Mateo 7

Pitapis mana juzganapaq Jesús yachatsikunqan

Lucas 6.37-38, 41-42

1<<Dios Yaya mana juzgayäshunaykipaq runa majikikunata ama juzgayaytsu. 2Runa majikikunata juzgayaptikiqa qamkunatapis Dios Yayam juzgayäshunki. Runa majikikunata imanöpis yanapayanqaykimanmi qamkunatapis Dios Yaya yanapayäshunki. 3Ñawikikunachö jatun qeru jatiraykaptinqa ¿imanirtan runa majikikunapa ñawinchö ichiklla shumpa kaykaqta rikapäyanki? 4Ñawikikunachö jatun qeru jatiraykaptinqa ¿imanöraq niyankiman: <Ñawikipita shumpata jipiskapushayki>? 5¡Allish tukuq runakuna! Puntataqa ñawikikunachö qerutaraq jipiyay. Tsayraqmi shumaq rikäyanki runa majikipa ñawinpita shumpata jipiyänaykipaq.#7.5 Kay textuchömi runa majintsikpa jutsankunata ñawinchö shumpaman iwalatsin. Kikintsikpa jutsantsiktam ñawintsikchö qeruman iwalatsin. Ñawintsikpita qeruta jipinapaq nirqa jutsantsikkunata dëjanapaqmi nin. Tsaynöpam tantiyatsimantsik jukta juzganantsikpa rantin kikintsikpa jutsantsikta dëjanapaq.

6<<Sagrädu kaqtaqa allqukunata ama jitapuyaytsu. Perlasnikitaqa kuchikunata ama jitapuyaytsu. Jitapuyaptikiqa kuchikunam jaruyanqa y allqukunam kanir ushayäshunki.#7.6 Sagrädu kaqkuna y perlaskunaqa Dios Yayapa willakuyninmi. Kuchikuna y allqukunaqa Diospa contrankunam.

Mana ajayaypa Dios Yayata mañakunapaq Jesús yachatsikunqan

Lucas 11.9-13

7<<Mañakuyaptikiqa Dios Yayam qarayäshunki. Ashirqa tariyankim. Punkuta takakuyaptikiqa kichapuyäshunkim. 8Mañakuq kaqqa chaskinmi. Ashiq kaqqa tarinmi.#Deut. 4.29; 2Crón. 15.2-4; Jer. 29.13. Punkuta takakuq kaqtaqa kichapunmi.

9<<Mayqaykitapis wamraykikuna tantata mañakuyäshuptiki ¿rumitatsuraq aptarkatsiyankiman? 10Pescäduta mañakuyäshuptiki ¿culebratatsuraq qaraykuyankiman? 11Qamkuna mana alli ruraq kaykarpis wamraykikunata alli kaqllata qaraykäyaptikiqa ¿manatsuraq ciëluchö Taytaykipis mañakuq kaqtaqa alli kaqkunata alistapanqa?#Juan 14.13-14; 15.7, 16; 16.23-24; 1Juan 3.21-22; 5.14-15.

Runa majintsikta alli rikänapaq Jesús yachatsikunqan

Lucas 6.31

12<<Imanömi runa majiki rikäyäshunaykita munayanki, tsaynölla qamkunapis runa majikikunata alli rikäyanki.#Luc. 6.31. Tsaynö kawanapaqmi Moisés qellqanqanchö y profëtakuna qellqayanqanchöpis nin.

Kichki punkuman Jesús iwalatsinqan

Lucas 13.24

13<<Kichki punkupa yaykuyay. Anchu punkupa yaykuqkunaqa jatun nänipam infiernuman aywayan. Atskaqmi tsay punkupa yaykuyan. 14Peru kichki punkupa yaykuqkunam sïqa llanu nänipa gloriaman aywayan. Wallkaqllam tsay punkupa yaykuyan.

Llutan yachatsikuqkuna pï kayanqan

Lucas 6.43-44

15<<Cuidädutaq profëta tukuqkunata chaskiyankiman. Paykunaqa üshanö shamurpis wañutsikuq löbunömi kayan. 16Jachata wayuyninpita reqinqantsiknömi runakunatapis imanö kawayanqanta rikar reqintsik. Manam kashakunapitatsu üvata pallantsik ni cardonkunapitatsu hïgustapis qorintsik. 17Alli jachaqa allitam wayun. Peru mana alli jacham sïqa mana allita wayun. 18Tsaynöllam alli wayuq jachaqa mana allitaqa wayuntsu. Mana alli wayuq jachapis manam allitaqa wayuntsu. 19Tsay jachataqa walluskirmi ninaman jitaykuntsik.#Mat. 3.10; Luc. 3.9. 20Jachata wayuyninpita reqinqantsiknömi runakunatapis imanö kawayanqanta rikar reqintsik.#Mat. 12.33.

Dios Yayata cäsuqkunalla puntanman chäyänanpaq Jesús yachatsikunqan

Lucas 13.25-27

21<<Manam <Señor, Señor> niyämanqanllapitatsu ciëluchö kaykaq Taytäpa Mandakuyninman yaykuyanqa, sinöqa pay munanqannö kawaqkunallam. 22Día del juiciuchömi atskaq niyämanqa: <Señor, Señor, willakuynikitam willakurqä. Tsaynöllam qampa shutikichö supaykunatapis qarqurqä. Tsaynöllam qampa shutikichö milagrukunatapis rurarqä>. 23Tsaynö niyämaptinmi nishaq: <Qamkunata manam reqiyaqtsu. ¡Jutsasapa runakuna, puntäpita witikuyay!>#Sal. 6.8.

Cäsukuq y mana cäsukuq runakuna imanö kayanqan

Lucas 6.47-49

24<<Ninqäkunata cäsuq runaqa qaqa jananchö wajita shäritsiq runanömi kaykan. 25Tsay wajiqa alläpa tamyaptin, mayu jeqar jaytaptin y alläpa wayraptinpis manam juchunqatsu.

26<<Peru ninqäkunata mana cäsuq runam sïqa arenïlla jananllachö wajita shäritsiq runanö kaykan. 27Tsay wajiqa alläpa tamyaptin, mayu jeqar jaytaptin y alläpa wayraptinmi juchunqa. Tsaynöllam mana cäsukuq runa alläpa llakipaypaq kanqa>>.

28Jesús tsaynö yachatsikuptinmi runakuna alläpa mantsakäyarqan. 29Manam ley yachatsiq runakunanötsu yachatsirqan, sinöqa poderösu karmi shumaq yachatsikurqan.#Mar. 1.22; Luc. 4.32.

Currently Selected:

Mateo 7: qxn

Highlight

Copy

Compare