Hageo 2

Mushuq templu kuyakuypaq kananpaq kanqanta willakunqan

1Tsay watallachömi qanchis killa ishkay chunka juk (21) junaqchö#2.1 Calendariuntsikchöqa tsay junaq 17 de octubri wata 520 a. C. karqan. profëta Hageuta Dios Yaya nirqan: 2<<Judápa gobernadornin Zorobabelta, mandakuq sacerdöti Josuéta y wakin runakunatapis niy:#Esd. 3.1-2. 3<Punta kaq templuta rikaqkuna musyayanmi kuyakuypaq kanqanta. Kananqa ¿imanötan kaykan? ¿Manaku manakaqman churashqa kaykan?>#Esd. 3.12.

4<<Dios Yayam nin: <¡Zorobabel, valorakuy! Mandakuq sacerdöti Josué, ¡qampis valorakuy! Kay nacionchö täkuqkuna, ¡llapayki valorakuyay! Qamkunawan kaykaptïqa animatsinakurnin llapayki aruyay. 5Unay castaykikuna Egiptupita yarqayämuptinmi pactuta rurarqä imaypis yanapanäpaq.#Éxo. 29.45-46. Tsaymi qamkunawanpis Espïritü kaykan. Tsaynö qamkunawan kaykaptïqa ama mantsakuyaytsu.

6<< <Ichikllanam faltan ciëluta, kay patsata y lamartapis tsuktsukyätsinäpaq.#Heb. 12.26. 7Tsaynöllam llapan nacionkunatapis tsuktsukyätsishaq. Tsaynö ruraptïmi imayka riquëzankunata kay templuman apayämunqa. Tsaynöpam kay templuchö kuyakuypaq kaqkunapis junta kanqa. Noqa llapanta mandaq Dios Yayam tsaynö nï.

8<< <Noqapam qellaywan qoripis kaykan. 9Kanan shäritsiyanqayki templuqa punta kaq templupitapis mas kuyakuypaqmi kanqa. Tsaymi kaychö llapaykipis tranquïluna kawakuyanki. Noqa llapanta mandaq Dios Yayam tsaynö nï> >>.

10Rey Darío ishkay watana mandakuq kaykaptinmi isqun killa ishkay chunka chusku (24) junaqchö#2.10 Calendariuntsikchöqa tsay junaq 18 de diciembri wata 520 a. C. karqan. profëta Hageo Dios Yayapa willakuyninta willakur nirqan: 11<<Llapanta mandaq Dios Yayam nin: <Leynïkunapaq sacerdötikunata tapunki: 12<<Sacrificiuta waykayänanpaq pipis sagrädu aytsata llatapanwan pitushqa apaptin llatapanpa puntan vïnuman o aceitiman o ima mikuymanpis töpaptin ¿tsay vïnu, aceiti o ima mikuypis sagrädutsuraq kanqa?>> > >>

Tsaynö tapuptinmi sacerdötikuna niyarqan: <<Manam>>.

13Tsaynam Hageo yapay tapurqan: <<Juk runa ayata yatanqanpita impüru kaykar#Núm. 19.11-13. mikuykunata yataptin ¿tsay mikuykunapis impürutsuraq kanqa?>>

Tsaynö tapuptinmi sacerdötikuna niyarqan: <<Awmi, tsayqa impürum kanqa>>.

14Tsaynam Hageo nirqan: <<Dios Yayam nin: <Tsaynöllam kay runakunapis impüru kayan. Tsaymi llapan rurayanqan y noqapaq apayämunqanpis impüru kaykan.

15<< <Templüta manaraq shäritsiyta qallar ima päsayäshunqaykitapis shumaq tantiyakuyay. 16Ishkay chunka (20) säcu mikuyta qoriyänaykipaq mururpis chunka säcullatam cosechayarqayki. Pitsqa chunka (50) puyñu#2.16 Wakin runakunaqa uyllu niyan. vïnuta jorquyta yarparpis ishkay chunka (20) puyñullatam jorquyarqayki. 17Usyawan, ranchawan y runtu tamyawanmi llapan murukuyanqaykitapis ushakätsishkä. Tsaynö ruraykaptïpis qamkunaqa manam templüta shäritsiyashkankitsu.

18<< <Kananmi kaykantsik isqun killa ishkay chunka chusku (24) junaqchö. Kanan junaqmi templüpa cimientunkunata allitsarnin qallayashkanki. 19Tsaymi kananpita bendicionnïta llapan aruyanqaykiman churamushaq. Tsaynö churamuptïmi qollqaykikunachö mikuynikikuna ushakanqatsu y üvaykikuna, hïgusnikikuna, granadïllaykikuna y olïvu jachaykikunapis alli wayunqa> >>.

Zorobabelpaq Dios Yaya ninqan

20Tsay junaqllam Hageuta Dios Yaya yapay nirqan: 21<<Judápa gobernadornin Zorobabelta willay ciëluta y kay patsatapis tsuktsukyätsinäpaq kanqanta. 22Reykunatam manakaqman churashaq. Poderyuq nacionkunapis vencishqa kayänanpaqmi permïtishaq. Guërra carrëtakuna manijaqkunatam qochpätsishaq. Bestiankuna montashqa aywaqkunapis kikinkunapurallam wañutsinakuyanqa. 23Salatielpa tsurin servimaqnï Zorobabel, tsay junaqmi sëllakunä sortïjänö kanaykipaq churashayki.#2.23 Sortïjänö kanaykipaq churashayki ninqanqa noqapa shutïchömi mandakunki ninanmi. Mandakuq kanaykipaqmi akrashkaq. Noqa llapanta mandaq Dios Yayam tsaynö nï>>.

Currently Selected:

Hageo 2: qxn

Highlight

Copy

Compare