Daniel 9
9
Jerusalénpaq Dios Yayata Daniel mañakunqan
1Media nacionpita Asuerupa tsurin Darío Babilonia#9.1 Hebreo idiömachömi Caldea nin. Caldeaqa Babiloniapa jukaq shutinmi. nacionpa mandakuqnin rey juk watana kaykaptinmi 2noqa Daniel estudiaykarqä Dios Yayapa willakuyninta profëta Jeremías qellqanqanta.#Jer. 25.11; 29.10. Tsayta liyirmi tantiyashkä qanchis chunka (70) watayaq Jerusalén marka raqälla kananpaq kanqanta. 3Tsaymi lütu llatapata shukukurkur y uchpaman jamaykur ayunarnin Dios Yayata mañakurqä. 4Mañakurmi nirqä:
<<Dios Yaya, alläpa poderösu y mantsakaypaqmi kanki. Kuyayäshurniki mandamientuykikunata cumpliyaptinqa pactu ruranqaykitam imaypis cumplinki. 5Jutsata rurarmi mana allikunata rurayashkä. Mana cäsukuqmi kayashkä. Mandamientuykikunata y leynikikunata manam cäsuyashkätsu. 6Reykunata, autoridäkunata, unay castäkunata y llapan runakunata servishuqniki profëtakuna qampa shutikichö willakuynikita yachatsiyaptinpis manam cäsuyashkätsu.
7<<Dios Yaya, imaypis allillatam ruranki. Peru noqakunam sïqa mana allikunata rurar alläpa penqakuypaq kaykäyä. Llapämi Israel runakuna tsaynö kayä Jerusalénchö, Judá partichö, Israel nacionpa cercanchö o karu nacionchö täkurpis. Qam mandakunqaykita mana cäsuyanqäpitam maytsay nacionkunaman qarqayämashkanki. 8Dios Yaya, mandayämaqnï reykuna, autoridänïkuna, unay castäkuna y kikïkunapis qamta mana cäsurnikim jutsata rurayashkä. Tsaymi alläpa penqakuypaq kaykäyä. 9Peru mana cäsukuq kayaptïpis qammi llakipäkuq y perdonakuq Diosnï kanki.
10<<Dios Yayallä, servishuqniki profëtakuna yachatsiyämanqan leynikikunatapis manam cäsuyashkätsu. 11Leynikikunata mana cäsurmi llapäpis mana allikunata rurayashkä. Tsaymi servishuqniki Moisés qellqanqan leykunachö ninqannö noqakunaman maldición chämushqa. 12Castigayämänaykipaq ninqaykinömi noqakunatawan autoridänïkunata mantsakaypaq castïguwan ushakätsiyämashkanki. Jerusalénta castiganqaykinöqa manam ni imaypis kay patsachö may markatapis castigashkankitsu.
13<<Dios Yayallä, kay ñakaykunam Moisés qellqanqan leykunachö ninqannö noqakunaman chämushqa. Tsaynö ñakaykarpis manam perdonayämänaykipaq rugakayämushkaqtsu. Jutsa ruraytapis manam dëjayashkätsu. Ni leynikikunatapis cäsuyashkätsu. 14Tsaymi alli ruraq kaynikiwan mantsakaypaq castïguta noqakunaman kachamushkanki. Tsaynö castigaykäyämaptikipis manam cäsukuyashkätsu.
15<<Dios Yayallä, poderösu kaynikiwanmi kuyanqayki Israel runakunata Egiptupita jipimurqayki. Tsaynöpam kananyaqpis maytsaychö musyakaykan poderösu kanqayki. Peru tsayta musyaykarmi jutsata rurayashkä.
16<<Taytay, llakipäkuq kaykarqa sagrädu lömaykichö kaykaq Jerusalénta ama alläpa castigaykullaynatsu. Unay castäkunapis y kikïkunapis jutsata rurayanqäpitam Jerusalén markata y kuyanqayki runakunata llapan nacionkunachö täkuq runakuna manakaqman churayäman.
17<<Dios Yayallä, kanan mañakamur rugakamunqaqta wiyaykallämay. Shutiki raykullapis juchushqa kaykaq templuykita llakipaykullay. 18Dios Yaya, mañakamunqäta wiyaykallämay. Ushakashqa kaykaq Jerusalén markaykita llakipaykullay. Tsaynö mañakamü manam jutsannaq kartsu, sinöqa llakipäkuq kanqaykita musyarmi.
