Marcos 2

Puriyta mana puëdiq runata Jesús kutikätsinqan

Mateo 9.1-8; Lucas 5.17-26

1Tsaypita juk ishkay junaqtanam Capernaúmman Jesús kutirqan. Tsaychö kaykanqanta musyaskirmi 2kaykanqan wajiman maytsikaq qorikäyarqan. Waji rurinchö alläpa kichki kaptinmi punkuchöpis runakuna junta kayarqan. Dios Yayapa willakuyninta Jesús yachatsikuykaptinmi 3mana puriyta puëdiq runata wintushqa chuskuq runakuna chätsiyarqan. 4Maytsikaq runakuna kichki kayaptinmi punkupa yaykatsiyta puëdiyarqantsu. Tsaymi waji jananman lätarkatsir qatashqata kichaskir tsakrankantinta Jesúspa puntanman bäjatsiyarqan. 5Tsay runakuna payman creyikuyanqanta musyarmi qeshyaykaq runata Jesús nirqan: <<Hïju, llapan jutsaykipitam perdonashqana kanki>>.

6Tsaynam ley yachatsikuqkuna yarpachakur niyarqan: 7<<¿Imanirtan kay runa tsaynö parlan? ¡Tsaynö nirqa Dios tukuykanmi! Dios Yayallam jutsa ruraqkunataqa perdonan>>.

8Tsaynö yarpäyanqanta musyarmi Jesús nirqan: <<¿Imanirtan tsaynö yarpäyanki? 9¿Mayqantan mas aja? ¿Runapa jutsankunata perdonayku? ¿O qeshyaykaq runata kutikätsiyku? 10Runapa Tsurinmi kay patsachö runakunata perdonananpaq poderyuq kaykan. Tsaytam kanan musyayanki>>.

Tsaypitam mana puriyta puëdiq runata nirqan: 11<<¡Shäriy! Tsakrankaykita apakurkur wajikipa kutikuy>>.

12Tsaynö niptinmi jina höra sharkur tsakrankanta apakurkur kutikashqana aywakurqan. Tsayta rikaykurmi runakuna alläpa mantsakashqa Dios Yayata alabar niyarqan: <<¡Kay runa kutikätsinqantanöqa manam ni imaypis rikashkantsiktsu!>>

Discïpulun kananpaq Levíta Jesús qayanqan

Mateo 9.9-13; Lucas 5.27-32

13Tsaypitanam Galilea qocha kuchunman Jesús kutirqan. Pay kaykanqanman atskaq runakuna qorikäyaptinmi yachatsirqan. 14Tsaypita aywarmi Alfeupa tsurin Leví#2.14 Levípa jukaq shutinmi Mateo karqan. impuestuta cobrar jamaykaqta Jesús rikarqan. Paytam nirqan: <<Qatimay>>.

Tsaynö niptinmi Jesúswan Leví aywarqan.

15Tsaypitanam wajinchö mikuyänanpaq Jesústa Leví qayatsirqan. Tsaychömi impuestu cobraqkuna y jutsasapa runakunapis Jesúswan y discïpulunkunawan paqta mikuyarqan. (Jesústam atskaq impuestu cobraqkunawan jutsasapa runakunapis qatiräyarqan.) 16Tsayta rikarmi ley yachatsikuq fariseukuna Jesúspa discïpulunkunata tapuyarqan: <<¿Imanirtan impuestu cobraqkunawan y jutsasapa runakunawan Jesús mikuyan?>>

17Tsaynö niyanqanta wiyarmi Jesús nirqan: <<Sänu kaqkunaqa manam mëdicuta wanayantsu, sinöqa, qeshyaykaqkunallam. Noqaqa manam jutsannaq runakunamantsu shamushkä, sinöqa jutsasapa runakunamanmi>>.

Yachatsikuynin mushuq kanqanta Jesús tantiyatsinqan

Mateo 9.14-17; Lucas 5.33-39

18Juk kutim Juanpa discïpulunkunawan fariseukuna ayunaykäyarqan. Tsaymi runakuna Jesústa tapuyarqan: <<Juanpa discïpulunkuna y fariseukunapa discïpulunkunam imaypis ayunayan. Peru qampa discïpuluykikunaqa ¿imanirtan ayunayantsu?>>

19Jesúsnam nirqan: <<Casaraq jöven kaykaptinqa casaray fiestaman qayatsinqan kaqkuna ¿ayunayanmantsuraq? 20Peru casaraq jövinta wañuskatsiyaptinmi sïqa ayunayanqa>>.

21<<Manam ni pipis makwa llatapata mushuq träpuwan remendantsu. Mushuq träpuqa qentirmi makwa llatapata mas rachitsin. 22Tsaynöllam ni pipis tsayraq rurashqa vïnuta makwa puyñuman#2.22a Wakin runakunaqa uylluman niyan. wiñantsu. Wiñaptinqa vïnu poqurmi pakitsin. Tsaymi vïnupis y puyñupis ushakanqa. Tsayraq rurashqa vïnutaqa mushuq puyñumanmi wiñantsik>>.#2.22b Makwa llatapata y makwa puyñutam Jesucristo iwalatsirqan runakunapa unay costumbrinkunaman. Mushuq träputa y tsayraq rurashqa vïnutanam Jesucristo iwalatsirqan kikinpa yachatsikuyninman. Tsaynömi Jesucristo nirqan paypa yachatsikuynin mushuq kar unay costumbrinkunaman mana iwalanqanta.

Jamay junaqpaq Jesús poderyuq kanqan

Mateo 12.1-8; Lucas 6.1-5

23Jamay junaqchömi trïgu kuchunpa discïpulunkunawan Jesús päsaykäyarqan. Tsaypa päsarmi discïpulunkuna trïguta kiptun kiptun uchuyarqan.#Deut. 23.25. 24Tsaymi fariseukuna niyarqan: <<Maski rikay. ¿Imanirtan jamay junaq kaykaptin leynintsikta mana cäsur discïpuluykikuna trïguta pallaykäyan?>>

25Jesúsnam nirqan: <<¿Manaku imaypis liyiyashkanki yanapaqninkunawan mallaqar David imata ruranqanta? 26Mas mandakuq sacerdöti Abiatar kanqan witsayshi Dios Yayapa wajinman yaykuskir Diospaq churayanqan tantata David mikuskinaq. Tsaynöllash yanapaqninkunatapis qaranaq.#1Sam. 21.1-6. Tsay tantaqa manam David ni paqtan runakuna mikuyänanpaqtsu karqan, sinöqa sacerdötikunalla mikuyänanpaqmi>>.#Lev. 24.9.

27Tsaypitanam Jesús nirqan: <<Manam jamay junaq raykutsu runata Dios Yaya kamarqan, sinöqa runakuna raykum jamay junaqta kamarqan. 28Tsaymi Runapa Tsurinqa jamay junaqpaqpis poderyuq>>.

Currently Selected:

Marcos 2: qxn

Highlight

Copy

Compare