Jeremías 16
16
Warmiyuq mana kananpaq Jeremíasta ninqan
1 Dios Yayam nimarqan: 2<<Ama warmiwan churakaytsu. Ollqu ni warmi tsurikikuna ama katsuntsu. 3Kay nacionchö yuriq wamrakuna, mamankuna y taytankunapis 4mantsakaypaq qeshyaywanmi wañuyanqa. Tsaymi waqayänanpaq ni pampayänanpaqpis ni pï kanqanatsu. Wätakunapa wanun jitaraqnömi maytsaychö wañushqa jitaräyanqa. Wakin kaqkunam guërrachö wañuyanqa y wakin kaqnam mallaqaywan ushakäyanqa. Ayankunatam mikuyanqa wiskulkuna, condorkuna y chucaru wätakuna>>.
Judá runakunata castigananpaq Dios Yaya ninqan
5 Dios Yayam masta nimarqan: <<Kay runakunataqa mananam yanapashaqnatsu ni llakipäshaqnatsu. Tsaynö kayanqanpita wañuqkunapaq waqaynatsu ni llakikuynatsu ni täpaqninpis aywaynatsu. 6Kay nación runakunata castigaptï rïcupis waktsapis wañuyaptin manam pampayänanpaq ni waqayänanpaqpis ni pï kanqanatsu. Manam llakikuywan aqtsanta rutukunanpaq ni qaranta roqukunanpaqpis kanqanatsu. 7Wañushqachö täpaqkuna mikuyänanpaq kusinakuqkunapis manam kayanqanatsu. Maman y taytan wañuptin vïnuta servikuyänanpaq manam pipis kanqanatsu.
8<<Tsaynölla ama yaykuytsu runakuna mikur upyar jamaräyanqan wajiman. 9Israel runakunata kuyaq y llapanta mandaq Dios Yaya karmi nï: Noqam permïtishaq kay nacionchö pipis manana kushikunanpaq ni casaray fiestatapis manana rurayänanpaq.#Jer. 7.34; 25.10; Apoc. 18.23. Tsaytam kikiki rikanki.
10<<Tsaynö ninqäta willakuptikim runakuna tapuyäshunki: <¿Imanirtan Dios Yaya tsaynö alläpa mantsakaypaq llakikuywan castigamäshun? ¿Imatatan mana allita rurayashkä? ¿Ima jutsatatan rurayashkä Diosnintsikta alläpa rabyatsiyänäpaq?>
11<<Tsaynö tapuyäshuptiki ninki: <Dios Yayam nin: Tsaynö päsayäshunki unay castaykikuna dëjaskayämar juk dioskunata adorar serviyanqanpitam. Mana cäsuyämarmi leynïkunatapis cumpliyarqantsu. 12Qamkunam paykunapitapis mas peor shonquykikuna munanqanta rurar niyanqaqta cäsuyämankitsu.
13<< <Tsaynö kayanqaykipitam kay nacionpita qarquyäshayki unay castaykikuna y qamkunapis mana reqiyanqayki nacionman. Qamkunata manana llakipäyaptiqmi tsay nacionchö paqasta junaqta juk dioskunatana adorayanki.
14<< <Tsaynö kaykäyaptikim waray warantinkuna tsay nacionpita qoriyämushayki. Tsaymi ni pipis ninqanatsu: <<Israel runakunata Egiptupita jipimuq Diospa shutinchömi jurä>>. 15Tsaypa rantinmi niyanqa: <<Israel runakunata norti kaq lädu nacionman y entëru nacionkunaman qarqunqanpita qorimuq Dios Yayapa shutinchömi jurä>>.#Jer. 23.7-8. Unay castaykikunata entreganqä nacionmanmi qoriyämushayki> >>.
16 Dios Yayam nin: <<Peru puntata atskaq contraykikunata kachamuptïmi pescäduta achkuqnö prësu achkuyäshunki. Tsaychö quëdaqkunata achkuyänanpaqmi atskaqta yapay kachamushaq. Paykunam maytsay jirkakunaman, raqrakunaman y machaykunaman tsinkakuyaptikipis chucaru wätakunata achkuqnö qatikachäyäshunki.#Hab. 1.14-15.
17<<Noqaqa imanö kawayanqaykitam rikaykä. Pakayllapa jutsa rurayanqaykitapis rikaykämi. 18Ïduluykikunata adorar entregayanqaq entëru nacionta impüruyätsiqtam rikäyashkaq. Tsaymi qamkunata alli cösa castigayäshayki>>.
Dios Yayata Jeremías mañakunqan
19 Dios Yaya, qammi valorta qaramanki.
Imayka peligrupitapis qammi tsapämanki.
Qamta adorayäshunaykipaq maytsay nacionkunapita shamurmi niyanqa:
<<Unay castäkuna adorayanqan ïdulukunam ni imapaqpis mana väliq kayan.
20Runaqa ¿dioskunata ruranmantsuraq?
Ruraptinpis tsay dioskuna manam rasunpa Diostsu>>.
21Dios Yayam nin:
<<Maytsaychö täkuq runakunatam poderösu kanqäta musyatsishaq.
Paykunam musyayanqa Dios Yaya kanqäta>>.
Currently Selected:
Jeremías 16: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
