Mateo 27

Pilatuman Jesústa apayanqan

Marcos 15.1; Lucas 23.1-2; Juan 18.28-32

1Patsa waraykaptinnam mandakuq sacerdötikunawan Israel mayor runakuna Jesústa imanöpapis wañutsiyänanpaq willanakuyarqan. 2Willanakuskirnam Jesústa watarkur gobernador Pilatuman apayarqan.

Judas Iscariote jurkakunqan

Hechos 1.18-19

3Wañutsiyänanpaq kanqanta musyaskirmi Jesústa rantikuq Judas alläpa llakikurqan. Tsaymi mandakuq sacerdötikuna y Israel mayor runakuna qorikäyanqanman aywaykur chaskinqan kimsa chunka (30) qellayta kutitsir#Hech. 1.18-19. 4nirqan: <<Jutsannaq runata wañutsiyänaykipaq entregayarnikim jutsata rurashkä>>.

Paykunanam niyarqan: <<¡Noqakunata imatan importakayäman! ¡Imanöpis kakuy!>>

5Tsaynö niyaptinmi chaskinqan qellayta templuman jitaskir aywar jurkakurqan.

6Mandakuq sacerdötikunanam tsay qellayta qoriskir niyarqan: <<Kay qellayqa runapa yawarninpa chaninmi. Tsaynö kaykaptinqa ofrendakunaman ama tallushuntsu>>.

7Tsaymi willanakuskir tsay qellaywan manka ruraq runapa chakranta rantiyarqan juklä runakuna wañuptin tsayman pampayänanpaq. 8Tsaypitam kananyaqpis tsay chakrapa shutin Yawar Pampa. 9Chakrata tsaynö rantirmi profëta Jeremías qellqanqanta cumpliyarqan. Tsay qellqanqanchömi nin:

<<Paypa chanin ayka kananpaq Israel runakuna niyanqannöllam kimsa chunka (30) qellayta chaskiyarqan.

10Tsay qellaywanmi Dios Yaya nimanqannölla manka ruraq runapa chakranta rantiyarqan>>.#Jer. 32.6-9; Zac. 11.12-13.

Jesústa Pilato tapunqan

Marcos 15.2-5; Lucas 23.3-5; Juan 18.33-38

11Jesústa chaykatsiyaptinmi gobernador Pilato tapurqan: <<¿Rasunpaku Israel runakunapa mandakuqnin rey kanki?>>

Jesúsnam nirqan: <<Rasun kaqtam nikanki>>.

12Tsaychö mandakuq sacerdötikuna y Israel mayor runakuna Jesúspa contran imaykata niyaptinpis Jesús manam ni imata parlakurqantsu. 13Tsaymi Pilato tapurqan: <<¿Manaku ni imatapis ninki tsayläya contrayki nikäyaptin?>>

14Tsaynö niptinpis Jesús manam ni imata parlakurqantsu. Tsaymi Pilato mantsakashqa ni ima niyta puëdirqantsu.

Jesústa crucificäyänanpaq Pilato mandanqan

Marcos 15.6-15; Lucas 23.13-25; Juan 18.39—19.16

15Wata watam Pascuachö runakuna mañayanqan prësuta Pilato qarquq. 16Tsay watam pïmay chikinqan Barrabás shutiyuq runa prësu qaykurarqan. 17Tsayman runakuna qorikaskiyaptinmi Pilato tapurqan: <<¿Mayqan prësutatan qarqunäta munayanki? ¿Barrabástaku? ¿O Cristo ninqan Jesústaku?>>

18Pilatum musyarqanna Jesústa chikir payman apayanqanta.

19Pilato tsaychö juzgar jamaykaptinmi warmin willakatsir nirqan: <<Tsay runaqa jutsannaqmi. Paywan ama mëtikuytsu. Payta prësu achkuyanqanpitam kanan paqas alläpa mana allikunata sueñushkä>>.

20Peru mandakuq sacerdötikunawan Israel mayor runakunanam sïqa runakunata willapäyarqan Barrabásta qarquskir Jesústa wañutsinanpaq. 21Tsaymi <<¿mayqantatan qarqushaq?>> nir Pilato yapay tapuptin runakuna niyarqan: <<Barrabásta qarquy>>.

