Mateo 26

Jesústa wañutsiyänanpaq yachatsinakuyanqan

Marcos 14.1-2; Lucas 22.1-2; Juan 11.45-53

1Tsaynö yachatsikur ushaskirmi discïpulunkunata Jesús nirqan: 2<<Musyayanqaykinömi Pascua fiesta#Éxo. 12.1-27; Deut. 16.1-8. qallananpaq ishkay junaqllana faltaykan. Tsaychömi prësu achkuskir Runapa Tsurinta crucificäyanqa>>.

3Tsaypitanam mandakuq sacerdötikuna, [ley yachatsikuqkuna] y Israel mayor runakuna mas mandakuq sacerdöti Caifáspa wajinman qorikäyarqan. 4Tsaychömi willanakuyarqan runakunata mana musyatsiyllapa Jesústa achkuskir wañutsiyänanpaq. 5Tsaymi niyarqan: <<Fiestachöqa ama achkushuntsu. Tsaychö achkushqaqa contrantsikmi runakuna shäriyanqa>>.

Jesúspa umanman perfümita wiñanqan

Marcos 14.3-9; Juan 12.1-8

6Betania markachö leprösu niyanqan Simónpa wajinchö Jesús kaykaptinmi 7juk warmi charqan alabastro rumipita rurashqa pömuchö perfümin aptashqa. Tsay perfümi alläpa chaniyuqmi karqan. Mësachö kaykaptinmi tsay warmiqa Jesúspa umanman perfümita wiñarqan.#Luc. 7.37-38. 8Tsayta rikarmi discïpulunkuna rabyar niyarqan: <<¿Imapaqtan tsay perfümita perditsin? 9Tsaypa rantinqa chaninchö rantikuskirmi tsay qellaywan waktsakunata yanapashwan karqan>>.

10Tsaynö niyanqanta wiyaykurmi Jesús nirqan: <<¿Imanirtan kay warmita rimayanki? Payqa allitam rurashqa. 11Waktsakunaqa qamkunawanmi imaypis kaykäyanqa.#Deut. 15.11. Peru noqam sïqa qamkunawan kashaqnatsu. 12Pampashqa kanäpaqmi payqa perfümita wiñämur alistaykäman. 13Rasun kaqtam niyaq: Maytsaychöpis willakuynïta willakurmi kay warmi perfümita wiñämunqanta willakuyanqa>>.

Jesústa rantikunanpaq Judas Iscariote conträtuta ruranqan

Marcos 14.10-11; Lucas 22.3-6

14Jesúspa apostolnin Judas Iscariotim mandakuq sacerdötikunaman aywaykur 15nirqan: <<Jesústa prësu achkuyänaykipaq entregayaptiq ¿aykatatan pägayämanki?>>

Tsaynö niptinmi kimsa chunka (30) qellayta pägayänanpaq äniyarqan. 16Tsaypitanam Judas yarpachakurqan imay höra Jesústa traicionananpaq.

Pascua mikuyta discïpulunkunawan Jesús mikunqan

Marcos 14.12-21; Lucas 22.7-14, 21-23; Juan 13.21-30

17Levadürannaq Tantata Mikuna fiesta qallanan junaqmi discïpulunkuna Jesústa tapuyarqan: <<Taytay, Pascua mikuyta mikunapaq ¿maychötan alistayämushaq?>>

18Jesúsnam nirqan: <<Jerusalénman aywayay. Juk runapa wajinman chaykur niyanki: <Jesúsmi kachayämashqa. Höranshi chaykämunna. Wajikichöshi Pascua mikuyta discïpulunkunawan mikuyanqa> >>.

19Jesús ninqannölla aywarmi discïpulunkuna Pascua mikuyta alistayarqan.

20Patsa qoyaykaptinnam#26.20 Wakin runakunaqa patsa tsakaykaptinnam niyan. chunka ishkay discïpulunkunawan mësaman Jesús jamaykurqan. 21Mikuykarnam Jesús nirqan: <<Rasun kaqtam niyaq: Qamkunapita juknikim prësu achkuyämänanpaq traicionamanqa>>.

