Marcos 1

Bautizaq Juan willakunqan

Mateo 3.1-12; Lucas 3.1-9, 15-17; Juan 1.19-28

1Dios Yayapa Tsurin Jesucristupa alli willakuyninta willakur qallananpaqmi 2profëta Isaías qellqarqan. Tsay qellqanqanchömi nin:

<<Nänita pitsaqnö runakuna alistakuyänanpaqmi willakuqnïta puntaykita kachashaq.#Mal. 3.1.

3Paymi desiertuchö qayakuypa willakur ninqa:

<Dios Yaya shamunanpaq nänita allitsayay.

Wiksu nänikunata derechayay> >>.#Isa. 40.3.

4Isaías qellqanqannöllam desiertuchö Juan bautizar runakunata nirqan: <<Dios Yaya perdonayäshunaykipaq jutsaykikunapita arrepentikur bautizakuyay>>.

5Juan willakunqanta wiyayänanpaqmi Judea provinciapita y Jerusalénpita llapan runakuna aywayarqan. Dios Yayata perdonta mañakuyaptinmi Jordán mayuchö Juan bautizarqan.

6Juanpa llatapanmi camëllupa aqtsanpita awashqa karqan. Wachukunpis camëllupa qaranpitam rurashqa karqan.#2Rey. 1.8. Chukllushkunatawan abëjapa mishkintam mikurqan.

7Willakurmi nirqan: <<Qepäta shamuq kaqmi noqapita mas poderyuq. Paypa llanqinpa watunta paskanällapaqpis manam välïtsu. 8Noqaqa yakullawanmi bautizayaq. Peru paymi sïqa Espíritu Santuwan bautizayäshunki>>.

Jesústa Juan bautizanqan

Mateo 3.13-17; Lucas 3.21-22

9Tsay witsaymi Galileachö Nazaretpita Juan bautizaykanqan kaqman Jesús aywarqan. Chaykuptinmi paytapis Jordán mayuchö Juan bautizarqan. 10Yakupita sharkurmi Jesús rikarqan ciëlu kichakaskiptin Espíritu Santu imayka palumanö payman uraykämuqta. 11Tsay höram ciëlupita Dios Yaya nimurqan: <<Qammi kuyay tsurï kanki. Qampitam kushikü>>.#Sal. 2.7; Isa. 42.1; Mat. 3.17; 12.18; Mar. 9.7; Luc. 3.22.

Jesústa Satanás tentayta munanqan

Mateo 4.1-11; Lucas 4.1-13

12Tsaypitanam Jesústa Espíritu Santu desiertuman pusharqan. 13Chusku chunka (40) junaq chucaru wätakuna kayanqanchö kaykaptinmi Satanás tentarqan. Angelkunam Jesústa yanapayarqan.

Galileachö alli willakuyta willakur Jesús qallanqan

Mateo 4.12-17; Lucas 4.14-15

14Juan carcelchö qaykuraykaptinmi Galileaman Jesús kutirqan. Tsaychömi Dios Yayapa mandakuyninpaq alli willakuyta willakur 15nirqan: <<¡Dios Yayam prometinqankunata cumplishqana! ¡Dios Yayapa mandakuynin chämushqanam! ¡Jutsaykikunapita arrepentikur Dios Yayapa alli willakuyninman creyikuyay!>>

Discïpulun kayänanpaq pescädu achkuqkunata Jesús qayanqan

Mateo 4.18-22; Lucas 5.1-11

16Galilea qocha kuchunpa aywaykarmi Simónta y wawqin Andrésta Jesús rikarqan. Paykunaqa pescädu achkuq karmi atarräyankunata yakuman jitaykäyarqan. 17Paykunatam Jesús nirqan: <<Qatiyämay. Noqam yachatsiyäshayki runakunata pescayänaykipaq>>.

18Tsaynö niptinmi atarräyankunata dëjaskir Jesúswan aywayarqan.

19Tsaypita mas washalätana aywaykarmi Zebedeupa tsurin Santiagutawan wawqin Juanta rikarqan. Paykunam büquinkunachö atarräyankunata allitsaykäyarqan. 20Paykunatapis qayaptinmi sas aywayarqan taytan Zebedeuta y yanapaqninkunata büquichö jaqiskir.

Supay löcuyätsinqan runata Jesús kutikätsinqan

Lucas 4.31-37

21Tsaypitanam Capernaúm markaman discïpulunkunawan Jesús aywayarqan. Jamay junaqchönam sinagögaman yaykuskir yachatsikur qallaykurqan. 22Yachatsikuptinmi runakuna alläpa mantsakäyarqan. Manam ley yachatsiq runakunanötsu yachatsirqan, sinöqa poderösu karmi shumaq yachatsikurqan.

