Mateo 11

1Chunka ishkay discïpulunkunata yachatsir ushaskirnam Galileapa markan markan Dios Yayapa willakuyninta willakur Jesús purirqan.

Discïpulunkunata Bautizaq Juan Jesúsman kachanqan

Lucas 7.18-35

2Carcelchö kaykarmi Bautizaq Juan musyarqan Jesucristo imata ruranqantapis. Tsaymi [ishkay] discïpulunkunata Jesús kaqman kacharqan 3tapur niyänanpaq: <<¿Qamkush kanki Dios Yaya kachamunqan Cristo o juktaraqkush shuyäyäshaq?>>

4Jesúsnam nirqan: <<Kutir wiyayanqaykita y rikäyanqaykita Juanta willayay. 5Qaprakunam rikäyan. Puriyta mana puëdiqkunam puriyan. Leprawan qeshyaqyashakunam kutikäyan. Mana wiyaqkunam wiyayan.#Isa. 35.5-6. Wañushqakunam kawayämun. Waktsakunam Dios Yayapa alli willakuyninta wiyaykäyan.#Isa. 61.1. 6Yarpäyanqannö mana ruraptïpis mana ajayaypa noqaman confiakamuq runaqa kushishqam kawanqa>>.

7Juanpa discïpulunkuna kutiskiyaptinnam runakunata Jesús nirqan: <<¿Imaqtan tsunyaman aywayarqayki? ¿Shoqushta wayra kuyutsiqta rikaqku? 8Manasïqa ¿imata rikaqtan aywayarqayki? ¿Alli llatapashqa runata rikaqku? Musyayanqaykinöpis alli llatapan shukushqa runakunaqa reypa wajinchömi kayan. 9Tsaypunqa ¿ima rikaqtan aywayarqayki? ¿Profëta rikaqku? ¡Awmi! Noqam niyaq: Paynöqa manam ni mayqan profëtapis kashqatsu. 10Juanta kachamunanpaqmi kaynö qellqashqa kaykan: <Nänita pitsaqnö runakuna alistakuyänanpaqmi willakuqnïta puntaykita kachashaq>.#Mal. 3.1.

11<<Rasun kaqtam niyaq: Llapan profëtakunapitapis masmi Bautizaq Juanqa tantiyan. Tsaynö kaptinpis Dios Yayapa mandakuyninman tsayraq yaykuqkunam Juanpitapis mas tantiyayan.

12<<Bautizaq Juan willakur qallanqanpitam Dios Yayapa mandakuyninman atskaq runakuna yaykuyan. Tsaynö kaykaptinpis wakin runakunaqa manam munayantsu tsay willakuyta willakuyänanta, sinöqa imaykanöpam tsapata churayan. 13Juan manaraq willakuptinmi Moiséspis y profëtakunapis tsaynö kananpaq kanqanta willakuyarqan.#Luc. 16.16. 14Paykuna willakuyanqanta mana creyiyaptikipis <Elías shamunqam> nir profëta willakunqantaqa Juanmi cumplishqa.#Mal. 4.5; Mat. 17.10-13; Mar. 9.11-13. 15Rinriyuq kaqkunaqa ninqäkunata wiyakuyätsun>>.

16<<Kanan tiempu runakunata ¿imamanraq iwalatsïman? Paykunaqa pläzachö pukllaq wamrakunanöllam kayan. 17Tsay wamrakunam qayaykachar niyan: <Lawtata töcayaptïpis manam tushuyankitsu. Llakinaypaq cantuta cantayaptïpis manam waqayankitsu>. Tsay wamrakunanömi kanan tiempu runakuna kayan. 18Juan tantata mana mikuptin y vïnuta mana upyaptinmi niyan: <¡Payqa supaypa poderninchömi kaykan!> 19Runapa Tsurin mikuptin y upyaptinmi niyan: <¡Kay runaqa alläpa mikuq y upyaqmi! ¡Impuestu cobraqkunapa y jutsasapakunapa amïgunmi!> Tsaynö niyaptinpis discïpulükuna Dios Yaya munanqannö kawayaptinmi Juanta y noqata Dios Yaya kachayämanqan musyakan>>.

Jutsa ruraqkunata juzgananpaq Jesús ninqan

Lucas 10.13-15

20Atska milagrukunata Jesús ruranqanta rikarpis jutsa ruraytaqa manam dëjayarqantsu. Tsaymi Jesús nirqan: 21<<¡Allaw, Corazín runakuna! ¡Allaw, Betsaida runakuna! Sïkush markaykikunachö milagrukunata ruranqänö Tiro y Sidón markakunachö#Isa. 23.1-18; Eze. 26.1—28.26; Joel 3.4-8; Amós 1.9-10; Zac. 9.2-4. ruräman karqan, unaynam jutsankunapita arrepentikur lütu llatapata shukurkur uchpa jananchö jamaräyanman karqan. 22Noqam niyaq: Tiro y Sidón runakunata castiganqanpitapis mas peormi día del juiciuchö Dios Yaya castigayäshunki.

23<<Capernaúm runakuna, ¿ciëluman chäyänaykipaqku yarpäyanki? ¡Qamkunaqa Hadesman jitarpushqam kayanki! Sïkush qamkunachö ruranqä milagrukunata Sodomachö#Gén. 19.24-28. ruräman karqan, jutsankunapita arrepentikuyaptin tsay marka kananyaqmi kaykanman karqan. 24Noqam niyaq: Sodoma runakunata castiganqanpitapis mas peormi día del juiciuchö Dios Yaya castigayäshunki>>.#Mat. 10.15; Luc. 10.12.

Dios Yayata Jesús mañakunqan

Lucas 10.21-22

25Tsaychömi Dios Yayata mañakur Jesús nirqan: <<Ciëluchö y kay patsachö poderyuq Taytay, qamtam alabaq. Manam yachaq tukuqkunatatsu yarpaynikikunata musyatsishkanki, masbienmi wamranö kaqkunallata. 26Taytay, tsaynö kanantam munashkanki>>.

27Tsaypitanam tsaychö runakunata nirqan: <<Taytämi llapanta podernïman churamushqa.#Juan 3.35. Tsurin kaptïmi paylla noqata reqiman. Tsaynöllam Taytä kaptin noqalla payta reqï. Tsaymi noqa tantiyatsinqä kaqkunalla Taytäta reqiyan>>.#Juan 1.18; 10.15.

28<<Llapayki pishipashqa y llakishqa kaqkuna, noqaman shayämuy. Noqam jamatsiyäshayki. 29Noqapa yügüta apayay.#11.29 Noqapa yügüta apayay ninanqa discïpulü kayay ninanmi. Llakipäkuq y alli shonqu kanqäta rikäyämar noqapita yachakuyay. Noqapita yachakurmi jamayta tariyanki.#Éxo. 33.14; Jer. 6.16. 30Noqapa yügüqa ankashllam. Manam aja apaytsu>>.

Currently Selected:

Mateo 11: qxn

Highlight

Copy

Compare