paluma rantikuqkunapa cajonninkunatapis jitarikurqan. 16Tsaynöllam runakunata amatsarqan templupa patiunpa ni imatapis mana päsatsiyänanpaq. 17Tsaypitanam nirqan: <<¿Manaku qellqashqa kaykan: <Wajïqa maytsay nación runakuna mañakayämänanpaqmi kanqa>?#Isa. 56.7. Tsaynö nikaptinmi qamkunaqa suwakunapa machayninman tikratsiyashkanki>>.#Jer. 7.11.

18Tsaynö ninqanta wiyarmi mandakuq sacerdötikuna y ley yachatsikuqkuna willanakuyarqan imaykanöpis Jesústa wañutsiyänanpaq. Peru Jesús yachatsikunqanta runakuna kushishqa chaskiyaptinmi paykunapita mantsakur prësu achkuyarqantsu. 19Patsa tutapaykaptinnam Jerusalénpita yarquskir Jesús aywakurqan.

Hïguspa yuran tsakishqatana tariyanqan

Mateo 21.20-22

20Waränin alliq Jerusalénman discïpulunkunawan Jesús kutirmi hïgus jacha jankat tsakishqana kaykaqta rikäyarqan. 21Jesús ninqanta yarpaskirmi Pedro nirqan: <<Rabí, <manam wayunkinatsu> ninqayki hïguspa yuranta rikay. Jankatmi tsakishqa>>.

22Jesúsnam nirqan: <<Dios Yayaman confiakuyay. 23Rasun kaqtam niyaq: Pipis llapan shonqunwan Dios Yayaman confiakur y ninqannö kananpaq kanqanta creyirqa taqay jirkata <kaypita lamarman ayway> niptinpis aywanqam.#Mat. 17.20; 1Cor. 13.2. 24Dios Yayata mañakurqa chaskiyänaykipaq kanqanta creyiyanki. Tsaynö creyir mañakuyanqaykitam chaskiyanki.

25<<Tsaynölla Dios Yayata mañakuyanqayki höra rabyatsishuqnikita manaraq perdonashqa karqa sas perdonayay. Tsaynö perdonayaptikim qamkunatapis ciëluchö Taytayki perdonayäshunki.#Mat. 6.14-15. 26[Runa majikikunata mana perdonayaptikiqa qamkunatapis jutsa rurayanqaykita manam perdonayäshunkitsu]>>.

Jesústa sacerdötikuna tapuyanqan

Mateo 21.23-27; Lucas 20.1-8

27Tsaypitanam discïpulunkunawan Jerusalénman Jesús chäyarqan. Templupa patiunchö Jesús puriykaptinmi mandakuq sacerdötikuna, ley yachatsikuqkuna y Israel mayor runakuna 28tapuyarqan: <<Qamqa ¿pipa poderninwantan rantikuqkunata qarqushkanki? ¿Pitan tsaynö qarqunaykipaq nishushkanki?>>

29Jesúsnam nirqan: <<Qamkunatapis mä tapuyäshayki. Tapuyanqaqta niyämaptikiqa noqapis willayäshaykim pipa poderninwan qarqunqäta. 30¿Pitan Juanta kachamushqa bautizananpaq? ¿Dios Yayaku o runakunallaku? Mä niyämay>>.

31Tsaynö tapuptinmi kikinkunapura ninakuyarqan: << <Dios Yayam kachamushqa> nishqaqa: <¿Imanirtan creyiyashkankitsu?> nimäshunmi. 32Tsaynöllam runakuna kachayämunqanta nishwantsu>>.

Juan profëta kanqanta llapan runakuna yarpäyaptinmi runakunapita mantsakur tsaynö niyarqan.

33Tsaymi Jesústa niyarqan: <<Manam musyayätsu pï kachamunqantapis>>.

Jesúsnam nirqan: <<Noqapis manam willayäshaykitsu pipa poderninwan rantikuqkunata qarqunqäta>>.

Currently Selected:

Marcos 11: qxn

Highlight

Copy

Compare