Sofonías 3
3
Jerusalén runakunata castigananpaq ninqan
1¡Allaw mana cäsukuq Jerusalén runakuna!
Qamkunam alläpa jutsasapa kayanki.
Pïmaytapis alläpam sufritsiyanki.
2Qamkunaqa pï willayäshuptikipis manam wiyakuyankitsu.
Corrigiyäshuptikipis manam cäsuyankitsu.
Dios Yayamanpis manam confiakuyankitsu.
Payta manam mañakuyllapis mañakuyankitsu.
3Mallaqar qayaraykachaq leonkunanömi autoridänikikunapis kayan.
Jueznikikunapis imayka mallaqashqa atuqkuna tullullantapis mana dëjaqnömi kayan.
4Profëtaykikunapis mana respitakuq y llullakuqmi kayan.
Sacerdötikikunapis sagrädu templutam impüruyätsiyan.#3.4 Templuta impüruyätsin Dios Yaya prohibinqanta tsaychö rurarmi. Tsaypaq masta musyanaykipaq liyinki Lev. 20.3; 21.12; Núm. 19.13, 20.
Dios Yayapa leyninkunatapis manam cumpliyantsu.
5Peru Dios Yayaqa imaypis Jerusalénchömi kaykan.
Payqa manam imatapis llutankunata rurantsu.
Cada alliqmi tantiyatsimantsik alli ruraq kanqanta.
Peru tsaynö kaykaptinpis jutsa ruraq runakunam mana allikunata rurar penqakuyantsu.
6Dios Yayam nin:
<<Atska nacionkunatam ushakätsishkä.
Törrinkunatapis juchutsirmi ushakätsishkä.
Pipis manana puriptinmi cällinkunapis tsunyaraykan.
Markankunapis llapanmi ushakashqa.
Tsaychöqa manam ni pipis täkunnatsu.
7Tsaypitam yarparqä:
<Tsay nacionkunata ushakätsinqäta rikarmi Jerusalénchö täkuq runakuna noqapita mantsakur llutan ruraykunata dëjaskiyanqa.
Cäsuyämaptinqa paykunata manam ushakätsishaqtsu>.
Peru tsaynö yarpaykaptïpis paykunaqa jutsa rurayman churakashqam kayan>>.
8 Dios Yayam nin:
<<¡Allaw tsay runakuna!
Juzganä junaq imay karpis chämunqam.
Llapan nacionkunata qorikaskatsirmi alläpa rabyatsiyämanqanpita castigashaq.
Nina rupar imaykata ushaqnömi kay patsachö täkuqkunata ushakätsishaq>>.
Runakunata salvananpaq Dios Yaya äninqan
9<<Tsaypitanam maytsaychö täkuq runakunata shutïchö alabayämänanpaq tantiyatsishaq.
Tsaynöpam shumaq willanakur juk shonqulla serviyämanqa.
10Mas karuchö täkuq runakunapis yanapanäpaqmi mañakayämanqa.
Tsay runakunaqa Etiopía nacionchö mayukunapita mas karuchömi täkuyan.
Tsaypitanam ofrendäkuna apayämunqa.
11Tsay witsaymi jutsata rurar kushikuqkunata qamkunapita qarqushaq.
Sagrädu lömächö manam allish tukuqkuna kayanqanatsu.
Tsaymi jutsata manana rurar penqakuyanqanatsu.
12<<Qamkuna täkuyanqaykichöqa qollmi shonqu y waktsa runakunallam täkuyanqa.
Paykunam noqallamanna confiakayämanqa.
13Israelchö kawaykar quëdaq runakunaqa mananam mana allikunata rurayanqanatsu.
Paykunaqa mananam llullakuyanqanatsu ni pitapis engañayanqanatsu.#Apoc. 14.5.
Tranquïlu mikukuq üshakunanömi kayanqa.
Manam ni pipis paykunata mantsakätsinqanatsu>>.#Sal. 23.2-4; Eze. 34.14-16.
14¡Sión runakuna, cantayay!
¡Israel runakuna, kushikur qayaykachäyay!
¡Jerusalén runakuna, llapan shonquykikunawan kushikuyay!
15 Dios Yaya mananam castigayäshunkinatsu.
Chikiyäshuqnikikunatam qarqunqa.
Dios Yayam mandakuqniki rey.#Zac. 9.9.
Qamkunawan kaykaptinqa manam imapitapis mantsakuyankinatsu.
16Tsaymi Jerusalén runakunata niyanqa:
<<Sión runakuna, mantsakuyanqaykipa rantin ¡valorakuyay!>>
17Qamkunawanmi Dios Yaya kaykan.
Poderösu kayninwanmi salvayäshunki.
Kuyayäshurnikim mushuq kawayta qarayäshunki.
Qamkunapaq alläpa kushikurmi 18fiestata ruraqnö cantanqa.
Dios Yayam nin:
<<Manana ñakayänaykipaqmi yanapayäshayki.
Manam penqakuypaqnatsu kayanki.
19Tsay witsay sufritsiyäshuqnikikunatam kikï ushakätsishaq.
Tsaypitam oqrakashqa üshata qorimuqnö maytsaypitapis qoriyämushayki.
Pakikushqa üshata jampiqnömi jampiyäshayki.#Miq. 4.6-7.
Manam ni pipis musyapäyäshunkinatsu.
Masbienmi yanapayäshunki maytsaychöpis respitashqa y aläbashqa kayänaykipaq.
20Tsay witsaymi maytsaypita qoriyämushayki.
Juklä nacionkunaman apayäshuqnikikuna rikaykäyaptin kutitsiyämuptiqmi pïmaypis kushikur respitayäshunki.#Gén. 12.2-3; Zac. 10.8-12.
Noqa Dios Yayam nï>>.
Currently Selected:
Sofonías 3: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
