Daniel 5

Perqachö juk maki qellqanqan

1Babiloniapa mandakuqnin rey Belsasar fiestata rurarmi waranqa (1,000) mandäsiqninkunata paqta mikuyänanpaq qayatsirqan. Tsaychömi paykunawan vïnuta machäyanqanyaq upyayarqan. 2-3Macharkurmi rey Belsasar mandarqan taytan Nabucodonosor Jerusalén templupita apamunqan qoripita y yuraq qellaypita väsukunata jipiyämunanpaq. Tsaykunatam jipiyämurqan mandäsiqninkunawan, warminkunawan y concubïnankunawan upyayänanpaq. Mandanqannö apayämuptinmi tsay väsukunawan vïnuta upyayarqan. 4Vïnuta upyarmi qoripita, qellaypita, broncipita, fiërrupita, qerupita y rumipita rurashqa diosninkunata alabayarqan.

5Tsay höram palaciupa sälanchö runapa makin illaqpita yurikaskir chiwchi atsikyaykaq qepan yuraq perqachö qellqarqan. Tsay qellqaykaq makita rikaykurmi 6rey alläpa mantsakar upilakaskirqan. Qonqurnin alläpa tsuktsukyaptinmi ichiränanpaq kallpanpis karqantsu. 7Tsaymi brüjukunata, qoyllur estudiaqkunata y suerti qatiqkunata qayaykatsir rey nirqan: <<Mayqaykipis kay qellqaraykaqta liyiskir ima ninqantapis tantiyatsimaq kaqtaqa granäti llatapatam shukutsishaq. Tsaynöllam qoripita rurashqa wallqata wallqatsishaq. Tsaypitam noqawan paqta mandakunanpaq churashaq>>.

8Tsaymi llapan yachayyuqkunata qayatsinqanpis perqachö qellqashqa kaykaqta liyirpis mana tantiyar reyta ni ima niyta puëdiyarqantsu. 9Tsaymi Belsasar alläpa mantsakar jankat upilakaskirqan. Mandäsiqninkunapis ni imanakayta puëdiyarqantsu.

10Rey y mandäsiqninkuna mantsakar qayaykachäyanqanta wiyaskirmi maman reina mikuykäyanqanman yaykurqan. Yaykuskirnam reyta nirqan: <<¡Qamlla imayyaqpis rey kaykullay! Ama mantsakaytsu ni upilakaytsu. 11Kay mandakunqayki nacionchömi juk runata llapan dioskuna yanapayan. Taytayki Nabucodonosor mandakuq kanqan witsaymi dioskunanöraq tsay runa imatapis allish tantiyaq karqan. Tsaymi taytayki payta churarqan llapan adivïnukunapa, brüjukunapa, qoyllur estudiaqkunapa y suerti qatiqkunapa mandakuqnin kananpaq. 12Paypa shutin Daniel kaptinmi shutinta taytayki cambiarqan Beltsasarta. Danielqa imatapis alli yachayyuq karmi runakuna sueñuyanqan imapaq kanqantapis musyan. Tsaynöllam ima aja kaptinpis alli justiciata rurananpaq tantiyan. Payta qayatsimuy perqachö qellqashqa kaykaq ima ninqantapis tantiyatsishunaykipaq>>.

13Tsaynö niptinmi Danielta qayaskatsir rey tapurqan: <<¿Qamku kanki Judá nacionpita taytä prësu apamushunqayki? 14Qampaqmi willayämashqa dioskuna yanapashuptiki imatapis allish tantiyanqaykita.

15<<Perqachö qellqaraykaqta liyiskir imapaq kanqantapis willayämänanpaqmi yachaqkunata, brüjukunata, qayatsimushkä. Peru qellqashqa kaykaqta liyirpis manam ima ninqantapis tantiyayantsu. 16Qampaqmi willayämashqa aja tantiyaypaq kaqkunatapis tantiyanqaykita y mayjina aja kaptinpis alli justiciata ruranqaykita. Tsaymi mañakuq perqachö qellqaraykaqta liyiskir imapaq kanqanta tantiyaykatsimänaykipaq. Tantiyatsimaptikiqa granäti llatapatam shukutsishayki. Tsaynöllam qoripita rurashqa wallqata wallqatsishayki. Tsaypitanam mandakunqä nacionchöpis noqawan paqta mandakunaykipaq churashayki>>.

