Jeremías 17

Judá runakuna ïdulukunata adorayanqan

1Dios Yayam nin:

<<Judá runakuna, jutsa ruraymi rumiman tällar qellqashqanö shonquykikunachö kaykan.

Tsaynöllam adorayanqayki altarkunapa waqrankunaman tällar qellqashqanö kaykan.

Fiërrupita rurashqa diamanti puntayuq cincelwan llaqllashqanömi kaykan.#17.1 Diamanti rumim llapan rumipita y ima metalpitapis mas chukru. Tsaynöllam qoripita mas kuyakuypaq y mas chaniyuq.

2Perqayanqayki altarkunachömi tsurikikunapis ïdulukunata adorayan.

Asera diösata adorayänaykipaq jawiyanqayki teta qerukuna kaqkunachömi mana qonqar adorayan.

Tsay qerukunam rämasapa jachakuna chakinchö, altun lömakunachö 3y maytsay jirkakunachö.

Entëru nacionnikikunachömi ïdulukunata adorayanki.

Tsaymi llapan imaykaykikunata contraykikuna suwapuyäshunaykipaq permïtishaq.

4Nina mana wañuypa lunyaqnöraq rabyaynï kaptinmi herenciatanö entregayanqaq nacionpitapis qarquyäshayki.

Tsaynöpam mana reqiyanqayki nacionchö contraykikunapa serviqnin kayanki>>.

Dios Yayaman creyikuqkuna y mana creyikuqkuna imanö kayanqan

5 Dios Yayam nin:

<<Maldicionashqam kanqa noqaman creyikamunqanpa rantin runa majinllaman y kikinpa kallpanllaman creyikuqkuna.

6Tsay runakunam pipis mana täkunqan desiertuchö wiñaq shirakanö kayan.

Tsaynöllam rumikuna chawpinchö wiñaq jachanö kayan.

Alli kawaytaqa manam ni imaypis tariyanqatsu.

7<<Peru noqaman creyikamuqkunam sïqa kushishqa kawakuyanqa.

8Tsay runakunam yaku kuchunchö plantashqa jachanö kayan.

Tsay jachapa jawankuna yakuman mallmashqa kaptinmi usyachöpis raprankuna verdilla.#Sal. 1.3.

Usyachö qarwatanqanpa rantinmi imaypis wayun.

9<<Runapa shonqunmi mana confiakuypaq mana alli.

¿Piraq musyan shonqunchö imata yarpanqantapis?

10Noqa Dios Yayam musyä shonqunchö runa allita o mana allita yarpanqantapis.#Sal. 7.9; Jer. 11.20; Apoc. 2.23.

Tsaymi imanö kawanqanman pitapis yanapä o castigä.#Sal. 62.11-12; Prov. 24.12; Eze. 18.30; 33.20; Mat. 16.27; Rom. 2.6.

11Engañakur rïcuyaq runam jukpa runtunta tsakwa oqllaqnö kaykan.

Tsaymi mana yarpashqata llapan riquëzankunata oqrar alläpa waktsayanqa>>.

Dios Yayaman Jeremías confiakunqan

12 Dios Yaya, qallananpita kuyakuypaq templuykipitam mandakaykämunki.

13Qammi Israel runakunata kuyaq Dios Yaya kanki.

Mana tsakiq chuya yakunö kaykaptikim wakin runakunaqa qampita witikuyashqa.

Paykunaqa alläpam penqakuyanqa.

Polvuchö qellqashqa shuti wayrawan illakanqannömi paykunapis illakäyanqa.

14 Dios Yaya, alli kawanäpaq yanapaykallämay.

Imayka mana allipitapis salvaykallämay.

Noqaqa qamllatam imaypis alabaq.

15Asipäyämarmi niyäman:

<<¿Imaytan Dios Yaya willakatsishunqayki cumplinqa?

¡Sas cumplitsun!>>

16Noqaqa manam imaypis mañakuqtsu paykunata castiganaykipaq ni paykunaman desgraciata kachanaykipaq.

Musyankim imata willakunqätapis.

Wiyaykämaptikim llapanta nishkä.

17Ima desgracia shamuptinpis qamllamanmi tsinkakamü.

Ama jaqiykallämaytsu.

Jaqimaptikiqa alläpam mantsakushaq.

18Penqakuyman churamanqaykipa rantin qatikachämaqkunata penqakuyman churaykuy.

Noqata castigamanqaykipa rantin paykunata castigaykuy.

Paykunata ima desgraciapis päsaykullätsun.

Jamay junaqta respitayänanpaq Dios Yaya ninqan

19 Dios Yayam nimarqan: <<Markaman yaykuna mas jatusaq punkupa aywar willakuynïta tsaychö willakuy. Tsay punkupam reykunapis yaykuyan y yarquyan. Tsaychö willakunqaykinölla Jerusalénman yaykuna wakin kaq punkukunachöpis willakuy.

20<<Willakur ninki: <Judá nacionpa mandakuqnin reykuna, Judá runakuna y Jerusalénchö täkuqkuna, Dios Yaya ninqanta llapayki wiyayay. 21Dios Yayam nin: Imapis mana päsayäshunaykipaq jamay junaqchö ama ima qepita apayaytsu ni Jerusalén punkukunapa ima cargatapis yaykatsiyaytsu.#Neh. 13.15-22. 22Jamay junaqchöqa wajikikunapitapis ama ni ima qepita jipiyaytsu. Tsay junaqchöqa ima aruytapis ama aruyaytsu. Tsay junaqqa unay castaykikunata ninqänö respitayämar jamayay.#Éxo. 20.8-10; Deut. 5.12-14; Isa. 58.13-14. 23Unay castaykikunam tsaynö niptïpis cäsuyämashqatsu. Shonqunkunata mas chukruyätsirmi mana cäsuyämar corriginätapis munayashqatsu.

24<< <Niyanqaqta cäsuyämar jamay junaqchö markaman yaykuna mayqan punkupapis cargata ama yaykatsiyämuytsu. Jamay junaq aruyanqaykipa rantin respitayämar jamayaptikiqa 25kay nacionpita y kay markapita manam imaypis qarquyäshaykitsu. Tsaynöllam rey David jamanqan trönupita rey imaypis mandakunqa. Reykuna y autoridäkunam carrëtankunawan y bestiankunawan kay markapa punkunkunapa imaypis päsayanqa. Paykunawanmi Judá runakuna y Jerusalén runakunapis kay punkukunapa yaykuyanqa. Jerusalénchömi imayyaqpis runakuna täkuyanqa.

26<< <Tsaynöllam Jerusalénchö adorayämänanpaq shayämunqa Judá nacionchö markakunapita, Jerusalénpa lädunkunapita, Benjamín partipita, Sefelapita, jallqakunapita y Neguevpitapis. Templuman shamurmi apayämunqa waykana sacrificiukunata, tsaki mikuy ofrendakunata, inciensiuta, agradëcikayämänanpaq kaq sacrificiukunata y wakin kaq sacrificiukunatapis.

27<< <Ninqäta mana cäsuyämar jamay junaq mana jamayaptiki y Jerusalén markapa punkunkunapa tsay junaq ima qepitapis yaykatsiyaptikiqa Jerusalénpa punkunkunatam waykashaq. Tsaymi Jerusalénchö palaciukunapis rupar ushakanqa. Tsay rupaqtam ni pipis wañutsiyta puëdinqatsu> >>.

Currently Selected:

Jeremías 17: qxn

Highlight

Copy

Compare