23Tsay sinagögachömi supay löcuyätsinqan runa kaykarqan. Paymi qayaraypa 24nirqan: <<[¡Waauuu!] ¡Nazaretpita Jesús! ¡Imanankitan noqakunawan! ¿Ushakätsiyämaqnïku shamushkanki? ¡Noqam musyä Dios Yaya kachamunqan santu runa kanqaykita!>>

25Tsaymi supayta ollqutupar Jesús nirqan: <<¡Upälla kay runapita yarquy!>>

26Tsaynö niptinmi tsay runata tsapiskir supay alläpa qayarar aywarqan. 27Tsayta rikarmi juknin juknin mantsakashqa ninakuyarqan: <<¡Imatanatan rikantsik! ¡Poderösu kayninwan piñapaptinmi supaykunapis cäsurnin aywayan! ¡Pay yachatsikunqannöqa manam ni pipis yachatsikuntsu!>>

28Supayta qarqunqanta musyaskirmi entëru Galileachö Jesús poderyuq kanqanta parlayaq.

Pedrupa suegranta Jesús kutikätsinqan

Mateo 8.14-15; Lucas 4.38-39

29 Sinagögapita Jesús yarquskirmi Santiagutawan Juanta pusharkur Simónpa y Andréspa wajinman aywayarqan. 30Chaykuyaptinmi Simónpa suegran fiebriwan antsa ujuraykanqanta willayarqan. 31Tsaymi qeshyaykanqan kaqman Jesús yaykuskir makipita sharkatsiptin jina höra kutikaskirqan. Kutikaskirnam paykunata mikuyta qararqan.

Atskaq qeshyaqyashakunata Jesús kutikätsinqan

Mateo 8.16-17; Lucas 4.40-41

32Patsa qoyaykaptinnam#1.32 Wakin runakunaqa patsa tsakaykaptinnam niyan. llapan qeshyaqyashakunata y supaykuna ñakatsinqan runakunatapis Jesúsman apayämurqan. 33Tsay markachö llapan runakunam Jesús kaykanqan waji punkuman qorikäyarqan. 34Tsaychömi tukuyläya qeshyaywan qeshyaykaqkunata Jesús kutikätsirqan. Tsaynöllam atskaq runakunapita supaykunatapis qarqurqan. Pï kanqanta supaykuna musyayaptinmi mana parlayänanpaq Jesús ollqutuparqan.

Galileachö willakur Jesús purinqan

Lucas 4.42-44

35Waräninnam Dios Yayata mañakunanpaq tsaka tsakalla tsunyaman Jesús aywakurqan. 36Tsaymi Jesústa watukaskir Simón y paqtan kaykaqkuna ashir aywayarqan. 37Tariskirmi niyarqan: <<Taytay, llapanmi ashiyäshunki>>.

38Jesúsnam nirqan: <<Dios Yayapa willakuyninta willakuq wakin markakunamanpis aywashun. Tsaypaqmi shamushkä>>.

39Tsaymi entëru Galileapa Jesús purirqan sinagögakunachö willakur y supaykunata runakunapita qarqur.#Mat. 4.23; 9.35.

Leprawan qeshyaykaqta Jesús kutikätsinqan

Lucas 5.12-16

40Jukpunnam leprawan qeshyaykaq runa Jesúspa puntanman qonqurikuykur nirqan: <<Taytay, voluntäniki kaptinqa kutikaykatsillämay>>.

41Tsaynö rugakuptinmi llakiparnin Jesús yataykur nirqan: <<Kutikashqa kanaykitam munä>>.

42Tsaynö niptinmi jina höra leprawan qeshyaykanqanpita kutikaskirqan. 43Aywakunanpaq niskirmi Jesús albertirqan: 44<<Kutikätsinqaqta ama pitapis willankitsu. Masbien kutikanqaykita rikäshunaykipaq sacerdötiman ayway. Tsaypita Moisés qellqanqanchö ninqannölla purificäkunaykipaq ofrendaykita templuman apay. Tsaynöpam kutikanqaykita musyayanqa>>.#Lev. 14.1-32.

45Tsaynö nikaptinmi tsay runaqa Jesús kutikätsinqanta pïmaytapis willakurqan. Tsaymi markamanpis Jesús yaykurqannatsu, sinöqa desiertullachömi quëdakurqan. Tsaymanpis maytsaypitam runakuna aywayaq.

Currently Selected:

Marcos 1: qxn

Highlight

Copy

Compare