Mateo 12

Jamay junaqpaq Jesús poderyuq kanqan

Marcos 2.23-28; Lucas 6.1-5

1Jamay junaqchömi trïgu kuchunpa discïpulunkunawan Jesús päsaykäyarqan. Tsaypa päsarmi discïpulunkuna mallaqaskir trïguta kiptun kiptun uchuyarqan.#Deut. 23.25. 2Tsayta rikarmi fariseukuna niyarqan: <<Maski rikay. Leynintsikta mana cäsurmi discïpuluykikuna jamay junaq kaykaptin trïguta pallaykäyan>>.

3Jesúsnam nirqan: <<¿Manaku imaypis liyiyashkanki yanapaqninkunawan mallaqar David imata ruranqanta? 4Davidshi Dios Yayapa wajinman yaykuskir Diospaq churayanqan tantata mikunaq.#1Sam. 21.1-6. Tsay tantaqa manam David ni paqtan runakuna mikuyänanpaqtsu karqan, sinöqa sacerdötikunalla mikuyänanpaqmi.#Lev. 24.9. 5Tsaynöllam Moisés qellqanqan leykunachö nin sacerdötikuna templuchö jamay junaq arurpis jutsayuq mana kayanqanta. Tsaytapis ¿manaku liyiyashkanki?#Núm. 28.9-10. 6Tsaymi niyaq: Noqaqam templupitapis mas poderyuq kä.#12.6 Sacerdötikuna jamay junaq templuchö aruyanqan jutsa mana kanqannömi Jesúspa discïpulunkuna jamay junaqchö trïguta pallayanqanpis jutsatsu karqan.

7<<Dios Yayapa palabranmi nin: <Sacrificiuta noqapaq waykayanqaykipitapis masmi munä llakipäkuq kayänaykita>. Tsayta tantiyarqa manam discïpulükunata musyapäyankimantsu.#Ose. 6.6; Mat. 9.13. 8Runapa Tsurinqa jamay junaqpaqpis poderyuqmi>>.#12.8 Tsaynö nirqa jamay junaqchö runa imata rurananpaq y mana rurananpaqpis poderyuq kanqantam Jesús nirqan.

Makin tsakishqa runata jamay junaqchö Jesús kutikätsinqan

Marcos 3.1-6; Lucas 6.6-11

9Tsaypita aywarmi sinagögaman Jesús yaykurqan. 10Tsaychömi makin tsakishqa runapis kaykarqan. Tsaymi Jesústa tapuyarqan: <<Qeshyaykaq runata jamay junaqchö ¿kutikätsishwanku o manaku?>>

Tsaynö tapuyarqan kutikätsiptinqa tsay achäquilla Jesúspa contran shäriyänanpaqmi.

11Jesúsnam nirqan: <<Mayqaykipapis üshaykikuna pözuman jeqaskiptin jamay junaq kaykaptinpis ¿manaku jina höra jipiq aywayanki?#Luc. 14.5. 12Runaqa üshapitapis masmi välin. Tsaymi jamay junaq kaptinpis runa majintsikta kutikätsishwan>>.

13Tsaypitanam makin tsakishqa runata nirqan: <<¡Makikita lamkamuy!>>

Lamkaskiptinmi jukaq makinnö sänuna karqan. 14Tsaypitanam fariseukuna yarquskir Jesústa wañutsiyänanpaq willanakuyarqan.

Jesúspaq profëta Isaías qellqanqan

15Tsaynö willanakuyanqanta musyaskirmi tsay markapita Jesús aywakurqan. Aywakuptinmi atskaq runakuna qepanta aywayarqan. Qeshyaykaq runakunatam llapanta Jesús kutikätsirqan. 16Kutikaskatsirmi Jesús nirqan: <<Noqa kutikätsiyanqaqta ama pitapis willakuyankitsu>>.

17Tsaynöpam profëta Isaías qellqanqanta Jesús cumplirqan. Tsay qellqanqanchömi nin

18<<Servimaqnï imanö kanqanta tantiyayay.

Paytam akrashkä.

Paytam kuyä.

Paypitam alläpa kushikü.

Espïritütam payman kachamushaq.

Paymi maytsay nación runakuna munanqänö kawayänanpaq willakunqa.

19Payqa manam piñapanqatsu ni qayapanqatsu.

Cällikunachöpis manam qayaykachar purinqatsu.

20Tsillishqa shoqushtapis manam pakinqatsu.