19<<Dios Yaya, ¡mañakamunqäta wiyaykallämay! ¡Jutsa rurayanqäpita perdonaykayällämay! ¡Taytay, yanapaykayällämay! ¡Shutiki rayku y akranqayki marka rayku saslla salvaykayällämay!>>
Qanchis chunka semänapaq tantiyatsinqan
20Tsaynö nirmi jutsäpita y Israel majïkunapa jutsankunapita Dios Yayata rugakur perdonta mañakurqä. Tsaynöllam akranqan sagrädu lömapaq mañakurqä. 21Tsaynö mañakuykaptïmi sacrificiuta templuchö tardipa rupatsiyänan höra ángel Gabriel päriypa puntäman chämurqan. Paytam punta kaq revelacionchö rikarqä.
22Paymi tantiyatsimar nimarqan: <<Daniel, llapan rikanqaykita shumaq tantiyatsinaqpaqmi shamushkä. 23Mañakur qallaykuptikillanam rugakunqaykita Dios Yaya änishqa. Dios Yaya alläpa kuyashurnikim willanaqpaq kachamashqa. Dios Yayapa willakuyninta tantiyatsiptiq shumaq wiyamay.
24<<Qanchis chunka (70) semänam#9.24a Kay versïculukunachö semänapaq parlarqa manam qanchis junaqpaqtsu parlaykan, sinöqa qanchis watakunapaqmi. Tsaymi qanchis chunka semänapaq parlar chusku pachak isqun chunka (490) watakunapaq parlaykan. destinashqa kaykan Israel majikikuna y Dios Yaya akranqan sagrädu markachö täkuqkuna mana cäsukuq kayta, jutsa rurayta y llutan rurayta dëjayänanpaq. Tsay tiempum kaykan Dios Yaya munanqannö runa majinwan alli kawakuyänanpaq, profëtakuna willakuyanqannö cumpliyänanpaq y mas sagrädu kaqta#9.24b Mas sagrädu kaq ninqanpaqmi wakin yarpäyan Lugar Santïsimu kanqanta, wakinna yarpäyan templu o templuchö kaykaq altar kanqanta, wakin yarpäyan mas mandakuq sacerdöti kanqanta y wakinna yarpäyan kikin Jesucristo kanqanta. consagrayänanpaq.
25<<Kay ninqaqta shumaq tantiyay. Jerusalén markata yapay shäritsiyänanpaq ninqan junaqpita Dios Yaya akranqan mandakuq shamunqanyaqmi qanchis semäna päsanqa y tsaypa jananmannam soqta chunka ishkay (62) semäna päsanqa.#9.25 Cada semäna qanchis wata kaptinmi qanchis semäna chusku isqun (49) wata kanqa y soqta chunka ishkay (62) semäna chusku pachak kimsa chunka chusku (434) wata kanqa. Alläpa ñakaykuna kaptinpis Jerusalén markapa cällinkunata y murällankunatam allitsayanqa.
26<<Soqta chunka ishkay semänakuna päsaskiptinmi Dios akranqan runata ushakätsiyanqa. Juk mandakuq runa soldädunkunawan shamurnam Jerusalén markata y santu templuta chipyat juchutsir ushakätsinqa. Apäkuy tamya illaqpita shamur imaykatapis ushanqannömi illaqpita kikinpis ushakanqa. Tsay tiempu ushakanqanyaqmi Dios Yaya destinanqannö guërrawan wañutsinakuypis kanqa.
27<<Juk semäna masmi tsay mandakuq runa atskaq runakunawan pactuta ruranqa. Tsaypitanam pullan semänachöna#9.27 Cada semäna qanchis wata kaptinmi pullan semäna kanqa kimsa wata pullan. permïtinqatsu sacrificiukunata y tsaki mikuy ofrendakunata altarchö waykayänanta. Tsaypitanam altarpa lädunman Dios Yaya mana munanqan kaqta churanqa.#Mat. 24.15; Mar. 13.14. Tsaychömi kanqa Dios Yaya destinanqan tiempu cumplinqanyaq>>.
Currently Selected:
Daniel 9: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
