Hebreos 7

Melquisedec pï kanqanta tantiyatsinqan

1Melquisedecqa Salem markapa mandakuqnin rey y poderösu Dios Yayata serviq sacerdötim karqan. Guërrachö reykunata vencinqanpita Abraham kutiykämuptinmi Melquisedec tinkupaykur Abrahamman bendicionta churar Dios Yayata mañakurqan. 2Abrahamnam guërrachö venciskir llapan qorimunqankunapita diezmuta Melquisedecta qararqan.#Gén. 14.17-20. Melquisedec ninanqa <<allillata ruraq rey>> ninanmi. Salem ninanqa <<alli kaway>> ninanmi. Tsaymi Melquisedecqa alli päsakuychö kawatsikuq rey karqan.

3Manam musyakantsu Melquisedec mayqan ayllupita kanqan ni maman ni taytan pï kanqanpis. Tsaynöllam musyakantsu imay yurinqan ni imay wañunqanpis. Tsaymi Diospa Tsurinnö imayyaqpis sacerdöti.

Abrahampita Melquisedec mas poderösu kanqan

4Melquisedecman diezmuta taytantsik Abraham entregaptinmi musyantsik Abrahampitapis Melquisedec mas poderyuq kanqanta. 5Leví trïbu sacerdötikunaqa Moisés qellqanqan leykunachö ninqannömi Israel majinkunapita diezmuta chaskiyan. Tsaynö chaskiyan Israel majinkuna paykunanölla Abrahampita miraq kaptinmi.#Núm. 18.21. 6Peru Melquisedecmi sïqa Leví trïbu mana kaykarpis Abraham entreganqan diezmuta chaskirqan. Diezmuta chaskiskirmi Abrahamman bendicionta churar Dios Yayata mañakurqan. Dios Yaya prometinqanta Abraham chaskishqa kaptinpis Melquisedec bendisaptinmi Abrahampita mas poderyuq kanqanta musyantsik. 7Musyanqantsiknömi bendisaq kaqqa bendicionta chaskiqpitapis mas poderyuq.

Leví trïbu sacerdötikunapita Melquisedec mas poderyuq kanqan

8Tsaynöllam Dios Yayapa palabranchö ni imaypis nintsu Melquisedec wañunqanta. Peru diezmuta chaskiq sacerdötikunam sïqa wañuqlla kayan. Tsaynö kaptinmi Leví trïbu sacerdötikunapitapis Melquisedec mas poderyuq kanqanta tantiyantsik.

9Melquisedecta Abraham diezmuta entregaptinmi Leví trïbu sacerdötikunapis Melquisedecta diezmuta entregaqnö kayarqan. 10Leví trïbu sacerdötikuna Abrahampita miraq karmi manaraq yurirpis Melquisedecta entregaqnö kayarqan. Tsaymi Melquisedecta Abraham diezmuta entregaptin Leví trïbu sacerdötikunapitapis Melquisedec mas poderyuq kanqanta tantiyantsik.

Melquisedecnö Jesucristo mandakuq sacerdöti kanqan

11 Moisés qellqanqan leykunachö ninqannölla sacrificiuta sacerdötikuna waykayanqanpita salvación kaptinqa Jesucristuta sacerdöti kananpaq Dios Yaya manam churanmantsu karqan. Sacerdöti kananpaq churaptinmi Jesucristuqa Aarónnötsu sacerdöti, sinöqa Melquisedecnömi.#7.11 Jesucristuqa Aarónnötsu sacerdöti ninanqa Jesucristo manam Leví trïbu sacerdötikunanötsu ninanmi.

12Sacerdöti kayta Dios Yaya tsaynö cambiarmi Moisés qellqanqan leykunatapis cambiarqan. 13Sacerdöti kananpaqqa Jesucristo manam Leví trïbupitatsu karqan, sinöqa juk trïbupitam. Paypa trïbunpitaqa manam pipis altarchö servinanpaq sacerdöti karqantsu. 14Señor Jesucristuqa Judá trïbupitam yurishqa. Tsay trïbupita sacerdöti kananpaq kaqtaqa Moisés qellqanqan leykunachö manam ni imatapis nintsu.

15Melquisedec sacerdöti kanqannö Jesucristupis sacerdöti kananpaq shamushqa kaptinmi Moisés qellqanqan leykunata Dios Yaya cambianqanta musyantsik. 16Leví trïbupita mana kaykarpis imayyaqpis kawaq kaptinmi sacerdöti kananpaq payta Dios Yaya churarqan. 17Paypaqmi Dios Yayapa palabranchö nin: <<Qammi imayyaqpis Melquisedecnö sacerdöti kanki>>.#Sal. 110.4.

18Mandakuq sacerdöti kananpaq Jesucristuta churarmi leychö sacerdötikunapaq ninqankunata Dios Yaya cambiarqan. Tsay leykuna ninqannö Leví trïbu sacerdötikuna cumpliyaptinpis manam tsaynötsu runakuna perdonta tariyan. 19Tsay leykunaqa manam pitapis salvantsu. Peru Jesucristum sïqa salvamarnintsik Dios Yayapa puntanman chätsimantsik.

Jesucristo imayyaqpis sacerdöti kananpaq Dios Yaya juranqan

20Jesucristuta imayyaqpis sacerdöti kananpaq churarmi Dios Yaya jurar prometirqan. Leví trïbu sacerdötikunata churarqa manam jurartsu prometirqan. 21Peru Jesucristutam sïqa prometir nirqan:

<<Dios Yayam jurarnin änishurqayki:

<Qammi imayyaqpis [Melquisedecnö] sacerdöti kanki>.

Tsaynö prometishunqaykita cumplinanpaqmi jurarqan.

Prometinqantaqa manam qonqanqatsu>>.#Sal. 110.4.

22Tsaynö nir juraptinmi Dios Yaya mushuq pactuta cumplinanpaq Jesús garantiantsik. Mushuq pactuqa mas allim kaykan Israel runakunawan punta kaq ruranqan pactupitapis.

23Punta kaq pactuchöqa mandakuq sacerdöti wañuptin juknam rantin yaykuq. 24Peru Jesucristum sïqa mana ushakaq kar imayyaqpis mandakuq sacerdöti. 25Tsaymi payman creyikuqkunata imaypis salvan Dios Yayapa puntanman chäyänanpaq. Tsaynöllam salvashqa kaqkunapaq Dios Yayata imaypis mañakuykan.

26Jesucristo mandakuq sacerdöti kaptinmi kushikuntsik. Paymi jutsannaq santu kar Dios Yaya munanqannö kawakurqan. Jutsa ruraq runakunawan purirpis manam jutsata rurarqantsu. Ciëluchöpis llapanpita mas respitashqam kaykan.

27Kay patsachö mandakuq sacerdötikunaqa kikinkunapa y wakin runakunapa jutsankuna perdonashqa kananpaqmi#Lev. 9.7. waran waran wätata pishtaskir altarchö waykayan. Peru Jesucristum sïqa jutsantsikpita perdonashqa kanapaq juk kutilla kikin wañurqan.

28Mas unaynam Moisés qellqanqan leykunachö ninqannö ushakaq y jutsayuq runakunallam mandakuq sacerdötikuna kayarqan. Tsaypitanam Dios Yaya jurar kikinpa Tsurinta mandakuq sacerdöti kananpaq churarqan. Payqa manam ushakaqtsu ni jutsayuqtsu, sinöqa imayyaqpis kawaq y jutsannaq mandakuq sacerdötim.

Currently Selected:

Hebreos 7: qxn

Highlight

Copy

Compare