Hebreos 6

1Jesucristupita yachakurqa ama qallanan kaq yachatsikuykunallataqa yachakushuntsu, sinöqa qallananpita ushananyaq llapanta shumaq yachakushun. Tsaynöpam wamranölla kanqantsikpa rantin yashqa runanöna kashun. Manam yapay yapay yachakushwantsu Jesucristuman creyikur jutsa rurayta dëjanapaq kaqllata, Dios Yayaman creyikunapaq kaqllata, 2bautizakunapaq kaqllata, jukpa umanman makintsikta churanapaq kaqllata#Núm. 27.18, 23; Deut. 34.9; Hech. 6.6; 8.17; 9.12, 17; 19.6., wañushqakuna kawayämunanpaq kaqllata y kay patsa ushakaptin Dios Yaya runakunata juzgananpaq kaqllataqa. 3Dios Yaya yanapamashqam mas juk yachatsikuykunatapis yachakushun.

4Jesucristuman creyikushqana kaykar, Dios Yayapa kuyakuyninta musyaykar, Espíritu Santuta chaskikushqana kaykar, 5Dios Yayapa willakuyninta cäsukushqana kaykar y wak vïdapa poderninkunata rikashqana kaykar#6.5 Tsay podertam rikantsik jutsankunata dëjaskir Dios Yaya munanqannöna kawayaptin, Jesucristupa shutinchö milagrukunata rurayaptin y Espíritu Santupa poderninwan kuyanakuyaptin. 6Dios Yayata nëgaptinqa Dios Yayaman yapay kutitsiyta manam puëdintsiktsu. Jesucristuta yapay crucificaqnö tsay runa kaptinmi wakin runakunapis Jesucristuta manakaqman churayan.

7Tamyawan alli ushmushqa chakraqa ämunpaq allim wayun. Tsay chakraqa Dios Yayapa bendicionnintam chaskin. 8Peru kashakunalla y cardonkunalla wiñanqan chakram sïqa välintsu. Tsaynö chakrataqa maldicionarmi waykaskiyan.

9Kuyashqa wawqikuna y panikuna, tsaynö nirpis manam mana alli chakranö kayanqaykitatsu yarpäyä, sinöqa yarpäyä salvashqana kar Dios Yaya munanqannö kawakuyänaykipaq kanqantam. 10Dios Yayaqa manam qonqanqatsu payta kuyar creyikuq majikikunata yanapaykäyanqaykita.

11Juknin jukninwanpis wañuyanqaykiyaq tsaynö kawakuyänaykitam munayä. Tsaynö kawakurqa Dios Yaya shuyätsiyäshunqaykitam chaskiyanki. 12Tsaynöllam qeläkuyankitsu, masbienmi Dios Yayaman wakin creyikuqkuna kawakuyanqannö qamkunapis payman creyikur imaypis kawakuyanki. Tsaynö kawakurqa pay prometinqankunatam chaskiyanki.

Dios Yaya prometinqanta cumplinqan

13Abrahamta prometirmi kikinpa shutinchö Dios Yaya cumplinanpaq jurarqan. Kikinpa shutinchö tsaynö jurarqan paypita mas poderösu pipis mana kaptinmi. 14Jurarmi nirqan: <<Rasunpam bendicionnïta qamman churamushaq. Tsaynöllam maytsikaman mirayänanpaq qampita miraq aylluykikunata yanapashaq>>.#Gén. 22.16-17. 15Tsaynö prometiptinmi Abraham mana ajayaypa shuyar Dios Yaya prometinqanta chaskirqan.

16Prometinqanta cumplinanpaq pipis jurarqa kikinpita mas poderyuqpa shutinchömi juran. Tsaynö jurarmi imaykanöpapis cumplinan. 17Tsaymi Dios Yayapis Abrahamta prometinqanta cumplinanpaq jurarqan. Tsaynö jurarqan imaypis cumplinanpaq kanqanta musyanapaqmi.

18Dios Yaya jurar prometinqanta musyar y imaypis mana llullakunqanta musyarmi prometinqanta imaypis cumplinanpaq kanqanta musyantsik. Tsaymi payman confiakurqa kushishqa kawakuntsik. 19Payman confiakunqantsikqa jinchi y alli tsaraq anclanömi#6.19 Anclaqa jatusaq anzuëlayuq fiërrum. Büquita ichïtsiyänanpaqmi anclaman y büquiman waskata watarkur lamarman jitarpuyan. kaykan. Gloriachö kaykaq Lugar Santïsimuta tsaparaq cortïnapa#Heb. 9.2-8. päsatsimarnintsikmi Dios Yayapa puntanman chätsimantsik. 20Perdonashqa kanapaqmi Jesucristo imayyaqpis mandakuq sacerdöti kar noqantsikpita mas puntata tsayman yaykurqan. Paymi imayyaqpis Melquisedecnö mandakuq sacerdöti.

Currently Selected:

Hebreos 6: qxn

Highlight

Copy

Compare