Daniel 7

Sueñuyninchö mantsaypaq chusku wätakunata Daniel rikanqan

1Babilonia nacionchö rey Belsasar juk watana mandakuq kaykaptinmi sueñuyninchö revelacionta Daniel rikarqan. Rikanqankunata qellqaskirmi 2Daniel nirqan: <<Kay patsapa chuskun lädupita alläpa wayrämuptin mantsakaypaq lamar laqchikaykaqtam sueñuynïchö rikarqä. 3Tsay lamarpitam mantsakaypaq jukläya jukläya chusku jatusaq wätakuna yarqayämurqan.#Apoc. 13.1; 17.8.

4<<Punta kaq wätam león rikuqlla karqan. Peru riprankunam pitsakpa riprannö karqan. Rikaraykaptïmi riprankunata jipiskir tsay wätata ishkan chakillanwan runanö ichiränanpaq ichïtsiyarqan. Tsaynöllam runanö yarpachakunanpaq yarpätsiyarqan.

5<<Ishkay kaq wätam ösu rikuqlla karqan. Jukaqlä waqtanmi pallarikashqa karqan. Shiminchömi kimsa custillakunata amurarqan. Tsay ösutam nirqan: <¡Sharkur melananqaykiyaq aytsata mikuy!>

6<<Tsaypitanam rikarqä leopardu rikuq wätata#Apoc. 13.2. waqtanchö chusku riprayuqta y chusku umayuqta. Tsay wätam mandakunanpaq autoridä kayta chaskirqan.

7<<Tsaypitam rikarqä chusku kaq wätata. Punta kaq rikanqä wätakunapita mas jukläyam karqan. Tsay wätaqa alläpa mantsaypaq kallpasapam karqan. Curmïllunkunapis fiërrupita jatusaq kaptinmi pï tarinqantapis mikurnin katupintapis jarutakur usharqan. Tsay wätam chunka waqrayuq karqan.#Apoc. 12.3; 13.1.

8<<Tsay waqrankunata rikaraykaptïmi juk taksha waqra jeqamurqan. Tsay waqra wiñaptinmi kimsa kaq waqrankuna kiptukaskiyarqan. Tsay waqra karqan runapa ñawinnö ñawiyuq y shimin kamakanqantam pitapis ashaq.

Juzgananpaq trönuman Dios Yaya jamanqan

9<<Tsaychö rikaraykaptïmi trönukunata alistayarqan.

Tsay trönumanmi imaypis kawaq Awkin jamaykurqan.

Llatapanpis imayka jankanöraqmi yuraq karqan.#Apoc. 1.14.

Aqtsanpis imayka yuraq millwanömi karqan.#Apoc. 20.4.

Jamakunan trönun y trönunpa ruëdanpis lunyaykaq ninanömi karqan.

10Paypa puntanpitam lunyaypa lunyarraq nina yarqurqan.

Waranqa waranqapam serviyarqan.

Yupayta mana puëdiypaqmi puntanchö kayarqan.#Apoc. 5.11.

Juzgar qallananpaqmi librukunata kicharqan.#Apoc. 20.12.

11<<Tsay taksha waqra pitapis mantsakaypaq qayapanqanta wiyaykurmi mantsakashqa rikararqä. Tsaynö rikaraykaptïmi waqrayuq wätata wañuskatsir pedäzu pedäzu roquskirnin rupaykaq ninaman jitaykuyarqan. 12Tsaynöllam wakin kaq wätakunapa podernintapis qechuyarqan. Peru qechurpis tiempun chämunqanyaqmi kawaykaqta dëjayarqan.

Pukutay rurinchö shamuq runa poderösu tikranqan

13<<Tsay paqasmi revelacionchö rikarqä ciëlupita pukutay jananchö runapa tsurinnö shamuykaqta. Paytam imaypis kawaq Awkinpa puntanman pushayarqan.#Mat. 24.30; 26.64; Mar. 13.26; 14.62; Luc. 21.27; Apoc. 1.7, 13; 14.14. 14Tsay Awkinmi payta churarqan llapanta mandananpaq, poderyuq kananpaq y llapanpita respitashqa kananpaq. Tsaymi may markapita, maytsay nacionpita karpis y ima idiömata parlaq karpis payta serviyarqan. Paypa mandakuyninqa imayyaqpis mana ushakaqmi kanqa. Poderösu kanqantaqa manam ni pipis qechunqatsu ni pipis ushakätsinqatsu.#Apoc. 11.15.