22Tsaynö niptinmi alläpa llakikur juknin juknin tapuyarqan: <<Taytay, ¿noqatsuraq kä?>>

23Jesúsnam nirqan: <<Plätuchö noqawan tantata tullpuq kaqmi traicionamanqa.#Sal. 41.9. 24Rasunpam Runapa Tsurin qellqashqa kanqannölla ñakar wañunqa. Peru payta traicionaq runam sïqa alläpa llakipaypaq kanqa. Tsay runaqa ama yurinmantsu karqan>>.

25Tsaynö niptinmi rantikuqnin Judas nirqan: <<Rabí, ¿noqatsuraq kä?>>

Jesúsnam nirqan: <<Kikikim nikanki>>.

Mushuq pactupaq Jesús yachatsikunqan

Marcos 14.22-26; Lucas 22.14-20; 1 Corintios 11.23-25

26Tsaypitanam tantata aptarkur Dios Yayata Jesús agradëcikurqan. Tantata pakiskirnam discïpulunkunata makyar nirqan: <<Kay tantata mikuyay. Kayqa noqapa cuerpümi>>.

27Tsaynöllam vïnuyuq cöpata aptarkur Dios Yayata agradëcikurqan. Tsaypitanam discïpulunkunata makyar nirqan: <<Kayta llapayki upyayay. 28Kay vïnuqa Dios Yaya [mushuq] pactuta rurananpaq#Jer. 31.31-34. jichanqä yawarnïmi. Atskaq runakuna jutsankunapita perdonashqa kayänanpaqmi yawarnïta jichar wañushaq.#Éxo. 24.8; Zac. 9.11. 29Noqam niyaq: Kananpitaqa vïnuta manam yapay upyashaqnatsu hasta Taytäpa mandakuyninchö qamkunawan mushuq vïnuta upyanqäyaq>>.

30Discïpulunkunawan salmukunata cantaskirnam Olivos lömaman aywayarqan.

Pedro nëgananpaq kanqanta Jesús ninqan

Marcos 14.27-31; Lucas 22.31-34; Juan 13.36-38

31Tsaypitanam Jesús nirqan: <<Kanan paqasmi llapayki dëjaskayämar aywakuyanki. Dios Yayapa palabranmi nin: <Üsha mitsikuqta wañuskatsiptïmi üshankuna wakpa kaypa witsikar aywakuyanqa>.#Zac. 13.7. 32Peru wañunqäpita kawaskamurmi qamkunapita mas puntata Galileaman aywashaq>>.#Mat. 28.16.

33Pedrunam nirqan: <<Wakin kaq dëjayäshuptikipis noqaqa manam dëjashaykitsu>>.

34Jesúsnam nirqan: <<Rasun kaqtam niq: Kanan paqas gällu manaraq cantaptinmi kimsa kuti nëgamanki>>.

35Pedrunam nirqan: <<Ishkantsikta wañutsimäna kaptinpis manam nëgashaykitsu>>.

Tsaynöllam wakin discïpulunkunapis niyarqan.

Getsemaníchö Jesús mañakunqan

Marcos 14.32-42; Lucas 22.39-46

36Getsemaní niyanqanman discïpulunkunawan chaykurmi Jesús nirqan: <<Dios Yayata mañakamunqäyaq kayllachö jamaykäyay>>.

37Tsaypitam Pedruta y Zebedeupa tsurinkunata mas washaläman pusharqan. Tsaychömi alläpa llakikur 38nirqan: <<Wañunayparaqmi llakikuy tsarimashqa. Mana puñukar kayllachö shuyaykäyämay>>.

39Tsaypita washaläninkunaman aywaykurmi patsaman pelatakuykur Dios Yayata mañakur nirqan: <<Taytay, cöpachö wiñaraykaq castïguykita ama upyaykatsillämaytsu.#Sal. 75.8; Isa. 51.17; Jer. 25.15-29; Hab. 2.16. Peru noqa munanqänöqa ama katsuntsu, sinöqa qam munanqaykinö kaykullätsun>>.

