Hebreos 5

1Mandakuq sacerdötitaqa Dios Yayam akran tsaki mikuy ofrendakunata y sacrificiukunata altarchö waykaptin runakuna jutsankunapita perdonashqa kayänanpaq. 2Sacerdötiqa runalla karmi imaykachöpis jutsata rurar runa majinkuna mana tantiyakur jutsata rurayaptin llakipan. 3Tsaymi kikinpa jutsankunapita y runa majinkunapa jutsankunapita sacrificiuta waykan.#Lev. 9.7.

4Kikinpa munayllanpitaqa manam pipis mandakuq sacerdöti kananpaq yaykuntsu. Tsaypa rantinmi Dios Yaya churaptinraq mandakuq sacerdöti kananpaq pipis yaykun. Aarónpis Dios Yaya churaptinraqmi mandakuq sacerdöti karqan.#Éxo. 28.1. 5Manam Jesucristupis kikinpa munayllanpitatsu mandakuq sacerdöti karqan, sinöqa Dios Yaya churaptinraqmi. Paytam Dios Yaya nirqan: <<Qammi tsurï kanki. Kanan junaqpitam taytayki kä>>.#5.5 Kanan junaqpitam taytayki kä ninqanqa manam puntata Tsurin mana kanqantatsu nin, sinöqa Jesucristo Dios Yayapa Tsurin kanqanta tsay junaqpita musyatsinqantam nin. Tsaynö musyatsirqan wañunqanpita Jesucristuta kawaskatsimurmi (Hech. 13.33).#Sal. 2.7. 6Dios Yayam palabranchö mastapis nirqan: <<Qammi imayyaqpis Melquisedecnö sacerdöti kanki>>.#Sal. 110.4.

7Jesucristum kay patsachö kawanqan witsay waqayparaq y qayarayparaq Dios Yayata mañakurqan. Tsaynö mañakurqan wañuypita salvananpaq Dios Yaya poderösu kanqanta musyarmi. Dios Yaya ninqanta Jesucristo cumpliptinmi rugakunqanta wiyarqan. 8Dios Yayapa Tsurin karpis sufrirraqmi cäsukuyta yachakurqan.#5.8 Manam Jesucristo mana cäsukuq kanqantatsu kay textu nin, sinöqa imanö sufrirpis Dios Yayata cäsunanpaq yachakunqantam nin.#Mar. 14.32-42; Juan 10.18; Fil. 2.8. 9Tsaynö yachakurmi poderösu kaykan payta cäsuqkunata salvananpaq. 10Tsaymi Dios Yaya payta churarqan Melquisedecnö mandakuq sacerdöti kananpaq.

Creyikuyanqanta mana dëjayänanpaq ninqan

11Kaykunapaq tantiyatsiyänaqpaqqa atskaraqmi kan. Tsaynö kaptinpis ajataraq tantiyayaptikim mastaqa yachatsiyaynikita puëdïtsu. 12Kananyaqqa unaynam yachatsikuqna kayankiman. Peru tsaynö kaptinpis qallananpitaraqmi yapay yachakuyta munaykäyanki. Pishi wamra mikuyta manaraq yachar lichillataraq chuchuqnömi kaykäyanki. 13Chuchuykaq wamranö karmi tantiyayankiraqtsu Dios Yaya munanqannö kawakuyänaykipaq kanqanta.#1Cor. 3.2. 14Qamkunaqa chukru mikuyta mikuqnönam kayankiman. Tsaynö karqa alli kaqta y mana alli kaqta tantiyarmi Dios Yaya munanqannö kawakuyanki.

Currently Selected:

Hebreos 5: qxn

Highlight

Copy

Compare