17Tsaynam Daniel nirqan: <<Tsay qaramänaykipaq kaqkuna kikikipaq katsun o pitapis qaraykuy. Perqachö qellqaraykaqta liyiskirmi imapaq kanqantapis tantiyatsishayki.

18<<Taytay rey, taytayki Nabucodonosortam poderösu Dios Yaya yanaparqan maytsay nacionkunata poderninchö katsinanpaq, respitashqa kananpaq y mandakuq kananpaq. 19Taytayki poderyuq karmi pitapis munanqan kaqta wañutsiq y mana munanqan kaqtana wañutsiqtsu. Wakintanam churaq mas mandakuq kayänanpaq y wakin kaqtanam mandakuq kayanqanpita qarquq. Tsaynö poderyuq kaptinmi llapan nacionkunachö y markakunachö täkuq runakuna ima idiömata parlaqkunapis paypita mantsakuyarqan.

20<<Peru orgullösu tikraskir munanqanta ruraptinmi mandakuq kanqanpita Dios Yaya qarqurqan. 21Runa majinkunapita qarquskiptinmi yarpayninpis wätapanö tikrarqan. Tsaymi chucaru ashnukunawan paqta kar törunö qewata mikur kawarqan. Cuerpuntanam shushall oqurqan. Tsaynömi kawarqan Dios Yayalla llapan mandaqkunapaqpis mas poderösu kanqanta tantiyanqanyaq. Dios Yayallam nacionchöqa mandakunanpaq pitapis munanqan kaqta churan.

22<<Taytay, Nabucodonosorpa tsurin karmi tsaynö päsanqanta musyaykar allish tukuykanki. 23Tsaymi ciëluchö kaykaq Dios Yayata rabyatsir templunchö üsayanqan väsukunata jipitsimushkanki. Tsaykunawanmi vïnuta upyayashkanki kikiki, mandäsiqnikikuna, warmikikuna y concubïnaykikunapis. Tsaypitam alabayashkanki qoripita, yuraq qellaypita, broncipita, fiërrupita, qerupita y rumipita rurashqa dioskunata. Tsay dioskunaqa manam rikäyantsu ni wiyayantsu ni imatapis musyayantsu. Peru poderösu Dios Yayataqa manam alabashkankitsu. Paypitaraq llapanta chaskishqa kaykarmi alläpa rabyatsishkanki. Paymi rey kanaykipaqpis churashushkanki.

24<<Tsaymi makita Dios Yaya kachamushqa perqachö qellqananpaq. 25Tsay qellqashqam nin: <Yupashqa, yupashqa, pësashqa, rakishqa>.#5.25 Arameo idiömachömi nin <<Mene, Mene, Tekel, Uparsin>>. 26<Yupashqa> nin mandakuq kanqayki junaqkuna yupashqalla kaptinmi. Tsay junaqkuna ushakashqana kanqantam Dios Yaya nishqa. 27<Pësashqa> nin balanzawan Dios Yaya pësashuptiki pësuyki alläpa pishiptinmi.#5.27 Pësuyki alläpa pishiptin ninanqa alläpa jutsasapa kaptiki ninanmi. 28<Rakishqa> nin mandakunqayki nacionta rakiskir Media y Persia runakunapa makinman churananpaq destinashqa kaptinmi>>.

29Tsaypitanam Belsasar yanapaqninkunata nirqan granäti llatapata Danielta shukutsiyänanpaq y qoripita rurashqa wallqata wallqatsiyänanpaq. Tsaynöllam paypa paqtan mandakunanpaq churarqan.

30Tsay paqasmi Babilonia#5.30 Hebreo idiömachömi Caldea nin. Caldeaqa Babiloniapa jukaq shutinmi. runakunapa mandakuqnin rey Belsasarta wañutsiyarqan. 31 31 (6.1) Tsaymi Media nacionpita rey Darío soqta chunka ishkay (62) watayuq kaykar Babilonia nacionta poderninman churarqan.

Currently Selected:

Daniel 5: qxn

Highlight

Copy

Compare