Daniel 10

Chipakyaq runata revelacionchö Daniel rikanqan

1Kimsa watana Persia nacionpa mandakuqnin rey Ciro kaykaptinmi Beltsasar shutiyuq Danielta Dios Yaya revelarqan. Tsay revelacionchö willanqankuna rasunpa päsananpaqmi kaykan. Peru aja tantiyay kaptinpis imapaq kanqantam Daniel tantiyarqan.

2Tsay witsaymi noqa Daniel yarpachakur kimsa semäna alläpa llakikurnin kaykarqä. 3Tsaynö llakikurmi alli mikuykunata ni aytsatapis mikurqätsu. Tsaynöllam vïnuta upyarqätsu ni perfümitapis wiñakurqätsu.

4Punta kaq killachö#10.4 Punta kaq killapa shutinmi Nisán karqan. Nisán killaqa abësis qallan marzu ushanan junaqkunachö y abësis qallan abril qallanan junaqkunachö. Tsay killachömi Israel runakuna Pascua fiestata y Levadürannaq Tantata Mikuna fiestata rurayarqan. Tsay fiestakunapaq masta musyanaykipaq liyinki Éxo. 12.1-20. ishkay chunka chusku (24) kaq junaqchömi Tigris mayu kuchunchö kaykarqä. 5Tsaychömi lïnu fïnu llatapashqa runa ichiraykaqta rikaykurqä. Paypa wachukunmi fïnu qoripita rurashqa karqan. 6Cuerpunpis imayka berilo ruminöraqmi chipakyarqan. Qaqllanpis imayka illaqunöraqmi chipakyarqan. Ñawinkunapis imayka aktsinöraqmi atsikyarqan. Rikrankuna y chankankunapis imayka chipakyaq broncinöraqmi karqan. Parlamunqanpis imayka atskaq runakuna parlaqnöraqmi wiyakarqan.#Apoc. 1.13-15; 19.12.

7Noqa Danielllam tsay revelacionta rikarqä. Paqtä kaykaq runakunaqa manam ni imatapis rikäyarqantsu. Peru mana rikaykarpis alläpa mantsakarmi tsinkakuq qeshpiyarqan. 8Tsay revelacionta rikanqä höra manam ni pipis compañamaqnï karqantsu. Tsaymi alläpa mantsakarnin upilakaskiptï kallpäpis ushakaskirqan. 9Parlaqta wiyarmi desmayar patsaman kupsakaypa shikwaskirqä.

10Tsay höra sutarkamaptinmi qonqurpakuypa tsuktsukyaykar maki paltalläwan tsarikurkurqä. 11Tsaymi nimarqan: <<Daniel, sharkuy. Dios Yaya kuyashurnikim qamwan parlanapaq kachamashqa. Kanan ninqaqta shumaq wiyamay>>.

Tsaynö nimaptinmi tsuktsukyaykar ichirkurqä. 12Tsaymi nimarqan: <<Daniel, ama mantsakaytsu. Revelación rikanqaykita tantiyanaykipaq mañakuyta y ayunayta qallanqayki junaqpitam Dios Yaya wiyashushkanki. Tsaymi tantiyatsinaqpaq shamushkä.

13<<Ishkay chunka juk (21) junaqmi Persia nacionpa mandakuqnin ángel tsaparämashqa. Peru angelkunapa mandakuqnin Miguel yanapamänanpaq shamuptinmi#Apoc. 12.7. Persia nacionpa mandakuqnin angelwan pelyananpaq tsaychö dëjashkä. 14Revelacionchö rikanqaykim Israel runakunata ultimu tiempuchö ima päsananpaq kanqan. Tsayta tantiyatsinaqpaqmi shamushkä>>.

15Tsaynö parlapämaptinmi upällalla umpuräkurqä. 16Tsaynö kaykaptïmi imayka runa rikuqlla illaqpita yuriskamur shimïta yataykamurqan. Tsaymi parlar qallaykur nirqä: <<Taytay, revelacionta rikanqäpitam alläpa llakikuptï kallpäpis kannatsu. 17Qamwan parlanäpaq manam valornïpis kantsu. Imayka wañunaykaqnömi shütaytapis puëdïnatsu>>.

18Tsaymi tsay runa rikuq yapay yataykamar animatsimaptin valorakurqä. 19Tsaypitam nimarqan: <<Dios Yaya kuyaykäshuptikiqa ama mantsakaytsu. ¡Valorakuy!>>

Tsaynö parlapaykämaptinmi kallpä yurirkurqan. Tsaymi nirqä: <<Taytay, kananqa valornï kannam parlapämanqaykita wiyanäpaq>>.

20Tsaymi nimarqan: <<Imapaq shamunqäta ¿musyankiku? Kananqa Persia nacionpa mandakuqnin angelwan pelyaq kutishaq. Tsaypitanam Grecia nacionpa mandakuqnin ángel shamunqa. 21Tsay mandakuq angelkunawan pelyaptïmi qamkunata cuidayäshuqniki ángel Miguel yanapamaq shamunqa. Yanapamänanpaq manam masqa ni pipis kantsu. Pelyaq manaraq aywarmi Libru de la Verdadchö imata qellqashqa kanqantapis tantiyatsishayki>>.

Currently Selected:

Daniel 10: qxn

Highlight

Copy

Compare