Isaías 60
60
Mushuq Jerusalén kananpaq ninqan
1 Dios Yayam nin:
<<¡Shäriy, Jerusalén!#60.1 Kay capïtuluchömi Jerusalén markata iwalatsin wawayuq warmiman. Wawankunanam Israel runakuna kayarqan.
Salvacionniki chämushqana kaykaptinqa ¡atsikyay!
Podernïmi qamchö atsikyaykan.
2Kay patsatam tutapay tsapashqa.
Yanarraqmi nacionkunata qopishqa.
Peru qammanmi sïqa patsa warämuqnö chämushaq.
Poderösu kaynïwan yanapanqaqtam pïmay rikanqa.
3Aktsinö kaptikim llapan nación runakuna qamman shayämunqa.
Patsa waraqnö atsikyaptikim reykunapis shayämunqa.#Apoc. 21.24.
4<<Jerusalén, ichirkur maytsaypa rikachakuy.
Maytsaypita runakunam qorikar shamuykäyan.
Ollqu wamraykikunapis karupitam shamuykäyan.
Warmi wamraykikunatapis marqashqam apaykäyämun.
5Paykuna chaykayämuptinmi alläpa kushikunki.
Shonquykipis kushikurmi atsikyarkunqa.
<<Lamar kuchunchö täkuqkunapis mas chaniyuq kaqkunatam apayämunqa.
Nacionninkunapa riquëzankunatam qampaq apayämunqa.
6Madiánpita y Efapitam camëllunkunawan tröpay tröpay juntapuyäshunki.
Qorita y inciensiuta aparkurmi Sabápitapis shayämunqa.
Noqata alabayämarmi chäyämunqa.
7Cedarchö üshakunatapis qampaqmi qatiyämunqa.
Altarchö waykayänaykipaqmi Nebaiotchö carnërukunata qatiyämunqa.
Tsay waykayanqaykim munanqänö kanqa.
Maytsaypita imaykata apayämuptinmi templüpis kushikuypaq kanqa.
8<<Pukutaynöraq büquikuna shamuqta y palumakuna puñunanman kutimuqnö runakuna kutiykämuqta rikay.
9Tsay büquikunam karu nacionkunapita shamuykäyan.
Tsay nacionkunachö täkuq runakunapis noqamanmi confiakayämun.
Tarsispita jatusaq büquikunam puntankunata shamuykäyan.
Karupitam wamraykikunata apaykäyämun.
Qorita y yuraq qellaykunata aparkurmi shamuykäyan.
Tsaynö shamuykäyan qamchö alläpa mantsakaypaq kaqkunata ruranqäpita adorayämänanpaqmi.
Noqam Israel runakunapa santu Diosnin kä.
10<<Alläpa rabyar castigashqa karpis kananqa llakipäshaykim.
Juklä runakuna shamurmi marka murällaykikunatapis allitsayanqa.
Mandaqnin reykunapis ninqaykitam rurayanqa.#Isa. 54.7-8; Lam. 3.31-33.
11Maytsay nacionkunapita riquëzankunata apayämunanpaqmi paqasta junaqtapis punkuyki kicharanqa.#Apoc. 21.25-26.
Reykunatapis qammanmi pushayämunqa.
12Mayqan nación runakunapis ninqaykita mana cäsuyaptinqa jankatmi ushakätsiyanqa.
13<<Líbanupitam allin kaq cipreskunata, pïnukunata y abëtu qerukunata templüta allitsayänanpaq apayämunqa.
Tsaynöpam templü kuyakuypaq kanqa.
14Sufritsiyäshuqniki runakunapa wamrankunam respitayäshurniki tsoqpakayämunqa.
Manakaqman churayäshuqnikikunapis llapanmi qonqurpakayämunqa.#Apoc. 3.9.
Paykunam niyanqa Dios Yayapa markan kanqaykita.
Tsaynömi niyanqa Israel runakunapa santu Diosnin täkunqan Sión kanqaykita.
15<<Ñawpata dëjashqa y chikishqa karmi tsunya marka kashkanki.
Tsaynö kashqa kaptikipis kuyakuypaq y kushishqa imayyaqpis kanaykipaqmi yanapashayki.
16Llapan wananqaykikunatam maytsay nacionkunapita apayämunqa.
Reykunapis llapan munanqaykitam alistapäyäshunki.
Tsaynöpam musyanki noqa Diosniki salvakuq kanqäta.
Tsaynöllam musyanki Jacob confiakunqan poderösu Dios kar qamta tsapanqaqta.
17<<Bendicionnïta churamurmi broncipa rantin qorita,
fiërrupa rantin qellayta,
qerupa rantin broncita
y rumipa rantin fiërruta alistapäshayki.
Qamchö täkuqkunam tranquïlu kawakuyanqa.
Allillatam imaypis rurayanqa.
18Qam kaqchöqa manam wañutsinakuy kanqanatsu.
Nacionnikichö manana ushakätsinakurmi tranquïlu kawakuyanqa.
Markapa yaykunan punkuykikunapa päsaq runakunapis kushishqam alabayämanqa.
19<<Mananam wanankinatsu junaqpa rupayta ni paqaspa killatapis.
Noqa Dios Yayam imayyaqpis aktsiki y salvaqniki kashaq.#Apoc. 21.23; 22.5.
20Tsaymi rupaywan killa mana jeqaqnö imaypis qampaq kashaq.
Noqa Dios Yayam imayyaqpis aktsiki kashaq.
Qamta tsaynö cuidaptiqmi imaypis llakikunkitsu.
21<<Qamchö täkuqkunam llapanpis alli ruraq runakunallana kayanqa.
Qamchömi imayyaqpis paykuna täkuyanqa.
Poderösu kanqäta pïmaypis musyayänanpaqmi plantanqäpita tseqllimuqnö kayanqa.
22Juk ishkay kaykaqkunam waranqapa mirayanqa.
Wallkaqlla kaykaqkunam poderösu nación tikrayanqa.
Noqa Dios Yayam permïtishaq pöcu tiempullachö tsaynö kayänanpaq>>.
Currently Selected:
Isaías 60: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