22Pilatunam nirqan: <<Tsaypunqa Cristo niyanqan Jesústa ¿imatatan rurashaq?>>

Tsaynam llapan niyarqan: <<¡Crucificay!>>

23Pilatunam tapurqan: <<¿Ima mana allitatan rurashqa?>>

Peru tsaynö niptinpis masraqmi qayaykachar niyarqan: <<¡Crucificay!>>

24Runakuna timpullyarraq qayaykachäyaptinmi ni imanakaytapis Pilato puëdirqantsu. Tsaymi yakuta apaskatsimur runakuna rikaykäyaptin makinta mayllakur#Deut. 21.6-9. nirqan: <<Kay runata wañutsiyaptiki manam jutsayuqtsu kä. Qamkuna imanöpis kakuyay>>.

25Tsaynö niptinmi runakuna niyarqan: <<Kay runa wañunqanpitam noqakunawan wamräkuna jutsayuq kayäshaq>>.

26Tsaynö niyaptinmi Barrabásta Pilato qarqurqan. Jesústanam alli astaykatsir crucificäyänanpaq soldädukunaman entregarqan.

Jesústa kasha corönata shukutsiyanqan

Marcos 15.16-20; Juan 19.2-3

27Tsaypitanam soldädukuna Jesústa apayarqan Pilatupa despächunman. Tsayman llapan tröpa#27.27 Tröpa complëtum soqta pachak (600) soldädukuna kayarqan. soldädukuna juntapuskirmi 28Jesúspa llatapanta llushtiskatsir puka cäpata shukutsiyarqan. 29Tsaynöllam kashapita awashqa corönata umanman shukutsiyarqan. Derëcha kaq makinmannam shoqushta aptatsiyarqan. Tsaypitam puntanman qonquriykur asipar niyarqan: <<¡Alabashqa katsun Israel runakunapa mandakuqnin rey!>>

30Tsaynöllam toqapurnin aptaranqan shoqushta qechuskir umachö garutiyarqan. 31Tsaynö asiparmi shukutsiyanqan cäpata llushtiskatsir kikinpa llatapanta shukutsiyarqan. Tsaypitanam crucificaq apayarqan.

Jesústa crucificäyanqan

Marcos 15.21-32; Lucas 23.26-43; Juan 19.17-27

32Crucificaq apaykäyanqanchömi Cirene nacionpita Simónwan tinkuyarqan. Paytam Jesús apaykanqan cruzta umrutsiyarqan.

33Tsaypitanam Jesústa chätsiyarqan Gólgota niyanqanman. Gólgota ninanqa Calavëra Sitiu ninanmi. 34Tsaychömi ayaq jachawan tallushqa vïnuta upyatsiyta munayaptinpis yawarkur upyayta munarqantsu.#27.34 Tsaynö upyatsiyta munayarqan alläpa nanayta Jesús mana sientinanpaqmi.

35Jesústa crucificaskirnam llatapanta mayqanpis apananpaq sortiyayarqan. [Tsaynö rurayänanpaqmi Dios Yayapa profëtan qellqanqanchö nin: <<Kikinkunapuram llatapäta rakipunakuyarqan. Llatapäta apayänanpaqmi sortiyayarqan>>.#Sal. 22.18.]

36Tsaypitanam täpar quëdayarqan. 37Imapita wañutsiyanqanta runakuna musyayänanpaqmi juk letrëruta cruzpa puntanman clävayarqan. Tsay letrëruchömi nirqan: <<Kay runam Israel runakunapa mandakuqnin rey Jesús>>.

38Jesústa crucificäyanqan lädunmanmi ishkay suwakunatapis crucificäyarqan, jukaqta derëcha lädunman y jukaqtana itsuq lädunman. 39Jesús crucificashqa kaykaqta rikarmi tsaypa päsaq runakuna asipäyarqan. Umankunatapis aywiparmi#Sal. 22.7; 109.25. 40niyarqan: <<Templuta juchuskatsir kimsa junaqllata shäritsinaykipaq nikarqa#Mat. 26.61; Juan 2.19. mä salvakuy. Diospa Tsurin karqa mä cruzpita bäjamuy>>.

41Tsaynöllam mandakuq sacerdötikuna, ley yachatsikuqkuna, [fariseukuna] y Israel mayor runakunapis Jesústa asipar niyarqan: 42<<Wakin kaqta salvarpis kikinqa manam salvakuyta puëdintsu. Israel runakunapa mandakuqnin rey karqa mä cruzpita bäjamutsun. Bäjamuptinqa creyishunmi. 43Payqa <Dios Yayapa Tsurin kä> nirmi Diosman confiakushqa. Rasunpa Tsurin kaptinqa Dios Yaya llakiparmi cruzpita jipinman>>.#Sal. 22.8.

