Mateo 6
6
Pitapis mana willar waktsakunata yanapanapaq Jesús yachatsikunqan
1<<Cuidädutaq runakuna rikäyäshunaykillapaq allikunata rurayankiman.#Mat. 23.5. Tsaynö rurayaptikiqa ciëluchö kaykaq Taytayki manam ni ima premiutapis qarayäshunkitsu.
2<<Waktsakunata yanapar orgullösu runakunanö ama aläbakuyankitsu. Paykunaqa cornëtata töcaqnöraqmi sinagögakunachö y cällikunachöpis yanapayanqanta willakuyan. Rasun kaqtam niyaq: Paykunapaqa runakuna aläbayanqanllam premiunkuna kanqa. 3Pitapis yanaparqa ama willakuyankitsu. 4Mana willakurlla yanapayaptikiqa Taytaykim llapanpa puntanchö premiuta qarayäshunki.
Dios Yayata mañakunapaq Jesús yachatsikunqan
Lucas 11.2-4
5<<Dios Yayata mañakur ama orgullösu runakunanöqa mañakuyankitsu.#Luc. 18.10-14. Paykunaqa runakuna rikäyänanllapaqmi sinagögakunachö y esquïnakunachöpis ichiykur Dios Yayata mañakuyan. Rasun kaqtam niyaq: Paykunapaqa runakuna aläbayanqanllam premiunkuna kanqa. 6Dios Yayata mañakurqa wajikikunaman yaykuskir punkuykikunata wichqarkur mañakuyanki. Pakayllapa mañakuyanqaykita rikarmi Taytayki [llapanpa puntanchö] premiuta qarayäshunki.
7<<Mana Israel runakunam tsay palabrallawan yapay yapay mañakuyan. Tsaynö mañakuyan Dios Yaya wiyananpaq kanqanta yarparmi. Qamkunaqa ama tsaynö mañakuyankitsu. 8Manaraq mañakuyaptikim Taytaykiqa imata wanayanqaykitapis musyaykan. 9Dios Yayata mañakur niyanki:
<< <Ciëluchö kaykaq Taytallä, shutiki respitashqa katsun.
10Kay patsachö mandakuq kanaykipaq shamuykullay.
Ciëluchö cäsuyäshunqaykinö kay patsachöpis cäsuykuyälläshuy.
11Waran waran mikuylläkuna qaraykayämay.#Prov. 30.8-9.
12Chikiyämaqkunata perdonayanqänö noqakunatapis perdonaykayällämay.
13Ama jutsa rurayman dëjaykayällämaytsu.
Tsaypa rantinqa mana allikunapita tsapaykayällämay.
[Qampa podernikichömi imaykapis kaykan.
Poderösum kanki.
Imayyaqpis alabashqa kaykullay. Amén.]> >>
14<<Runa majikita perdonayaptikim qamkunatapis ciëluchö Taytayki perdonayäshunki. 15Peru runa majikita mana perdonayaptikim sïqa qamkunatapis perdonayäshunkitsu.#Mar. 11.25-26.
Ayünupaq Jesús yachatsikunqan
16<<Ayunarqa ama orgullösu runakunanö kayankitsu. Paykunam runakuna rikäyänanllapaq upilakashqa puriyan. Rasun kaqtam niyaq: Paykunapaqa runakuna aläbayanqanllam premiunkuna kanqa. 17Qamkuna ayunarqa shumaq mayllakuyanki y ñaqtsakuyanki. 18Tsaynöpam ayunayanqaykita musyayanqatsu. Runakuna mana rikäyäshuptikipis llapanta rikaq Taytaykim rikaykäyäshunki. Paymi [llapanpa puntanchö] premiuta qarayäshunki.
