Isaías 44
44
Jukllaylla Dios Yaya kanqan
1<<Jacobpita miraq servimaqnïkuna akranqä Israel runakuna, shumaq wiyayämay.
2Kamayäshuqniki Dios Yaya karmi nï:
Jacobpita miraq servimaqnïkuna, ama mantsakäyaytsu.
Jesurún runakuna,#44.2 Jesurún ninanqa alli kawaq ninanmi. Israel runakunatam tsaynö nirqan.#Deut. 32.15; 33.5, 26. qamkunam akranqä runakuna kayanki.
Mamaykipa pachanchömi noqa kamayashkaq.
Qamkunata yanapayänaqpaqmi kä.
3Desiertukunachöpis noqam yakuta pashtatsimushaq.
Tsaki patsakunapapis mayunöraq yaku aywananpaqmi permïtishaq.
Qamkunapita miraqkunamanmi Espïritüta kachamushaq.
Paykunam bendicionnïta chaskiyanqa.
4Qewa lloqllurraq wiñaqnömi kayanqa.
Mayu kuchunkunachö sauci verdiraqnöraqmi kayanqa.#Isa. 43.19-21; Jer. 31.12; Juan 4.10-14; 7.37-39; Apoc. 22.1-2.
5Wakinmi niyanqa: <Kikin Dios Yayapam kä>.
Wakinnam Jacob shutita shutinkuna churakuyanqa.
Wakin kaqnam makinkunaman shutïta qellqayanqa.
Israeltam shutinkunapis churakuyanqa>>.
6Israel runakunata salvaq rey y llapanta mandaq Dios Yayam nin:
<<Noqam qallanan y ushanan kä.#Isa. 41.4; 48.12; Apoc. 1.17; 22.13.
Noqapita masqa manam juk Dios kantsu.
7¿Pillaqa noqanö kantsuraq?
Karqa mä shamur nimätsun.
Ima päsananpaq kaqta ¿pillaqa unaypita parlashqatsuraq?
Mä ima päsananpaq kaqtapis willayäshuy.
8<<Ama mantsakäyaytsu.
Unaypitam qamkunata willayashkaq ima päsananpaq kanqanta.
Qamkunam testïgükuna kayanki.
Noqapita masqa manam juk Dios kantsu.
Manam juk masqa kantsu tsapäyäshunaykipaq.
Juk masta manam reqïtsu>>.
Ïdulu adoray upa ruray kanqan
9Ïdulukunata ruraqkunaqa#Sal. 115.4-8; 135.15-18; Isa. 40.18-20; 41.6-7; 42.17; 45.16; Jer. 10.1-16. manam ni imapaqpis väliyantsu.
Mayjina shumaqta rurayaptinpis manam välintsu.
Ïduluta adoraqkunaqa yarpayninnaqmi kayan.
Kikinkunapis penqakushqam kayanqa.
10Diosnin kananpaq ïduluta rurarmi tiempunkunata perdiykäyan.
11Ïdulu ruraqpis manam Diostsu, sinöqa runallam.
Tsaymi ïduluta ruraqpis y adoraqpis juzgaptï alläpa mantsakur penqakushqa kayanqa.
12Maski yarpäshun herrëru imanö ïduluta ruranqanta.
Fiërrutam carbonchö ninayanqanyaq waritsin.
Tsaypitam combawan y cincelwan takarnin munanqannö kananpaq ruran.
Tsaynö alli arurnin mallaqaptinmi kallpanpis ushakan.
Yakullatapis mana upyarmi jankat aywapakan.
13Carpintërupis metrunwanmi qeruta mïdin.
Imanö rurananpaqpis läpizwanmi dibujan.
Formonwanmi tällan.
Shumaq yarqunanpaqmi compaswan dibujan.
Tsaynöpam tsay ïduluta runatanö kuyakuypaqta ruran.
Rurayta ushaskirnam ïdulupaq rurayanqan wajiman churan.
14Wakin runam cedruta, cipresta y encinata walluskir ïduluta ruratsinanpaq apamun.
Wakinnam pïnuta plantan tamyawan wiñarkuptin ïduluta ruratsinanpaq.