40Tsaypita discïpulunkuna kaqman kutir puñukashqata tariskirmi Pedruta nirqan: <<¿Manaku juk hörallapis rikchayta puëdiyanki? 41Rikchayay. Dios Yayata mañakuyay Satanás mana tentayäshunaykipaq. Cäsuyämayta munarpis kikillaykikunapitaqa manam puëdiyankitsu>>.

42Tsaynö niskirmi yapay aywar Dios Yayata mañakur nirqan: <<Taytay, kay cöpachö wiñaraykaq castïguykita upyanäta munaptikiqa munanqaykinö kaykullätsun>>.

43Jesús yapay kutirmi discïpulunkuna puñukashqata tarirqan. Alläpa puñuy venciptinmi puñukashqa kaykäyarqan. 44Tsaypita yapay aywarmi puntata mañakunqannölla Dios Yayata mañakurqan. 45Discïpulunkunaman yapay kutirmi nirqan: <<¿Jinallaku puñuykäyanki? Höra chämushqanam Runapa Tsurinta jutsasapa runakunaman entregananpaq. 46¡Shäriyay, aku aywashunna! Traicionamaq runam shamuykanna>>.

Jesústa prësu achkuyanqan

Marcos 14.43-50; Lucas 22.47-53; Juan 18.3-12

47Jesús tsaynö parlaykaptinmi espädankunawan y qerunkunawan atskaq runakunata pushashqa apostolnin Judas Iscariote charqan. Judas pushanqan runakunataqa mandakuq sacerdötikuna y Israel mayor runakunam kachayarqan. 48Manaraq charmi pushanqan runakunata Judas yätsirnin nirqan: <<Mayqantapis mutsar saludanqä kaqmi Jesús kanqa. Payta prësu achkuyanki>>.

49Chaykurnam <<rabí, ¡allillaku kaykanki!>> nir Jesústa mutsaykurqan.

50Jesúsnam nirqan: <<Amïgu, ruranaykipaq kaqta sas ruray>>.

Tsaynö niptinmi Jesústa prësu achkuskiyarqan.

51Achkuskiyaptinmi jukaq discïpulun espädanta jipiskir mas mandakuq sacerdötipa serviqninpa rinrinta walluskirqan. 52Tsaymi Jesús nirqan: <<¡Espädaykita kutitsiy! Pitapis espädawan wañutsikuq kaqtaqa espädawanmi wañutsiyanqa. 53¿Manaku musyanki Taytäta mañakuptï washämänanpaq chunka ishkay legión#26.53 Juk legión complëtum soqta waranqa (6,000) soldädukuna karqan. Tsaymi Jesús nirqan qanchis chunka ishkay waranqa (72,000) angelkunapita masta kachamunanpaq kanqanta. angelkunapita masta kachamunanpaq kanqanta? 54Tsaynö mañakuptïqa ¿imanöparaq cumplinqa runakuna wañutsiyämänanpaq Dios Yayapa palabran ninqanpis?>>

55Tsaypitanam runakunata Jesús nirqan: <<¿Imanirtan suwamannö espädaykikunawan y qeruykikunawan shayämushkanki? Waran waran templupa patiunchö [qamkunawan] paqta kaykaptï#Luc. 19.47; 21.37. ¿imanirtan tsaychö prësu achkuyämarqaykitsu? 56Peru profëtakuna qellqayanqan cumplinanpaqmi prësu achkuykäyämanki>>.

Jesústa prësu achkuskiyaptinnam discïpulunkuna dëjaskir qeshpirnin aywakuyarqan.

Jesústa mas mandakuq sacerdöti tapunqan

Marcos 14.53-65; Lucas 22.54-55, 63-71; Juan 18.13-14, 19-34

57Tsaypitanam mas mandakuq sacerdöti Caifáspa wajinman Jesústa apayarqan. Tsaychömi ley yachatsikuqkuna y Israel mayor runakunapis qorikashqa kaykäyarqan. 58Karu qepallanta Pedro aywarmi patiuyaq yaykurqan. Yaykuskirmi ima päsanqantapis rikänanpaq templu cuidaq wardiakunawan jamaykäyarqan.