Gloriaman riquëzata churanapaq Jesús yachatsikunqan
Lucas 12.33-34
19<<Kay patsachö riquëzata ama qoriyaytsu. Kay patsachö riquëzataqa puyum ushan, runam apan y ismurmi ushakan.#Stg. 5.2-3. 20Tsaypa rantin gloriaman riquëzata churayay.#6.20 Gloriaman riquëza churanqantsikqa imaykantsiktapis rantikuskir tsay qellaywan waktsakunata yanapanqantsikmi kaykan. Tsayta tantiyanaykipaq liyinki Luc. 12.33-34. Gloriachöqa manam puyu ushanqatsu, runapis apanqatsu ni ismunqatsu. 21Riquëzaykita churayanqaykimanmi shonquykipis yarparaykanqa.
Ñawintsik aktsinö kanqan
Lucas 11.34-36
22<<Ñawikikunam shonquykikunapaq aktsinö. Tsaymi ñawikikuna alli kaptin shonquykikunapis aktsichö kaykan. 23Peru ñawikikuna mana alli kaptinmi sïqa tutapaychö kayanki. Shonquykichö aktsi mana kaptinqa jankat tutapäpukushqam kayanki.#6.22-23 Tsaynö parlarmi Jesucristo nirqan: Dios Yayallata servirqa aktsichönömi alli kawayan. Peru tsaynö mana servirmi sïqa tutapäpukushqanö kawayan.
Rïcu kayllapaq mana yarpachakunapaq Jesús yachatsikunqan
Lucas 16.13
24<<Manam ni pipis ishkay patronta servintsu. Ishkay patronta servirqa jukaqta chikirmi jukaqta kuyan. Jukninta cäsukurmi jukaqtaqa cäsuntsu. Tsaynöllam rïcu kayllapaq yarpachakurqa Dios Yayata serviyta puëdiyankitsu.
Dios Yayaman creyikunapaq Jesús yachatsikunqan
Lucas 12.22-31
25<<Tsaynö kaykaptinqa ama yarpachakur niyaytsu: <¿Imanöraq kawashaq? ¿Imataraq mikushaq? ¿Imataraq upyashaq? ¿Imataraq shukukushaq?> nirqa. Manam mikuyllapaq ni llatapallapaq yarpachakunapaqtsu kaykantsik. 26Maski pishqukuna imanö kawayanqanta tantiyayay. Paykunaqa manam murukuyantsu, cosechayantsu ni churakuyantsu. Tsaynö kayaptinpis ciëluchö Taytaykim mikuyninkuna qaran. Dios Yayapaqqa pishqukunapitapis masmi väliyanki.
27<<Mayjina yarpachakurpis ¿piraq tamäñunpita masqa wiñanman? 28Tsaynö kaykaptinqa ¿imanirtan yarpachakuyanki alli llatapayuq kayänaykipaq? Maski waytakuna imanö wiñäyanqanta tantiyayay. Waytakunaqa manam arukuyantsu ni putskakuyantsu. 29Noqam niyaq: Waytakuna kuyakuypaq kayanqannöqa manam rey Salomónpa llatapankunapis kuyakuypaq karqantsu.#1Rey. 10.4-7; 2Crón. 9.3-6. 30Mana creyikuq janan shonqu runakuna, waray warantin waykashqa kananpaq kaptinpis qewakunata kuyakuypaq wiñaykätsirqa ¿manatsuraq qamkunatapis wanayanqaykita Dios Yaya alistapäyäshunki?
31<<Tsaynö kaykaptinqa ama yarpachakuyankitsu: <¿Imataraq mikushun? ¿Imataraq upyashun? ¿Imataraq shukukushun?> nirqa. 32Tsaynöqa llakikuyan Dios Yayaman mana creyikuq runakunallam. Ciëluchö Taytaykikunam imata wanayanqaykitapis musyaykan. 33Imaykapitapis mas puntataqa Dios Yayapa mandakuyninchö kawakuyänaykipaq y pay munanqannö kawakuyänaykipaq yarpachakuyay. Tsaynö kawayaptikim imata wanayanqaykitapis qarayäshunki. 34Waran waran imallapis yarpachakuyänaykipaq kaykaptinqa waray junaqpaq ama yarpachakuyaytsu.#Sal. 55.22; 1Ped. 5.7.
Currently Selected:
Mateo 6: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.