44Tsaynöllam lädunchö crucificashqa kaykaq suwakunapis burlakuyarqan.

Jesús wañunqan

Marcos 15.33-41; Lucas 23.44-49; Juan 19.28-30

45Pullan junaqpita las tresyaqmi patsa tutapaskirqan. 46Tsay höram Jesús jinchi nirqan: <<Elí, Elí, ¿lama sabactani?>>

Tsay ninanqa <<Dios Yaya, Dios Yaya, ¿imanirtan dëjamashkanki?>> ninanmi.#Sal. 22.1.

47Tsaynö ninqanta wiyaykurmi tsaychö kaykaq wakin runakuna niyarqan: <<Profëta Elíastam qayaykan>>.

48Tsaynö niyaptinmi juk runa sas aywar puchquq vïnuman esponjata tullpurkur shoqushpa puntanman watarqan. Tsayta Jesústa shoqutsiyta munaptinmi#Sal. 69.21. 49runakuna niyarqan: <<Ama shoqutsiytsu. Mä rikäshun cruzpita jipinanpaq Elías shamunqakush>>.

50Tsaypitanam yapay jinchi qayaraskir Jesús wañuskirqan. 51Tsay höram templu rurinchö tsaparaq cortïna#Éxo. 26.31-33; 2Crón. 3.14. janaqpita urayaq rachiskirqan. Patsa alläpa kuyuptinmi qaqakunapis partikarqan. 52Sepultürakuna kichakaptinmi Dios Yaya munanqannö kawaqkunapis kawayämurqan. 53Jesús kawamuptinmi pamparäyanqanpita yarqamur sagrädu Jerusalén markaman yaykuyarqan. Atskaq runakunam kawamuqta rikäyarqan.

54Jesústa täpaq capitanwan soldädunkunam patsa kuyuqta sientir y llapan päsanqankunata rikar alläpa mantsakar niyarqan: <<¡Rasunpam kay runaqa Diospa Tsurin kashqa!>>

55Tsaychömi atskaq warmikuna karullapita rikaraykäyarqan. Tsay warmikunam Galileapita Jesústa yanapar aywayarqan. 56Paykunawanmi kaykarqan María Magdalena, Santiagupa y Josépa maman María y Zebedeupa warminpis.#Luc. 8.2-3.

Jesústa pampayanqan

Marcos 15.42-47; Lucas 23.50-56; Juan 19.38-42

57Patsa qoyaykaptinnam#27.57 Wakin runakunaqa patsa tsakaykaptinnam niyan. Arimateapita juk rïcu runa José shutiyuq Pilato kaqman charqan. Paypis Jesúspa discïpulunmi karqan. 58Chaykurmi Pilatuta rugakur nirqan: <<Jesúspa ayanta pampanäpaq dëjapaykallämay>>.

Tsaynö rugaptinmi Pilato soldädukunata nirqan Jesúspa ayanta dëjapuyänanpaq. 59Dëjapuykuyaptinmi lïnupita rurashqa limpiu säbanaswan piturkur 60qaqachö tsayraq uchkushqa sepultüraman pamparqan. Tsaypitanam jatun rumiwan sepultürapa punkunta tsapaskir aywakurqan. 61Tsaychömi María Magdalena y jukaq Maríapis jamaykäyarqan.

Jesúspa sepultüranta soldädukuna täpayanqan

62Jesús wañunqanpita waränin jamay junaqnam mandakuq sacerdötikuna y fariseukuna Pilato kaqman aywar 63niyarqan: <<Taytay, tsay llullakuq runam nirqan: <Wañunqäpita kimsa junaqtam kawamushaq>.#Mat. 16.21; 17.23; 20.19; Mar. 8.31; 9.31; 10.33-34; Luc. 9.22; 18.31-33. 64Tsaynö nikaptinqa sepultürata kimsa junaqyaq soldäduykikunawan täpaykatsillay. Manasïqa discïpulunkuna Jesúspa ayanta [paqaspa] suwaskirmi runakunata creyitsiyanqa wañunqanpita kawamunqanta. Tsaynö llullakurqa tsay runa engañanqanpita mas peormi runakunata engañayanqa>>.

65Pilatunam nirqan: <<Soldädukuna sepultürata täpayänanpaq pushayay>>.

66Tsaynö niptinmi aywar sepultüra tsaparaq rumita sëllayarqan pipis kichaptin musyakänanpaq. Tsaypitanam soldädukunata täpayänanpaq churayarqan.

Currently Selected:

Mateo 27: qxn

Highlight

Copy

Compare