Isaías 40
40
Jerusalén runakunata Dios Yaya shoqanqan
1Diosnintsikmi nin:
<<Kuyanqä runakunata shoqayay.
2Jerusalén mana llakikunanpaq alli shimillaykikunapa willaykuyay.
Alli cösa castigaykurmi jutsankunapita perdonashkä>>.
3Juk runam qayakuypa willakuykan:
<<Dios Yaya shamunanpaq desiertuchö nänita allitsayay.
Wiksu nänikunata derechayay.#Mat. 3.3; Mar. 1.3; Juan 1.23.
4Raqrakunatapis pampatsäyay.
Lömakunatapis parijayay.
Wiksu wiksu nänikunatapis derechayay.
Uchku uchkukunatapis pampatsäyay.
5 Dios Yaya shamurmi poderösu kayninwan salvanqa.
Tsaytam maytsaychö täkuq runakuna rikäyanqa.#Luc. 3.4-6.
Kikin Dios Yayam tsaynö kananpaq nimushqa>>.
6<<Jinchi qayakuy>> nimaqtam wiyashkä.
Tsaymi tapurqä: <<¿Imatatan qayakushaq?>>
Tsaynö tapuptïmi nimarqan:
<<Llapan runakunapis qewanö ushakaqllam.
Poderyuq kayninpis waytanö shushuqllam.
7Achaq wayrata Dios Yaya pükamuptinmi qewapis tsakin y waytapis shushun.
Runakunaqa rasunpam qewanölla kayan.
8Qewapis tsakinmi y waytapis shushunmi.
Peru Diosnintsikpa palabranmi sïqa imayyaqpis kaykanqa>>.#Stg. 1.10-11; 1Ped. 1.24-25.
9 Siónman alli willakuyta apaq runa, lömaman witsarkur pïmaypis wiyashunaykipaq jinchi qayakuy.
Jerusalénman alli willakuyta apaq runa, mana mantsakur jinchi qayakuy.
Judá markakunachö täkuqkunata niy:
<<¡Kaychönam Diosnintsik!>>
10Alläpa poderösu kayninwanmi Dios Yaya shamunqa.
Poderösu kayninwanmi chikiqninkunata venciskir kuyanqan runankunata qorimunqa.
11Mitsikuq runa ashkashta marqakurkur apaqnömi apamunqa.#Eze. 34; Luc. 15.5; Juan 10.11.
Tsayraq wachashqa üshatanömi cuidanqa.
Dios Yaya poderösu kanqan
12¿Piraq Dios Yayanö maki paltallanwan lamar yakuta tupunman?
Ciëlutapis Dios Yaya cuartaypa mïdinqannö ¿piraq mïdinman?
Kay patsachö allpatapis ¿piraq Dios Yayanö llapanta pësanman?
Jirkakunata y lömakunatapis ¿piraq Dios Yayanö balanzawan pësanman?#Job 38.4-11; Prov. 8.29.
13 Dios Yaya yarpanqanta ¿pillaqa musyantsuraq?
Yachayyuq kananpaq ¿pillaqa yachatsintsuraq?#Rom. 11.34; 1Cor. 2.16.
14Dios Yayaqa ¿pitapis rugakuntsuraq tantiyatsinanpaq?
Dios Yayata ¿pillapis tantiyatsinmantsuraq alli kanqanta o mana alli kanqantapis?
Yachayyuq kananpaq ¿pillaqa yachatsinmantsuraq?
15Dios Yayapaqqa llapan nacionkunapis shutu yakunöllam kayan.
Llapanpis balanzachö polvunöllam kayan.
Islakunachö nacionkunapis juk aptay arenïllanöllam kayan.
16Entëru Líbano muntita altarman churar waykashqapis y tsaychö wätakunata pishtashqapis manam aypanmantsu Dios Yayapaq sacrificiuta waykanapaq.
17Dios Yayapaqqa llapan nacionpis manakaqnöllam kayan.
18Dios Yayata ¿imamanraq iwalatsishwan?
¿Ima ïdulutaraq paytanö rurashwan?
19Ïdulutaqa moldiwanmi rurayan.
Yachayyuq runam qoriwan enchapan.
Qoripita ruraskirmi wallqata wallqatsiyan.
20Qorita mana tarirqa mana puyuq qerutam llaqllay yachaq runaman apan.
Tsay runanam mana kuyuq ïduluta rurapun.#Isa. 41.6-7; 44.9-20; Jer. 10.1-16; Hech. 17.29.
21Dios Yayapaqqa ¿manaku wiyayarqayki?
¿Manaku unaypitana niyäshushkanki?
¿Manaku kay patsata kamanqanpitana willakuyarqan?
22Dios Yayapam trönun ciëlu jananchö kaykan.
Tsaypitam chukllushtanölla runakunata rikämun.
Carpata runa mashtaqnömi ciëlutapis mashtan.
23Poderyuq runakunatam manakaqman churan.
Kay patsachö reykunatam ushakätsin.
24Ushakätsiptinmi imaypis mana plantashqanö, imaypis mana murushqanö y imaypis mana jawayuqnö ushakäyan.
Dios Yaya pükaskiptin qewa wañuqnömi paykuna wañuyan.
Oqshata wayra apaptin illakaqnömi illakäyan.
25 Santu Dios Yayam tapumantsik:
<<Qamkuna ¿imamanraq iwalatsiyämankiman?
¿Piraq noqaman iwalanman?>>
26Ciëluman rikar tantiyashun qoyllurkunata pï kamanqantapis.
Llapan qoyllurkunatam Dios Yaya yupan.
Shutinpam llapanta reqin.
Dios Yayaqa alläpa poderösu y kallpasapam.
Tsaymi tsay qoyllurkuna ni jukllayllapis oqrakäyantsu.
27Jacobpita miraqkuna, ¿imanirtan niyanki Dios Yaya mana llakipäyäshunqaykita?
Israel runakuna, ¿imanirtan niyanki Dios Yaya mana cäsuyäshunqaykita?
28 Dios Yayaqa imaypis kawaykanmi.
¿Manaku tsayta musyayanki?
¿Manaku tsayta wiyayashkanki?
Paymi kay entëru patsata kamarqan.
Payqa manam aywapakantsu ni pishipantsu.
Pay yarpanqanmi mana tantiyaypaq.
29Pishipashqakunatapis paymi yanapan.
Aywapakashqakunatapis paymi kutikätsin.
30Jövinkunapis jöven kaykarmi pishipäyan.
Kallpasapakunapis aywapakarmi ishkiyan.
31Peru Dios Yayaman confiakuqkunam sïqa kallpasapa tikrayan.
Paykunam pitsak päriqnö aywayan.#Sal. 103.5.
Mayjina cörrirpis manam pishipäyantsu.
Mayjina aywarpis manam bëtayantsu.
Currently Selected:
Isaías 40: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
