Hageo 1

1 Dios Yayapa willakuyninta profëta Hageo willakunqanmi kaychö qellqashqa kaykan. Paymi rey Darío Persia nacionchö mandakunqan ishkay watamanna aywaykaptin soqta kaq killa punta kaq junaqchö willakurqan.#1.1 Calendariuntsikchöqa tsay junaq 29 de agostu wata 516 a. C. karqan. Tsaynömi willakurqan Judápa gobernadornin Zorobabelpaq y mandakuq sacerdöti Josuépaq. Zorobabelqa Salatielpa tsurinmi karqan. Josuénam Josadacpa tsurin karqan.#Esd. 4.24—5.2; 6.14.

2Llapanta mandaq Dios Yayam Israel runakunata nin: <<Qamkunam nikäyanki: <Dios Yayapa templunta yapay shäritsinapaq manaraqmi tiempu chämunraqtsu> >>.

3Tsaymi Dios Yayapa willakuyninta profëta Hageo willakur nirqan: 4<<¿Templü juchushqa kaykaqta rikaykarku qamkunaqa shumaq rurashqa wajikikunachö kushishqa kaykäyanki?>>

5Llapanta mandaq Dios Yayam nin:

<<Imanö kawayanqaykita shumaq tantiyakuyay.

6Maytsikata mururpis wallkallatam cosechayanki.

Atskata mikuyaptikipis pachaykikuna manam juntantsu.

Yakuta upyayaptikipis yakunaynikikuna manam pärantsu.

Rakta llatapata shukuyaptikipis manam qoñütsiyäshunkitsu.

Alli arupukurpis wanayanqaykipaq manam paqtäpukuyankitsu>>.

7Llapanta mandaq Dios Yayam nin:

<<Imanö kawayanqaykitapis shumaq tantiyakuyay.

8Templüta yapay shäritsiyänaykipaq muntikunapa aywar qeruta apayämuy.

Templüta shäritsiyaptikim kushikushaq.

Tsaychömi kushishqa alabayämanki.

9<<Atskata cosechayta yarparpis wallkallatam cosechayanki.

Wajikikunaman churayanqaykitapis juk pükayllam ushakätsï.

Imanir tsaynö ruranqäta tantiyakuyay.

Tsaynö rurä templü juchutsishqa kaykaqta rikaykarpis kikikikunapa wajillaykikunapaq yarpachakuyaptikim.

10Tsaynö kayaptikim tamyatsimütsu.

Tsaymi chakraykikunachö muruyanqaykipis wayunnatsu.#Lev. 26.18-20.

11Alläpa usyänanpaq noqam permïtishkä.

Tsaymi trïgupis, üvapis, olïvupis, ni ima mikuypis wayunnatsu.

Wätakunapaqpis manam qewa kannatsu.

Runakunapis manakaqllapaqmi aruyan>>.

Templuta shäritsir qallayanqan

12Profëta Hageo willakunqanta wiyarmi Salatielpa tsurin Zorobabel, Josadacpa tsurin mandakuq sacerdöti Josué y wakin runakunapis mantsakar Dios Yaya ninqanta cäsuyarqan. 13Tsaymi profëta Hageuwan willakatsir Judá runakunata Dios Yaya nirqan: <<Noqaqa yanapayänaqpaq qamkunawanmi kaykä>>.

14Tsaynö nirmi aruyänanpaq Dios Yaya animatsirqan. Tsaymi Judápa gobernadornin Zorobabel, mandakuq sacerdöti Josué y wakin runakunapis llapanta mandaq Dios Yayapa templunta shäritsiyta qallaykuyarqan.#Esd. 5.2. 15Arurmi qallaykuyarqan soqta kaq killa ishkay chunka chusku (24) junaqchö.#1.15 Calendariuntsikchöqa tsay junaq 21 de setiembri wata 520 a. C. karqan. Tsayqa karqan rey Darío ishkay watana mandakuq kaykaptinmi.#Esd. 5.2.

Currently Selected:

Hageo 1: qxn

Highlight

Copy

Compare