Santiago 3

Mana allikunata mana parlanapaq ninqan

1Kuyashqa wawqikuna y panikuna, mana allikunata yachatsiyaptikiqa Dios Yayam juzgayäshunki. Tsaynö kaykaptinqa qorikäyanqaykichö llapayki ama yachatsikuqllaqa kayaytsu.

2Pipis qallunta dominakurqa jutsannaqmi kanman. Tsay runaqa cuerpuntapis jutsa ruraypita dominanmanmi. Peru qalluntsikta dominakuyta mana puëdirmi sïqa llapantsikpis jutsata rurantsik. 3Musyanqantsiknömi bestiapa shiminman bozalta churarkur munanqantsikpa puritsintsik. 4Jatusaq büquita wayra apaptinpis ichik timonllawanmi manijar munanqanpa apayan. 5Wañunaykaq shanshapis tsariskirmi muntikunata rupar ushan. Tsaynöllam qalluntsikpis ichiklla kaykarpis imaykaman qarpamantsik.#Prov. 18.21.

6Parlanqantsikmi imayka ninanö.#Prov. 16.27. Mana allikunata parlarmi alli kawakuqkunatapis mana alliman ishkitsintsik. Qalluntsik ichiklla kaykarpis dominamashqam mana alli kawakuntsik. Nina imaykata rupanqannömi mana alli parlaynintsikpis. Mana allikunata parlarmi Satanáspa munayninta ruraykantsik.

7Imayka wätatapis runakunaqa manshuyätsiyanmi: chucaru kaqkunata, päriqkunata, culebrakunata y lamarchö kawaqkunatapis. 8Peru qallunkunatam sïqa pipis dominayta puëdiyantsu. Runapa qallunqa chucaru wätanö y venënunömi kaykan. 9Tsay qalluntsikllawanmi Dios Yayata alabantsik y runa majintsiktapis rimantsik. Kikin rikuqta Dios Yaya kamaykämashqaqa manam tsaynö rimakushwantsu.#Gén. 1.26.

10Tsay qalluntsikllawanmi allita y mana allitapis parlantsik. Kuyashqa wawqikuna y panikuna, ama tsaynöqa kashuntsu. 11¿Juk pashtaqllapita puchquq y mishkiq yaku yarqamunmantsuraq? 12¿Hïguspis aceitünasta wayunmantsuraq? ¿Üvapis hïgusta wayunmantsuraq? ¡Manam! Tsaynöllam juk pashtaqllapitaqa puchquq y mishkiq yaku yarqamuntsu. Tsaynö kaykaptinqa mana allikunata parlanqantsikpa rantin alli kaqkunallatana parlashun.

Rasunpa yachayyuq kar imanö kawanapaq ninqan

13Qamkuna kaqchö mayqanpis yachayyuq y tantiyakuq karqa mana yachaq tukurlla allikunata ruratsun. Tsaynö kawaptinraqmi yachayyuq kanqanpis musyakanqa. 14Runa majinta chikir shonqunchö rabyaparqa ama yarpätsuntsu yachayyuq kanqanta. Tsaynö aläbakurqa manam rasun kaqtatsu parlantsik. 15Yachayyuq tukuyqa manam Dios Yayapitatsu, sinöqa runapa yarpayninpita y Satanáspitam. 16Chikinakurnin rabyapänakur kawarqa alläpa mana allim kawaykantsik.

17Peru Dios Yaya yachayta qaramashqam sïqa pay munanqannö kawakuntsik. Tsaymi pïmaywanpis alli kawakuntsik, kuyanakuntsik, alli shonqu kantsik, llakipäkuq kantsik, allikunallata imaypis rurantsik, pïmaytapis alli rikantsik y rasun kaqllata parlantsik.#Luc. 6.36; Rom. 12.9. 18Runa majintsikwan alli kawanqantsikta rikarmi wakin runakunapis tantiyayanqa runa majinwan alli kawakuyänanpaq. Tsaynöpam llapantsikpis Dios Yaya munanqannö kawashun.

Currently Selected:

Santiago 3: qxn

Highlight

Copy

Compare