Daniel 11

Siria nacionpa y Egipto nacionpa reyninkuna pelyayänanpaq ninqan

1Tsaypita mastam lïnu llatapashqa runa nimarqan: <<Media nacionpita rey Darío juk watana mandakunqan witsaypis noqam ángel Miguelta yanaparnin animatsirqä.

2<<Kanan willashayki ima päsananpaq kaqkunata. Persia nacionchömi kimsa reykuna kayanqa. Paykunapa qepanmanpis mas juk reymi kanqa. Tsay reymi kimsa kaq reykunapitapis mas rïcu kanqa.#11.2 Tsay rïcu reypam shutin Jerjes karqan. Paymi wata 480 a. C.-chö atska soldädukunawan Grecia nacionta venciyta munarpis vencirqantsu. Alläpa rïcuyar mas poderyuq tikrarmi llapan mandakunqan nacionkunawan Grecia nacionpa contran shäriyanqa.

3<<Tsaypitanam mas poderyuq rey kanqa.#11.3 Tsay reyqa Grecia nacionpa mandakuqnin rey Alejandro Magnum karqan (336-323 a. C.). Paymi maytsay nacionkunata venciskir mandädunchö katsinqa. 4Tsaymi atska nacionkunata juntawanqa jukllaylla kayänanpaq. Tsaypitanam chusku nacionkunaman rakikäyanqa. Jukmi kanqa norti kaqläpa, jukmi kanqa sur kaqläpa, jukmi kanqa rupay yarqamunan kaqläpa y jukaqnam kanqa rupay jeqanan kaqläpa.

<<Tsay reypa rantin manam paypita miraqkunatsu mandakuq kayanqa, sinöqa juklä runakunam. Paykunaqa manam tsay puntata rey poderyuq kanqannönatsu kayanqa. 5Tsaynö kaykaptinpis Egipto nacionpa mandakuqnin reymi#11.5a Egipto nacionpa mandakuqninmi Tolomeo I Sóter karqan wata (323-285 a. C.). poderyuq tikranqa. Peru paypa soldädunkunapa capitanninllam mas poderyuq tikraskir#11.5b Tsay capitanqa Seleuco I Nicátor shutiyuqmi karqan. Paymi Siria nacionpa mandakuqnin rey tikrarqan. atska markakunata poderninchö katsinqa.

6<<Tsaypita watakuna päsaskiptinnam Egipto nacionpa mandakuqnin reyqa Siria nacionpa mandakuqnin reywan alli kawakuyänanpaq jipash tsurinta churanqa. Peru tsaynö churaykaptinpis tsay warmita traicionarmi wañutsinqa wawankunatawan, ollqunta y cuidaq soldädunkunatapis.#11.6 Tsay warmipam shutin Berenice karqan. Churakanqan reypa shutinmi Antíoco II Teos karqan. Bereniciwan churakänanpaqmi Antíoco II rakikarqan punta kaq warmin Laodicipita. Tsaymi punta kaq warmin Laodice alläpa rabyarnin paykunata wañuskatsirqan. 7Tsaynö wañuskatsiptinmi tsay wañuq warmipa turin soldädunkunawan aywanqa Siria nacionpa mandakuqnin reywan guërrata rurayänanpaq. Alli murallashqa markaman yaykuskirmi venciskir poderninchö katsinqa. 8Tsaypita Egiptuman kutikurmi ïdulukunata y yuraq qellaypita y qoripita rurashqa alhäjakunata apakunqa. Tsaypitam Siria nacionpa mandakuqnin reywan atska wata wajupänakuyanqatsu.

9<<Tsaypitanam Siria nacionpa mandakuqnin rey aywar Egipto nacionpa mandakuqnin reyta soldädunkunawan atacayanqa. Tsaynö atacarpis venciyta mana puëdirmi markankunapa kutikuyanqa.

10<<Peru Egiptuman kutiykur yapay atacayänanpaqmi tsurinkuna alistakuyanqa. Maytsikaq soldädukunata qoriskirmi cörrilla aywayanqa mayu jeqar imaykatapis apaqnö. Tsaynö aywarmi reypa murallashqa markanman chaykur atacayanqa. 11Tsaynam alläpa rabyarnin Egipto nacionpa mandakuqnin rey guërrata rurananpaq soldädunkunawan yarqamunqa. Maytsika soldäduyuq kaykaptinpis llapantam vencinqa. 12Llapanta venciskirmi tsay reyqa alläpa allish chölu tukur contrankunata waranqa waranqa wañutsinqa. Peru tsaynö kaykarpis tsay reyqa pöcu tiempullam poderyuq kanqa.

13<<Watakuna päsaskiptinnam Siria nacionpa mandakuqnin reyqa atska soldädukunata yapay qorinqa. Tsay soldädukunam kayanqa mas atskaq y mas alli alistakushqa. Tsaynö maytsikaq soldädukunawanmi Egipto nacionpa mandakuqnin reyta atacaq kutinqa.