15<<Noqa Danielmi tsaykunata rikar alläpa mantsakarqä. Rikanqäta yarpachakurmi llakikurqä. 16Tsaymi tsay ichiraykaqkunapa puntanman witiykur jukninta mañakurqä tsaykunapita tantiyatsimänanpaq. Tsaymi tantiyatsimar nimarqan: 17<Tsay chuskun jatusaq wätakunam chusku nacionkuna kayan. Tsay nacionkunam poderyuq tikrar wakin nacionkunata poderninchö katsiyanqa. 18Tsaypitanam poderösu Dios Yayaman creyikuqkuna mandakuyninta chaskiyanqa. Tsay mandakuyninchömi imayyaqpis mana ushakaypa paykuna kayanqa>.#Apoc. 22.5.

19<<Tsaypitanam chusku kaq wäta imapaq kanqanta musyayta munarqä. Tsay wätam imaykatapis achkunqan kaqta rachikachar mikurnin katupintapis jarutakurqan. Curmïllunpis fiërrupita y shillunkunapis broncipitam karqan. Wakin kaq wätakunapita mas jukläya karmi alläpa mantsaypaq karqan.

20<<Tsaynöllam musyayta munarqä tsay wätapa chunka waqrankuna imapaq kanqanta y taksha waqran imapaq wiñamunqantapis. Tsay taksha waqra wiñaptinmi kimsa kaq waqrankuna kiptukaskiyarqan. Tsay waqraqa ñawiyuq y shimiyuq karmi imatapis shimin tarinqanta parlaq. Tsaymi tsay waqra wakin kaq waqranpitapis mas mantsakaypaq karqan. 21Rikaraykaptïmi tsay waqra Dios Yayaman confiakuqkunata atacar vencirqan.#Apoc. 13.7. 22Tsaynömi vencirqan imaypis kawaq Awkin shamur kuyanqan runakunapa favornin shärinqanyaq.#Apoc. 20.4. Favornin shäriptinmi mandakuyninta chaskiyarqan.

23<<Tsaykunapaq musyayta munaptïmi tsaychö ichiraykaq nimarqan: <Tsay chusku kaq wätam juk nación. Tsay nacionmi kay patsachö wakin nacionkunatapis poderninchö katsinqa. Wakin nacionkunapita mas jukläya karmi jarutakur kay patsachö kaqkunata ushakätsinqa.

24<< <Tsay chunka waqrankunam tsay nacionpa chunka mandaqnin reykuna kayan.#Apoc. 17.12. Paykuna wañuskiyaptinmi mas juk runa rey kananpaq yaykunqa. Paymi wakin reykunapitapis mas mana alli kar kimsa reykunata vencinqa. 25Tsaynöllam poderösu Dios Yayapa contran parlar Dios Yayaman creyikuqkunatapis alläpa ñakatsinqa. Dios Yayapaq rurayanqan fiestakunata y mandamientunkunatapis cambiaytam munanqa. Dios Yayaman creyikuqkunatam kimsa wata soqta killa poderninchö katsinqa.#Apoc. 12.14; 13.5-6.

26<< <Peru tsaynö kaykaptinmi Dios Yaya juzgaptin tsay reypa poderninta qechur jankat ushakätsiyanqa. 27Tsaymi poderösu Dios Yayaman confiakuqkuna kay patsachö llapan mandaqpitapis mas mandakuq kayanqa. Tsaynöllam poderyuqkunapitapis mas poderyuq kayanqa y respitashqa runapitapis mas respitashqa kayanqa. Dios Yayapa mandakuyninqa imaypis mana ushakaq kaptinmi kay patsachö llapan nacionkuna payta serviyanqa>.

28<<Tsaykunatam sueñuynïchö rikarqä. Rikanqäkunata yarpachakurmi noqa Daniel löcuyar alläpa upilakashqa tikrarqä. Peru tsay sueñunqäta manam ni pitapis willarqätsu>>.

Currently Selected:

Daniel 7: qxn

Highlight

Copy

Compare