Santiago 2

Waktsakunata yanapanapaq ninqan

1Kuyashqa wawqikuna y panikuna, poderösu Señornintsik Jesucristuman creyikuykarqa llapan runakunata iwal rikäshun. 2Qorikäyanqaykiman alli llatapashqa y qori sortïjashqa rïcu runa chämuptin y tsaynölla makwa llatapashqa waktsa chämuptin 3¿imanirtan rïcu kaqta alli rikar niyanki <<kay allin kaq bancaman jamaykullay>> y waktsa kaqtaqa niyanki <<qamqa qepallachö ichiräkuy>> o <<patsallaman jamakuy>>? 4Tsaynö nirqa ¿manaku jukninta alli rikäyanki y juknintana mana alli rikäyanki? Tsaynö karqa mana alli jueznömi kayanki.

5 Kuyashqa wawqikuna y panikuna, wiyayämay. ¿Manaku Dios Yayaqa waktsakunata akrashqa wakin runakunapita payman mas creyikuyänanpaq y mandakuyninchö imayyaqpis kawayänanpaq? Tsaynö kawakuyänanpaqmi kuyaqnin kaqkunata prometirqan. 6Tsaynö kaykaptinmi qamkunaqa waktsakunata mana alli rikaykäyanki. ¿Manaku rïcu runakunaqa munayanqanta ruratsiyäshurniki sufritsiyäshunki? ¿Manaku maqaraykar juezkunamanpis apatsiyäshunki? 7¿Manaku paykunaqa salvamaqnintsik Jesucristutapis manakaqman churayan?

8Dios Yayapa palabranmi nin: <<Kikiki kuyakunqaykinö runa majikita kuyanki>>.#Lev. 19.18. Tsay leyta rasunpa cumplirqa allitam ruraykantsik. 9Peru rïcukunata alli rikar waktsakunata mana alli rikarqa tsay leyta mana cumplirmi jutsata ruraykantsik.

10Mayqanpis <<Dios Yayapa llapan leyninkunata cumplïmi>> nikar juk mandamientullatapis mana cumplirqa llapanta mana cumpliqnömi kaykäyan. 11Dios Yayapa mandamientunmi nin <<ama majayuq kaykar jukwan purikunkitsu>>#Éxo. 20.14; Deut. 5.18. y <<ama runa majikita wañutsinkitsu>>#Éxo. 20.13; Deut. 5.17.. Tsaynö kaykaptinqa jukwan mana purikurpis runa majinta wañutsirmi Dios Yayapa leyninkunata cumplintsu.

12Tsaynö kaykaptinqa imata parlayänaykipaq y imata rurayänaykipaqpis shumaq yarpachakuyay. Willakuynin ninqannöllam día del juiciuchö Dios Yaya juzgayäshunki. 13Runa majikita mana llakipäyaptikiqa qamkunatapis Dios Yaya manam llakipäyäshunkitsu. Peru runa majikita llakipäyaptikim sïqa qamkunatapis llakipäyäshunki.

Dios Yayaman creyikur allita ruranapaq ninqan

14Kuyashqa wawqikuna y panikuna, <<Dios Yayamanmi creyikü>> nikarpis pay munanqannö mana kawashqaqa creyikunqantsikpis ¿imapaqtan välin? Tsaynö kawaq runakunataqa Dios Yaya manam salvanqatsu. 15Dios Yayaman creyikuq majintsik llatapannaq o mallaqaykaqta rikaykar 16mana yanapashqaqa <<Dios Yaya yanapaykulläshuy qoñu qoñulla kanaykipaq y pacha junta mikunaykipaq>> ninqantsikpis ¿imapaqtan välin? 17Tsaynöllam runa majintsikta mana yanapashqaqa Dios Yayaman creyikunqantsikpis manakaqllapaq.

18Wakin runakunam niyan: <<Mana yanapakuq karpis Dios Yayamanmi creyikü>>.

Tsaynö niyaptinpis noqam nï: Mana yanapakuq karqa manam rasunpatsu Dios Yayaman creyikuyanki. Peru runa majikita yanaparmi sïqa Dios Yayaman rasunpa creyikuyanki. 19Dios Yaya japallan kanqanta creyiyanqayki alli kaptinpis tsay creyiyanqaykillawanqa manam salvakäyankitsu. Supaykunapis Dios Yaya kanqantaqa creyiyanmi. Peru infiernuman jitarpushqa kayänanpaq kanqanta musyarmi mantsakaywan karkaryäyanraq.

20¡Ima upatan kayanki! Runa majikita mana yanapayaptikiqa Dios Yayaman creyikuyanqaykipis manakaqllapaqmi. 21Yarpäshun unay awiluntsik Abraham imanö kanqanta. Payshi Dios Yayata cäsukur tsurin Isaacta altarchö wañutsinanpaq pushanaq.#Gén. 22.1-14. Tsaynö cäsuptinshi Dios Yaya jutsannaqtanö chaskinaq. 22Tsaynöpam Abraham rasunpa creyikunqanta musyantsik.

23Dios Yayapa palabranmi nin: <<Dios Yaya ninqanta Abraham creyiptinmi jutsannaqtana chaskirqan>>.#Gén. 15.6.

Tsaynöllam nin Abraham Dios Yayapa amïgun kanqanta. 24Tsaynö kaykaptinqa manam creyikunqallantsikpitatsu Dios Yaya salvamantsik, sinöqa payman creyikurnin allikunata ruranqantsikpitam.

25Tsaynölla yarpäshun prostitüta Rahab imata ruranqanta. Israel runakuna Jericó markaman rikapakuq chaykuyaptinshi wajinman pakaskinaq. Tsaypitanash Jericó runakuna ashiyaptin jukläpa aywakunanpaq mandanaq. Tsaynö ruranqanpitam paytapis Dios Yaya jutsannaqtanö chaskirqan.#Jos. 2.1-21.

26Tsaymi allikunata mana rurashqaqa Dios Yayaman creyikunqantsikpis manakaqllapaq kaykan. Cuerpunpita alma yarquptin runa wañunqannömi creyikuynintsikpis wañushqanö kaykan.

Currently Selected:

Santiago 2: qxn

Highlight

Copy

Compare