14<<Tsay witsaymi Egipto nacionpa mandakuqnin reypa contran atskaq shäriyanqa. Tsaynöllam achäquita ashiq Israel majikikunapis paypa contran shäriyanqa. Peru tsaynö contran shärirpis mana venciyaptinmi revelacionchö Dios Yaya tantiyatsinqan cumplinqa.

15<<Siria nacionpa mandakuqnin reymi soldädunkunawan aywar murallashqa marka waqtanman allpata montunaykur atacayänanpaq yaykuyanqa. Tsaynö atacayaptinmi Egipto nacionpa soldädunkuna mayjina valienti karpis pärapuyta puëdiyanqatsu. 16Tsaynöpam atacaq aywaq soldädukuna tsay markata chipyat ushakätsiyanqa. Tsaypitanam kuyakuypaq Israel naciontapis poderninkunachö katsiyanqa.

17<<Tsaynöllam Siria nacionpa mandakuqnin reyqa Egipto nacionta imaykanöpis venciyta munar tsay nacionpa mandakuqnin reywan warmi tsurinta churanqa. Tsaynö churanqa warmi tsurin rikapakuskirnin willaptin atacayta yarparmi. Peru tsaynö churaptinpis manam yarpanqannötsu kanqa.

18<<Tsaymi Siria nacionpa mandakuqnin rey jukläpa aywar#11.18a Tsay reymi Asia provincia lädupa aywarqan. lamar kuchunchö kaykaq atska markakunata vencinqa. Tsaytanam juk nacionpita shamuq capitán#11.18b Tsay capitanmi Romapita karqan. vencinqa. Reyqa alläpa penqakurmi 19murallashqa markanman kutinqa. Tsaychömi desgracia päsaptin wañunqa.

20<<Tsay reypa rantinnam juk rey yaykunqa. Paymi mandakunqan nación mas poderyuq kananta munar y impuestuta cobramunanpaq runata mandanqa. Peru tsay reypis guërrachö mana kaykarmi manaraq unayta wañunqa.

Siria nacionchö mana alli runa rey kanqan

21<<Tsay reypa rantinnam mana alli runa llullakur rey kananpaq yaykunqa.#11.21 Tsay runaqa Antíoco IV Epífanes shutiyuq reymi karqan. Tsaynö yaykunqa rey juk yaykunan kaykaptinmi. 22Tsaypitam mayu jeqar imaykatapis apaqnö contran shäriq runakunata jankat wañutsinqa. Tsaynöllam Dios Yayata servirnin mandakuq sacerdötitapis wañutsinqa.#11.22 Tsay runaqa Onias III mandakuq sacerdötim karqan. Wata 171 a. C.-chömi payta wañutsiyänanpaq Antíoco IV mandarqan. 23Tsay reyqa imaykata prometirmi engañakurnin poderyuq tikranqa. Tsaynöllam wallkaq runakunalla favornin kaykaptin rey yaykunqa.

24<<Tsay runam rïcu runakuna täkuyanqan markakunaman soldädunkunawan illaqpita yaykuyanqa imaykankunatapis apayänanpaq. Manam tsay nacionchö mayqan reykunapis paynö rurayta puëdiyashqatsu. Guërrachö venciskir apanqantam llapan yanapaqninkunata aypunqa. Murallashqa markakunata imaykanöpapis atacananpaqmi alläpa yarpachakunqa. Peru juk tiempullam tsaynö kanqa.

25<<Tsay reyqa kallpanman confiakurmi Egipto nacionpa mandakuqnin reyta atska soldädunkunawan atacanqa. Tsaymi Egipto nacionpa mandakuqnin reyqa atska soldädukunata qoriykur pärapunqa. Tsaynö pärapurpis confiakunqan runakuna traicionayaptinmi venciyta puëdiyanqatsu. 26Mikur upyar qorikäyanqan amïgunkunapis ushakänantam munayanqa. Tsay guërrachömi maytsikaq soldädunkuna wañuyanqa.

27<<Tsaypitanam tsay ishkan reykuna jamaykur willanakurpis shonqunkunachöqa mana allita yarpäyanqa. Peru tsaynö kaptinpis ushakäyänanta Dios Yaya manaraq munaptinmi tsay reykuna munayanqannöqa kanqatsu.

28<<Siria nacionpa mandakuqnin reynam guërrachö qorinqan riquëzakunata aparkur markanpa kutinqa. Markanman kutinqanchömi Dios Yayata adoraqkunata atacanqa. Tsaynö yarpanqankunata ruraskirmi markanman chanqa.

29<<Desgracia päsananpaq höra chämuptinmi tsay reyqa Egipto nacionta yapay atacanqa. Puntata vencishqa karpis manam yapayqa vencinqanatsu. 30Tsaynö vencinqatsu Quitimpita#11.30 Kay textuchö Quitimpaq parlarqa Roma nacionpaqmi parlarqan. soldädukuna büquinkunawan shamur pärapuyaptinmi.

