Hechos 28

Malta islachö Pablo kanqan

1Lamarpita llapä yarquskirmi Malta islachö kaykäyanqäta musyayarqä. 2Tsaychö täkuq runakuna allim chaskiyämarqan. Tsaymi tamyar alalaptin ninata tsarirkatsir mashakuyänäpaq qayayämarqan. 3Pablupis tsaki rämakunata qoriskir ninaman jitaykaptinmi ninapita culebra qeshpir makinta amukurkurqan. 4Pablupa makinchö warkaraykaqta rikaykurmi tsaychö täkuq runakuna niyarqan: <<¡Kay runaqa wañutsikuqmi kanqa! Tsaymi lamarpita kawaykar yarqaskamuptinpis adoranqantsik diösa#28.4 Griëguchöqa Dique nikanmi. Diquiqa karqan griego runakuna adorayanqan juk diösam. kawananta munantsu>>.

5Makinpita ninaman culebrata Pablo tapsiskiptin kaninqan manam imanarqantsu. 6Culebra kaninqanwan saksänanpaq kanqanta o wañunanpaq kanqanta shuyaräyaptinpis manam ni ima päsarqantsu. Tsaymi niyarqan: <<¡Kay runaqa juk dios imach!>>

7Tsay mashakuykäyanqä cercanchömi Publio shutiyuq runapa chakrankuna karqan. Publiuqa tsay islachö mas mandakuq autoridämi karqan. Paymi kimsa junaq patsatsiyämar alli rikäyämarqan. 8Tsaychömi Publiupa taytan yawarta ishpar fiebriwan cämachö antsa ujuraykarqan. Tsayman Pablo yaykuskir Dios Yayata mañakur yataykuptinmi kutikaskirqan. 9Tsay runa kutikanqanta musyaskirmi wakin qeshyaykaqkunapis Pabluman shayämuptin llapanta kutikätsirqan. 10Tsaynö kutikätsinqanpita pächi nikurmi alli rikäyämarqan. Aywakuyaptïnam llapan wanayanqäkunatapis alistapäyämarqan.

Romaman Pablo chanqan

11Tamya killakuna päsanqanyaqmi Alejandríapita shamuq büqui tsay islachö ichirarqan. Tsaymi kimsa killa tsay islachö quëdaykur aywakuyänäpaq tsay büquiman lätayarqä. Tsay büquipa frentinchömi Cástor y Pólux niyanqan diosninkuna llaqllaypa dibujashqa karqan. 12Tsaypita Siracusa markaman chaykurmi kimsa junaq tsaychö quëdayarqä. 13Siracusapitanam lamar kuchullanpa Regio markayaq aywayarqä. Sur kaqläpita wayrämuptinmi Regiupita ishkay junaqllatana Puteoli markaman chäyarqä. 14Tsaychönam büquipita yarquskir wawqikunawan tinkuyarqä. Paykuna rugayämaptinmi juk semäna paykunawan quëdayarqä. Tsaypitanam chakillapana Romaman aywayarqä. 15Aywaykäyanqäta musyaskirmi Romachö wakin wawqikuna Foro de Apio markaman tinkuyämarqan. Wakinnam Tres Tabernas markachö shuyaräyämarqan.#28.15 Foro de Apio markaqa Romapita chunka chusku lëwam karqan. Kimsa Tabernas markanam Romapita chunka lëwa pullan karqan. Paykunata rikaskirmi Dios Yayata Pablo kushishqa agradëcikurqan. 16Romaman chaykuyaptïmi [capitanqa prësukunata comandantiman entregarqan]. Peru Pablutam sïqa juk wajichö qaykuränanpaq aparqan. Tsaychömi juk soldädu cuidarqan.

Israel runakunata Romachö Pablo willakunqan

17Chäyanqäpita kimsa junaqtanam Israel mayor runakunata Pablo qayatsirqan. Qorikaskiyaptinmi nirqan: <<Taytakuna, manam Israel majintsikkunatapis ni costumbrintsikkunatapis manakaqman churashkätsu. Imatapis mana allita mana ruraykaptïmi Jerusalénchö prësu achkuskayämar Roma autoridäkunaman apayämashqa. 18Tsay autoridäkuna juzgayämarmi wañutsiyämänanpaqnö ima jutsätapis mana tarir dëjayämayta munayarqan. 19Peru Israel autoridäkunam sïqa wañutsiyämayta munayarqan. Tsaymi mandakuq César justiciata ruramänanpaq mañakurqä.#Hech. 25.11. Imanö kaptinpis Israel majintsikkunata manam demandätsu. 20Llapan Israel runakunanöllam noqapis creyï Dios Yaya prometimanqantsikkunata cumplinanpaq kanqanta. Tsaynö creyinqalläpitam cadenawan wataraykä. Tsayta musyatsiyänaqpaqmi qamkunata qayatsiyämushkaq>>.

21Tsaynö niptinmi Israel mayor runakuna niyarqan: <<Imanö kanqaykita musyayänäpaq Judea provinciapita manam ni ima cartatapis chaskiyashkätsu. Israel majintsikkunapis kayman chämur qampaq manam ni imatapis parlakuyashqatsu. 22Peru maytsaychömi mana allikunata yachatsikunqaykikunata parlayan. Tsaymi imata yachatsikunqaykitapis kikïkuna wiyayta munayä>>.

23Tsaynö niyaptinmi juk junaq yapay qorikäyänanpaq willanakuyarqan. Willanakuyanqan junaq chämuptinnam Pablo patsakunqan wajiman atskaq qorikäyarqan. Tsaymi alliqpita tardiyaq Dios Yayapa mandakuyninpaq Pablo yachatsikurqan. Tsaynöllam Moisés qellqanqan leykunata y profëtakuna qellqayanqankunata tantiyatsir Jesucristo salvamaqnintsik kanqanta yachatsikurqan. 24Tsaynö yachatsikuptinmi wakin runakuna creyikuyarqan y wakinna creyiyarqantsu. 25Mana tantiyanakur aywakuyänanpaqna kaykäyaptinmi Pablo nirqan: <<Rasun kaqtam unay castantsikkunata willananpaq Espíritu Santu profëta Isaíasta tantiyatsir nirqan:

26<< <Aywar tsay runakunata niy:

<<Mayjina wiyarpis manam tantiyayankitsu.

Mayjina rikarpis manam cuentata qokuyankitsu>>.

27Tsay runakunapa shonqunkunam chukruyashqa.

Rinrinkunam upayashqa.

Ñawinkunam qaprayashqa.

Tsaymi rikäyantsu, wiyayantsu, tantiyayantsu ni arrepentikuyantsu.

Tsaynö kayaptinmi noqapis kutikätsishaqtsu#28.27 Manam qeshyayllapita kutikätsinanpaqtsu nin, sinöqa ñakaykunapita, llakikuykunapita y jutsa ruraykunapita salvananpaqmi nin.> >>.#Isa. 6.9-10.

28<<Isaías ninqannölla qamkunapis kayaptikim mana Israel runakunatana salvakuyänanpaq willashaq. Peru paykunam sïqa tantiyakuyanqa>>.

29[Pablo tsaynö niptinmi Israel runakuna kikinpura piñanakur aywakuyarqan.]

30Ishkay watam alquilanqan wajichö Pablo täkurqan. Tsaymanmi pïmaypis watukaqnin aywayaq. 31Tsaynöllam Dios Yayapa mandakuyninpaq y Señor Jesucristupaq mana mantsakur yachatsikuq. Yachatsikuptin manam ni pï amatsarqantsu.

Currently Selected:

Hechos 28: qxn

Highlight

Compare

Copy