Wañunaykaq aktsitapis manam wañutsinqatsu.#12.20 Kay textuchömi llakikuqkunata iwalatsirqan tsillishqa shoqushman y wañunaykaq aktsiman. Tsaymi kay textuchö nin llakishqa kaykaqkunata manakaqman churanqanpa rantin Jesucristo llakipänanpaq kanqanta.

Payqa llapanpaqpis alli justiciatam ruranqa.

21Juklä nacionchö täkuqkunapis paymanmi confiakuyanqa>>.#Isa. 42.1-4.

Jesúspa contran parlayanqan

Marcos 3.20-30; Lucas 11.14-23; 12.10

22Tsaypitanam supay qaprayätsinqan y upayätsinqan runata Jesús kaqman pushayarqan. Tsay runata kutikaskatsiptinmi rikarqanna y parlarqanna. 23Tsayta rikarmi runakuna kushikur niyarqan: <<¿Kay runaqa Davidpa Tsurintsuraq?>>

24Tsaynö niyanqanta wiyarmi fariseukuna niyarqan: <<Kay runaqa supaykunapa mandaqnin Beelzebúpa#12.24 Beelzebúqa Satanáspa jukaq shutinmi. poderninwanmi supaykunata qarqun>>.#Mat. 9.34; 10.25.

25Paykuna mana allita yarpäyanqanta musyarmi Jesús nirqan: <<Juk nacionchö runakuna kikinkunapura chikinakurqa ¿manatsuraq wañutsinakur ushakäyanman? Tsaynöllam juk markachö täkuqkunapis o juk wajichö täkuqkunapis chikinakurqa ¿manatsuraq wakpa kaypa aywakur ushakäyanman? 26Tsaynöllam Satanáspis kikinpa contran shärirqa rakikashqa kayanqa. Tsaynö kaptinqa mandakuyninpis ushakanqam.

27<<Beelzebúpa poderninwan supaykunata qarquptïqa ¿pipa poderninwantan qatiräshuqnikikuna supaykunata qarquyan? Diospa poderninwan supaykunata qarquyanqanta tantiyaykarqa ¿imanirtan tantiyayankitsu noqapis Diospa poderninwan qarqunqäta? 28Diospa Espïritunwan supaykunata qarquptïmi Dios Yayapa mandakuynin qamkunaman chämunqanta musyayanki>>.

29<<Kallpasapa runata manaraq pankirqa manam ni pipis wajinman yaykur imantapis apanmantsu. Peru pankiskirmi sïqa imantapis apanman.#12.29 Kallpasapa runamanmi Satanásta iwalatsin. Kallpayuq runapa imaykankunamanmi poderninchö katsinqan runakunata iwalatsin. Satanáspita mas kallpasapa runamanmi Jesucristo iwalatsikun. Tsaynömi tantiyatsirqan Satanáspita mas poderyuq kanqanta.

30<<Pipis favornï mana karqa conträmi kaykan. Noqata mana qorïsimaq kaqqa qarqunmi.#12.30 Tsaynö Jesús nirqan: Dios Yayapa mandakuyninchö runakuna kawayänanpaq noqawan paqta mana qoriq kaqqa tsapatam churan. 31Tsaymi niyaq: Runakuna jutsata rurayanqanta y Diospa contran parlayanqantam Dios Yaya perdonanqa. Peru Espíritu Santupa contran parlayanqantam sïqa perdonanqatsu. 32Runapa Tsurinpa contran parlayaptinqa perdonanqam. Peru Espíritu Santupa contran parlayaptinmi sïqa kay vïdachöpis ni wak vïdachöpis perdonanqatsu.#12.31-32 Espíritu Santuqa jutsantsikta dëjaskir Jesucristuta chaskikunapaqmi tantiyatsimantsik (Juan 16.8-11). Tsaymi Espíritu Santupa contran parlarqa pay tantiyatsinqanta mana chaskikur Jesucristuman imaypis creyintsu (Hech. 7.51). Peru Jesucristuman creyiq kaqmi sïqa perdonashqa kanqa.#Luc. 12.10.