15Tsay apamunqan jachakunapa troncunpita ïduluta ruraskirmi puntanman qonqurikun.
Sobraq kaqtanam yantapaq tseqtan.
Wakin yantawannam mashakunanpaq ninata tsaritsin.
Wakin yantawanmi tantata masarananpaq jornuta waritsin.
16Wakin yantawannam ninata tsarirkatsir aytsata kankan pacha junta mikunanpaq.
Ninachö mashakurmi nin:
<<Nina lädunqa jamaräkuy munay qoñum>>.
17Ïduluta tsaynö ruraskatsirmi puntanman qonqurikun.
Tsaychö adorarnin mañakurmi nin:
<<¡Qammi diosnï kanki! ¡Salvaykallämay!>>
18Tsay runakunaqa manam musyayantsu ni tantiyakuyantsu.
Imayka ñawinkuna wichqashqanö karmi tantiyakuyantsu manakaqta rurayanqanta.
19Tantiyayänanpaqpis manam juiciunkuna kantsu.
Manam shumaq yarpachakuyantsu.
Shumaq yarpachakurqam niyanman:
<<Pullan kaq qerutam tullpaman waykashkä.
Shanshanchönam tantata kuwashkä.
Tsaychömi aytsatapis kankaskir mikushkä.
Tsaypita sobraqwan manam ïduluta rurämantsu.
Jachapita wallunqä taksha kulluman manam qonqurikümantsu>>.
20Ïduluta adoraqkunaqa uchpata mikuqnömi mana tantiyakuq kayan.
Llutanta yarparmi tsaynö rurayan.
Manam tantiyantsu derëcha kaq makinchö aptaraykanqan ïdulu mana väliq kanqanta.
Israel runakunata Dios Yaya perdonar salvanqan
21<<Jacobpita miraq Israel runakuna, tsay niyanqaqkunata ama qonqäyaytsu.
Qamkunam servimaqnï kayanki.
Noqam qamkunata kamayashkaq.
¡Ama qonqayämaytsu!
22Llapan jutsaykikunapitam perdonayashkaq.
Pukutayta illakätsiqnömi jutsaykikunata illakätsishkä.
Qamkunata salvaykäyaptiqqa noqaman yapay confiakayämuy>>.
23Ciëlu, ¡Dios Yaya salvakuq kanqanpita kushikur cantay!
¡Patsa rurinchö kaqkunapis, vïvar qayaykachäyay!
¡Jirkakuna, alläpa kushikurnin jinchi cantayay!
¡Muntichö jachakuna, llapayki kushikur cantayay!
¡Jacobpita miraq Israel runakunatam Dios Yaya salvashqa!
¡Poderösu kanqantam musyatsikushqa!
24Israel runakuna, mamaykikunapa pachanchö kamashuqniki y salvashuqniki Dios Yayam niyäshunki:
<<Noqam imaykatapis kamaq Dios Yaya kä.
Ciëlutapis kikï kamarmi mashtamushkä.
Pipis mana yanapaykämaptinmi kay patsatapis kamashkä.
25<<Llulla profëtakuna willakuyanqannö mana kananpaqmi tsapata churä.
Adivïnukunatapis noqam manakaqman churä.
Yachayyuqkuna llutanta mana yätsikuyänanpaqmi yarpayninkunata pantatsï.
Niyanqankuna mana välinanpaqpis noqam permïtï.#1Cor. 1.20.
26Peru servimaqnï willakunqantam sïqa cumplitsï.
Willakuqnïkuna niyanqannölla kananpaqmi permïtï.
Jerusalénchö yapay täkuyänanpaqmi nï.
Judáchö markakunata raqällana kaykaqtam markaman yapay tikratsiyänaykipaq permïtï.
27Noqa niptïqa lamarpis jankatmi tsakiskin.
Noqam mayukunatapis tsakitsï.
28<<Noqam rey Cirupaq nï:
<Üsha mitsikuqnï karmi llapan munanqäta ruranqa>.
Tsaymi rey Ciro Jerusalénta yapay allitsatsinqa.
Tsaynöllam templupa cimientunta perqatsinqa>>.#2Crón. 36.23; Esd. 1.2.
Currently Selected:
Isaías 44: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
