Isaías 61
61
Israel runakuna salvashqa kayänanpaq willakunqan
1 Dios Yaya akramashqa karmi Espïritunta noqaman kachamushqa.
Paymi kachamashqa alli willakuyninta waktsakunata willakunäpaq,
llakishqa kawaqkunata animatsinäpaq,
juklä nacionman prësu aywaqkuna librina kayanqanta willakunäpaq
y carcelchö qaykuraqkunapis yarqayämunanpaq kanqanta willakunäpaq.#Mat. 11.5; Luc. 7.22.
2Tsaynöllam Dios Yaya mandamashqa pay salvananpaq kaq tiempu chämunqanta willakunäpaq,#Luc. 4.18-19.
contrantsikkunata jutsankunapita castigananpaq kanqanta willakunäpaq
y waqaqkunatapis shoqanäpaq.#Isa. 57.18; Mat. 5.4.
3 Siónchö llakishqa kaykaqkunatam shumaq tantiyatsir animatsishaq.
Tsaymi umankunaman uchpata wiñäkuyanqanpa rantin corönatana shukukuyanqa,
lütu llatapata shukukuyanqanpa rantin aceitiwanna llushikuyanqa
y llakishqa kayanqanpa rantin kushishqana cantayanqa.
Tsaynö kaptinmi Dios Yaya plantanqan kuyakuypaq encina jachanö kayanqanta niyanqa.
Tsaynöpam Dios Yayata pïmaypis alabayanqa.
4Unay juchutsiyanqan wajikunapa raqäninkunatam allitsatsiyanqa.
Markakuna jankat ushakashqa kaptinpis yapaymi shäritsiyanqa.
5Kuyanqä runakuna, wätaykikunatapis juklä runakunam mitsipäyäshunki.
Chakraykikunachö arurmi üva plantayanqaykitapis cuidäsiyäshunki.
6Tsaynöllam Dios Yayapa sacerdötinkuna kayanqaykita niyäshunki.
Diosnintsikta serviq kayanqaykitam parlayanqa.
Juklä nación runakunapa riquëzankunawanmi quëdayanki.
Alläpa chaniyuq adornunkunata shukukurmi kushikuyanki.
7Ñawpata alläpa penqakuyman y manakaqman churayäshuqnikikunapis respitayäshurnikim favornikikunana parlayanqa.
Atska riquëzata chaskirmi nacionnikikunachö imayyaqpis kushishqa kawakuyanki.
8 Dios Yayam nin:
<<Allita rurar kawaq runatam kuyä.
Peru suwakuqta y mana alli ruraqkunatam sïqa chikï.
Tsaymi alli kawakuyänaykipaq yanapayäshayki.
Qamkunawanmi pactuta rurashaq imayyaqpis yanapayänaqpaq.
9Qampita miraqkunam maytsay nacionchö y markakunachöpis reqishqa kayanqa.
Qamkunata yanapayanqaqtam pïmaypis musyayanqa>>.
10 Dios Yaya yanapamaptinmi kushikuypita shonqüpis atsikyarkun.
Paymi salvación llatapata shukutsimashqa.
Kuyakuypaq llatapänömi alli ruraykunapis kaykan.
Casarananpaq shumaq llatapashqa jövinnömi kaykä.
Casaraq jipash kuyakuypaq llatapan shukushqanömi kaykä.#Apoc. 21.2.
11Maytsay nacionchöpis allillatana rurar payta alabayänanpaqmi Dios Yaya permïtinqa.
Qewata jeqatsimuqnö y huertachö plantata tseqllitsimuqnömi salvacionta chätsimunqa.
Currently Selected:
Isaías 61: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