59Tsaychömi mandakuq sacerdötikuna, [Israel mayor runakuna] y llapan Sanedrín juezkuna Jesústa wañutsiyta munar testïgukunata ashiyarqan llullakur Jesúspa contran parlayänanpaq. 60Manakaqkunata atskaq niyaptinpis wañutsishqa kananpaqqa manam ni ima jutsantapis tariyarqantsu. Tsaymi ishkay llulla runakuna witiykur 61niyarqan: <<Kay runam templuta juchuskatsir kimsa junaqllata yapay shäritsinanpaq nirqan>>.#Juan 2.19.

62Tsaymi mas mandakuq sacerdöti sharkur Jesústa tapurqan: <<Tsaynö niyäshuptiki ¿manaku imatapis ninki? ¿Rasun kaqtaku niyan o manaku?>>

63Tsaynö tapuptinpis Jesúsqa manam ni imata nirqantsu. Tsaymi mas mandakuq sacerdöti nirqan: <<Imayyaqpis kawaq Dios Yayapa shutinchömi tapuq: ¿Rasunpaku Diospa Tsurin Cristo kanki o manaku?>>

64Jesúsnam nirqan: <<Ninqaykinöllam kä. Kananpitam Runapa Tsurinta rikäyanki poderösu Diospa derëcha kaq lädunchö jamaykaqta y pukutay jananchö ciëlupita shamuykaqta>>.#Dan. 7.13.

65Tsaynö niptinmi mas mandakuq sacerdöti alläpa rabyarnin sotänantapis rachiskir nirqan: <<¡Kay runam Dios Yayapa contran parlan! ¿Imapaqnatan mas testïgutapis ashishun? Wiyayashkankinam mana allikunata parlanqanta. 66Kanan ¿imatatan niyanki?>>

Tsaynö niptinmi llapan niyarqan: <<¡Jutsayuqmi! ¡Wañutsishqa katsun!>>#Lev. 24.16.

67Tsaynö nirmi Jesúspa qaqllanman toqapur kutayarqan. Wakin kaqnam laqyar#Isa. 50.6. 68niyarqan: <<Rasunpa Cristo karqa pï maqashunqaykitapis mä niyämay>>.

Jesústa Pedro nëganqan

Marcos 14.66-72; Lucas 22.56-62; Juan 18.15-18, 25-27

69Tsayyaqmi patiuchö Pedro jamaykarqan. Payta rikaykurmi juk servikuq jipash nirqan: <<Qampis Galileapita Jesúswanmi purishkanki>>.

70Tsaynö niptinmi llapan runakuna wiyaykäyaptin Pedro nirqan: <<Manam musyätsu imapaq parlaykanqaykitapis>>.

71Tsaynö niskirmi patiu punkumanna witikurqan. Tsaychöpis juk servikuq jipashmi payta rikaykur tsaychö kaykaqkunata nirqan: <<Kay runataqa Nazaretpita Jesúswan puriykaqtam rikashkä>>.

72Yapay nëgarmi Pedro jurarnin nirqan: <<¡Tsay runata manam reqïtsu!>>

73Tsaypita unay rätullatanam tsaychö wakin runakuna Pedruman witiykur niyarqan: <<Qamqa rasunpam paywan purishkanki. Galilea runakunanömi parlankipis>>.

74Tsaynö niyaptinmi Pedro yapay jurar nirqan: <<¡Tsay runataqa manam reqïtsu!>>

Tsay höram gällu cantaskirqan. 75Tsaynö cantaskiptinmi Pedro yarpaskirqan Jesús ninqanta: <<Manaraq gällu cantaptinmi kimsa kuti nëgamanki>>.

Tsaymi waqtaman yarquskir alläpa llakikur waqarqan.

Currently Selected:

Mateo 26: qxn

Highlight

Copy

Compare