Daniel 6
6
Leonkuna qaykuraykanqanman Danielta jitarpuyanqan
1 1 (2) Nacionnin alli mandashqa kananta munarmi rey Darío pachak ishkay chunka (120) mandäsiqninkuna churarqan. 2 2 (3) Mandäsiqninkunata controlayänanpaqmi kimsa ministrukunata churarqan. Tsay kimsanpita juknin ministrum Daniel karqan. Tsay ministrukunam mandäsiqnin runakunata imatapis rey ninqanta ruratsiyaq.
3 3 (4) Wakin ministrukunapitapis Daniel mas yachayyuq kaptinmi rey yarparqan llapan nacionchö mandakäsinanpaq. 4 4 (5) Wakin kaq ministrukuna y mandäsiqkuna musyaskirmi Danielpa contran shäriyarqan. Tsaymi culpatsayänanpaq ima achäquillatapis ashiyarqan. Peru Danielqa cäsukuq karmi ni imatapis mana allita rurarqantsu ni qeläkurqantsu. Tsaymi imapitapis culpatsayta puëdiyarqantsu. 5 5 (6) Tsayta tantiyaskirmi niyarqan: <<Manam ni imapitapis culpatsayta puëdintsiktsu. Peru Diosninta adoranqanllawanmi trampaman ishkitsishun>>.
6 6 (7) Tsaynöpam ministrukuna y mandäsiqkuna reywan parlaq aywayänanpaq willanakuyarqan. Chaykurmi niyarqan: <<Taytay rey Darío, ¡qamlla imayyaqpis rey kaykullay! 7 7 (8) Llapä autoridäkuna qorikaskirmi willanakuyashkä juk leyta ruratsinaykipaq. Pipis qamta adorashunqaykipa rantin juk diosta o juk runata adoraptinqa leonkuna qaykuräyanqanman jitarpuyätsun. Tsay ley katsun kananpita kimsa chunka (30) junaqyaq. 8 8 (9) Tsay leyta llapan cäsuyänanpaq qellqaskatsir willakatsiy. Mandanqayki Media y Persia nacionkunapa leyninchö ninqannö tsay ruranqayki leytaqa manam ni pï anulanqatsu ni cambianqatsu>>.
9 9 (10) Tsaymi leyta qellqaskatsir rey Darío firmarqan. 10 10 (11) Tsay ley qellqatsinqanta musyaskirmi Danielqa puñunqan cuartunman lätarkur Jerusalén kaqlä ventänata kicharqan. Tsaychömi waran waran kimsa kuti imaypis mañakunqannö qonqurikuykur Dios Yayata mañakur alabarqan.
11 11 (12) Tsay acusaq runakuna chaykurmi Dios Yayata Daniel mañakuykaqta tariyarqan. 12 12 (13) Tsaynö tariskirmi reyman aywar niyarqan: <<Taytay rey, musyanqaykinömi qamta adorashunqaykipa rantin ima diostapis o pï runatapis adorayaptinqa leonkuna qaykuräyanqanman jitarpuyänanpaq nishkanki. Kimsa chunka (30) junaq tsaynö kananpaqmi leyta maytsayman apatsishkanki>>.
Tsaymi rey nirqan: <<Awmi, tsaynö cumpliyänanpaqmi ordenashkä. Mediapa y Persiapa leyninkunachö ninqannömi tsay ruratsinqä leytaqa ni pipis anulanqatsu ni cambianqatsu>>.
13 13 (14) Tsaynam niyarqan: <<Judá nacionpita prësu apayämunqan Danielmi cäsushunkitsu ni firmanqayki leytapis respitantsu. Paytam waran waran kimsa kuti Diosninta mañakuqta rikäyashkä>>.
14 14 (15) Tsayta wiyaykurmi rey alläpa mantsakar imaykanöpapis Danielta salvayta munar qoyat yarpachakurqan. 15 15 (16) Peru tsay runakunanam yapay kutiykur reyta niyarqan: <<Musyanqaykinömi Mediapa y Persiapa leyninchö ninqannö tsay ruratsinqayki leyta ni pipis anulanqatsu ni cambianqatsu>>.
16 16 (17) Tsaynam leonkuna qaykuräyanqanman jitarpuyänanpaq rey mandarqan. Danieltanam nirqan: <<¡Creyikunqayki Diosniki salvaykulläshuy!>>
17 17 (18) Jitarpurmi jatun rumiwan punkuta tsapäyarqan. Danielta sentenciar cumpliyanqanta musyayänanpaqmi reywan autoridäkunapis sëllunkunawan sëllayarqan. 18 18 (19) Tsaypitanam palaciunman rey kutiskir mikuytapis munarqantsu ni müsicatapis wiyayta munarqantsu. Yarpachakurmi puñukaytapis puëdirqantsu.
19 19 (20) Patsa waraskiptinnam atsik atsikllana leonkuna qaykuräyanqanman rey apurädu aywarqan. 20 20 (21) Chaykurnam alläpa llakishqa qayarqan: <<Imayyaqpis kawaq Diosta serviq Daniel, imaypis servinqayki Dios ¿leonkunapita salvashushkankiku?>>
21 21 (22) Qayaptinmi Daniel nimurqan: <<¡Qamlla imayyaqpis rey kaykullay! 22 22 (23) Jutsannaq kanqäta musyarmi angelninta Diosnï kachakamushqa leonkunapa shiminkunata tsapaptin mana mikuyämänanpaq. Taytay rey, qampa contrayki manam imatapis rurashkätsu>>.
23 23 (24) Tsaymi rey alläpa kushikur leonkuna qaykuräyanqanpita Danielta jina höra jipitsimurqan. Dios Yayaman Daniel confiakuptinmi leonkuna ni achpiyllapis achpishqatsu kayarqan.
24 24 (25) Tsaypitam Danielpa contran shäriq runakunata, warminkunata y tsurinkunatapis leonkuna qaykuräyanqanman jitarpuyänanpaq rey prësu apatsimurqan. Jitarpuyaptinmi manaraqpis patsaman chäyaptin leonkuna achkupäkuskir tullunkunatapis kaptur jankat ushayarqan.
25 25 (26) Tsaypitanam rey Darío juk leyta qellqarkur apatsirqan may markachö y may nacionchö täkuqkunaman y ima idiömata parlaqkunamanpis. Tsay leymi nirqan:
<<Qamkunachö alli kaway kaykullätsun. 26 26 (27) Kananmi noqa ordenayaq mandakunqä llapan nacionkunachö Daniel adoranqan Diospita mantsakur adorayänaykipaq.
Paymi imayyaqpis kawaq Dios Yaya.
Paypa mandakuyninqa manam imaypis ushakanqatsu.
Tsaynöllam poderösu kayninpis mana ushakaq.
27 27 (28) Paymi cuidamantsik y imayka peligrupitapis salvamantsik.
Paymi ciëluchö mantsakaypaq kaqkunatapis rikakätsimun.
Kay patsachömi milagrukunata ruran.
Paymi leonkunapita Danielta salvashqa>>.
28 28 (29) Tsaymi Persia nacionpa mandakuqnin rey Darío mandakunqan witsay y rey Ciro mandakunqan witsay Daniel respitashqa karqan.
Currently Selected:
Daniel 6: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
