Daniel 12

Ultimu tiempupaq tantiyatsikuy

1<<Tsay witsaymi Israel runakunata cuidaq y angelkunapa mandakuqnin Miguel Israel runakunapa favornin shärinqa. Runakuna alläpa ñakaychö karmi llakikuyanqa. Kay patsachö nacionkuna kanqanpita manam ni imaypis alläpa ñakaykuna y llakikuykunapis kashqatsu.#Mat. 24.21; Mar. 13.19; Apoc. 12.7. Libruchö shutinkuna apuntashqa kaqkunallam Israel majikikuna salvakäyanqa.

2<<Tsaypunmi pamparäyanqanpita maytsikaq runakuna kawayämunqa. Wakinmi kawayämunqa imayyaqpis kawayänanpaq y wakinnam kawayämunqa imayyaqpis ñakayänanpaq. Ñakayänanpaq kawamuqkunam jutsa rurayanqanpita alläpa penqakuychö kayanqa.#Mat. 25.46; Juan 5.29. 3Yachayyuq runakunam imayka chipakyaq ciëlunö atsikyäyanqa. Alli kawakuyänanpaq yachatsiqkunam imayka qoyllurkunanöraq imayyaqpis chipakyäyanqa.

4<<Daniel, willanqaq tiempu chämunqanyaq ama pitapis willakunkitsu. Qellqashqa kaykaq rölluta cërawan alli seguray.#Apoc. 22.10. Runakunam maytsayman aywarnin yachakur mas yachayyuq tikrayanqa>>.

5Tsaypitanam noqa Daniel ishkaq runakuna ichiraykaqta rikarqä. Jukaq runam mayu kay tsimpanchö ichiraykarqan y jukaqnam mayu wak tsimpanchö. 6Yaku jananchö ichiraykaq lïnu llatapashqa runatam jukaq runa tapurqan: <<Mandakunqaykinö mantsakaypaq kaqkuna päsananpaq ¿ayka tiemputan faltan?>>

7Peru lïnu llatapashqa runa mayu jananchö kaykanqanpitam ishkan makinta pallarkur imayyaqpis kawaq Dios Yayapa shutinchö jurar nirqan: <<Llapan tsaykuna cumplinanpaq kimsa wata pullanmi faltan. Tsay witsaymi Dios Yayaman creyikuqkuna mana juk poderninnaq tikrayanqa>>.

8Tsaynö ninqankunata manam allipaqa tantiyarqätsu. Tsaymi tapurqä: <<Taytay, tsaypita ¿imatan mas päsanqa?>>

9Tsaynam nimarqan: <<Daniel, llapanpis tsaykuna sëllaraptinmi tiempu chämunqanyaq pipis musyanqatsu. Qamqa imaypis allillata rurar kawakuy. 10Atskaq runakunam tantiyayanqa imaykata ñakarpis Dios Yayaman confiakur jutsannaq kawakuyänanpaq. Jutsa ruraqkunaqa jina jutsata rurar kawayätsun. Paykuna mana tantiyaptinpis Dios Yaya munanqannö kawakuq runakunam sïqa tantiyayanqa.

11<<Waran waran sacrificiuta waykayänanta mana permïtinqanpita hasta Dios Yaya mana munanqan kaqta templuman churanqanyaqmi waranqa ishkay pachak isqun chunka (1,290) junaq päsanqa.#Mat. 24.15; Mar. 13.14. 12Kushishqam kawakuyanqa waranqa kimsa pachak kimsa chunka pitsqa (1,335) junaqyaq mana ajayaypa shuyaraqkuna.

13<<Qamqa wañunqaykiyaq Dios Yaya munanqannö kawakuy. Ushakanqan junaqchö kawaskamurmi herenciaykita chaskinki>>.

Currently Selected:

Daniel 12: qxn

Highlight

Copy

Compare