Parlayninpita runata reqinqantsikta Jesús ninqan

Lucas 6.43-45

33<<Alli jachaqa allitam wayun. Peru mana alli jacham sïqa mana allita wayun. Wayuyninpitam jachataqa reqintsik.#12.33 Tsaynö parlarmi Jesucristo nirqan: Jachata wayuyninpita reqinqantsiknömi runatapis imanö parlanqanta wiyar alli runa kanqanta o mana alli runa kanqantapis reqintsik.#Mat. 7.20; Luc. 6.44. 34¡Culebra casta runakuna!#Mat. 3.7; 23.33; Luc. 3.7. Mana alli runa kaykarqa ¿imanöraq allita parlayankiman? Runaqa shonqunchö yarpanqantam allita o mana allitapis parlan.#Mat. 15.18; Luc. 6.45. 35Alli runaqa shonqun alli yarpanqantam parlan y mana alli runaqa shonqun mana allita yarpanqantam parlan. 36Tsaymi niyaq: Imatapis llutankunata parlayanqanpitam Dios Yaya día del juiciuchö juzganqa. 37Allita parlaqtaqa salvanqam. Peru llutankunata parlaqtam sïqa infiernuman jitarpunqa>>.

Milagrutaraq Jesús rurananta munayanqan

Marcos 8.11-12; Lucas 11.29-32

38Tsaynö niptinmi wakin fariseukuna y ley yachatsikuqkuna Jesústa niyarqan: <<Rabí, Dios Yaya rasunpa kachamushunqaykita musyayänäpaq ima milagrullatapis ruramuy>>.#Mat. 16.1; Mar. 8.11; Luc. 11.16.

39Jesúsnam nirqan: <<¡Mana cäsukuq jutsasapa runakuna! Milagruta ruranäta munayaptikipis#Mat. 16.4; Mar. 8.12. manam ima milagrutapis rurashaqtsu. Tsaypa rantinmi profëta Jonásta salvar milagruta ruranqannö Dios Yaya juk milagruta ruranqa. 40Kimsa junaq kimsa paqas jatun pescädupa pachanchö Jonás kanqannömi#Jon. 1.17. Runapa Tsurinpis kimsa junaq kimsa paqas pamparanqa.

41<<Jonás willakunqanta chaskirmi Nínive runakuna jutsankunapita arrepentikuyarqan.#Jon. 3.5. Peru kananqa Jonáspita mas poderyuq kaqmi willaykäyäshunki.#12.40-41 Runapa Tsurinpaq parlar y Jonáspita mas poderyuq kaqpaq parlarqa kikinpaqmi Jesucristo parlarqan. Tsaymi día del juiciuchö Nínive runakuna shärimur kanan tiempu runakunata shimpiyanqa>>.

42<<Salomón yachatsinqanta wiyananpaqmi mandakuq reinapis sur kaqlä karu nacionpita shamurqan.#1Rey. 10.1-10; 2Crón. 9.1-12. Peru kananqa Salomónpita mas yachayyuq kaqmi willaykäyäshunki.#12.42 Salomónpita mas yachayyuq kaqpaq parlarqa kikinpaqmi Jesucristo parlarqan. Tsaymi día del juiciuchö tsay reina shärimur kanan tiempu runakunata shimpinqa.

Runaman supay kutinqan

Lucas 11.24-26

43<<Runapita supay yarquskirmi maychöpis täkunanpaq ashir tsunya jirkakunapa purin. Mana tarirnam 44nin: <Yarqamunqä wajïman kutikushaq>. Kutiykurnam pitsapakushqa y churapakushqa jäkuykaqtana tarin. 45Tsaynöta tariykurmi supay majinkunaman aywar paypita mas mana alli qanchis supaykunata pusharkur tsay täkunqanman kutin. Tsaymi ñawpata kanqanpitapis mas peorraq tsay runa tikran. Tsaynöllam päsanqa kanan tiempu mana alli runakunatapis>>.

Jesúspa maman y wawqinkuna pikuna kayanqan

Marcos 3.31-35; Lucas 8.19-21

46Jesús tsaynö yachaykätsiptinmi paywan parlayta munar mamanwan wawqinkuna punkuchö shuyaraykäyarqan. 47Tsaymi Jesústa juk runa willarqan: <<Mamaykiwan wawqikikunam waqtachö shuyaykäyäshunki>>.

48Jesúsnam nirqan: <<Kananmi mamä y wawqïkuna pikuna kayanqantapis musyatsiyäshayki>>.

49Tsaynö nirmi discïpulunkuna kaqläpa toqriykur nirqan: <<Paykunam mamäwan wawqïkuna kayan. 50Pipis ciëluchö kaykaq Taytä munanqannö kawaq kaqmi wawqï, panï y mamä kayan>>.

Currently Selected:

Mateo 12: qxn

Highlight

Copy

Compare