<<Tsaymi ni imanayta mana puëdir alläpa rabyarnin markanpa kutir Diosta adoraqkunata yapay atacanqa. Peru Dios Yayata mana adoraqkunawanmi sïqa kuyanakuyanqa. 31Soldädunkunam Jerusalén templuman yaykuskir impüruyätsiyanqa.#11.31 Templuta impüruyätsin Dios Yaya prohibinqanta tsaychö rurarmi. Tsaypaq masta musyanaykipaq liyinki Lev. 20.3; 21.12; Núm. 19.13, 20. Dios Yayapaq sacrificiuta sacerdötikuna waran waran waykayänantapis manam munanqatsu. Tsaypa rantinmi Dios Yaya mana munanqan kaqkunata templuman churanqa.#Mat. 24.15; Mar. 13.14.

32<<Yanapayänanta munarmi tsay reyqa Dios Yayata manana cäsuqkunata imaykata prometirnin tukuynöpa engañanqa. Peru Dios Yayaman confiakuqkunam sïqa mana mantsakur payta pärapuyanqa. 33Tsaymi tantiyakuq runakuna Dios Yayata imaypis serviyänanpaq atskaq runakunata yätsiyanqa. Peru tsaynö kaykaptinpis wakintam espädawan wañutsiyanqa, wakintam waykayanqa, wakintam prësu apayanqa y wakinpatanam imaykankunatapis qechuyanqa. 34Tsaynö ñakatsiyaptinmi wakin kaq runakunaqa tsay tantiyaq runakunata yanapayanqa. Peru wakin kaqmi sïqa janan shonqulla paykunawan qorikäyanqa.

35<<Wakin kaq yachayyuq runakunata ñakatsiyaptinmi tantiyayanqa imaykata ñakarpis Dios Yayaman confiakur jutsannaq kawakuyänanpaq. Tsay tantiyakuqkunam mas pruëbaman churashqa kayanqa hasta tiempu cumplinqanyaq.

36<<Tsay reymi munanqanta ruranqa. Tsaymi allish tukur llapan dioskunapita mas poderyuq kanqanta yarpar#2Tes. 2.3-4. poderösu Dios Yayapa contran mantsakaypaq kaqkunata parlanqa.#Apoc. 13.5-6. Peru tsaynö karpis Dios Yaya castiganan hörayaqllam poderyuq kanqa. Tsaymi llapan päsananpaq kaqkunaqa päsanqa.

37<<Tsay reyqa ima diostapis mana respitarmi cäsunqatsu unay castankuna adorayanqan dioskunata ni warmikuna adorayanqan dioskunatapis. Tsaypa rantinmi llapan dioskunapitapis mas poderyuq kanqanta yarpanqa. 38Peru unay castankuna mana adorayanqan diostam sïqa adoranqa. Tsay diosqa murallashqa markakunata cuidaq diosmi. Payta adorananpaqmi aparqan qorita, yuraq qellayta, kuyakuypaq rumikunata y kuyakuypaq adornukunata.

39<<Unay castankuna mana adorayanqan diosman creyikurmi alli murallashqa poderyuq markata atacanqa. Venciskirmi favornin shäriq runakunata atska markakunachö gobernador kayänanpaq churanqa. Tsaynöllam yanapayanqanpita kushikur chakrakunatapis posesionninkuna kananpaq aypunqa.

40<<Höra chämuptinnam tsay reyta Egipto nacionpa mandakuqnin rey atacanqa. Tsaynö atacaptinmi mayu jeqar imaykatapis apaqnö carrëtankunawan bestian montashqa soldädunkunawan y atska büquinkunawan atacar entëru nacionta vencinqa.

41<<Tsaynöllam Israel nacionman yaykur maytsikaq runakunata wañutsinqa. Peru Edomchö y Moabchö täkuq runakunam sïqa Amónchö täkuq maytsikaq runakunawan paqta makinpitana qeshpiyanqa.

42<<Tsaynömi tsay reyqa atska nacionkunata mandädunchö katsinqa. Egipto nacionpis manam qeshpinqatsu. 43Tsaypitanam Egiptupita qorita, yuraq qellayta y llapan riquëzankunatapis apanqa. Poderninchömi katsinqa Libia nacionta y Etiopía naciontapis.

44<<Tsaypitanam rupay yarqamunan kaqlächö y norti kaqlächö contran shäriyanqanta willayanqa. Tsaymi alläpa rabyarnin contran shäriqkunata pïmaytapis wañutsiyta munar soldädunkunawan aywanqa. 45Lamarpita kuyakuypaq sagrädu lömaman aywaq nänichömi campamentunkuna shäritsinqa. Tsaychö kaykaptinmi pipis mana yanapaptin kikintapis wañutsiyanqa>>.

Currently Selected:

Daniel 11: qxn

Highlight

Copy

Compare