Hechos 27

Pabluta Romaman prësu apatsinqan

1Pabluta Italiaman#27.1 Italia nacionchömi Roma kaykan. Tsaychömi mandakuq César täkurqan. apatsiyänanpaq autoridäkuna willanakuskirmi wakin prësukunatawan capitán Juliuta entregayarqan. Juliuqa Augusto niyanqan tröpapa capitanninmi karqan. 2Tsaymi Adramitiupita shamuq büquiman lätayarqä.#27.2 Kay libruta qellqaq Lucaspis Pabluwanmi Romaman aywarqan. Tsay büquiqa Asia provinciachö puertukunaman aywananpaqmi kaykarqan. Pabluta compañayänäpaqmi Aristarcuwan aywayarqä. Aristarcuqa Macedonia provinciachö Tesalónica markapitam karqan. 3Waränin junaq Sidónman chaykurmi capitán Juliuqa Pabluta llakipar nirqan: <<Imallawanpis yanapayäshunaykipaq reqinakunqaykikunaman ayway>>.

4Sidónpita yarquyaptï alläpa wayrämuptinmi Chipre isla kuchullanpa aywayarqä. 5Tsaypitam Cilicia y Panfilia tsimpanpa päsar Liciachö Mira markaman chäyarqä.

6Tsaychömi capitán Julio tarirqan Alejandríapita Italiaman aywaykaq büquita. Tsaymi tsay büquimanna lätayänäpaq niyämarqan. 7Tsaypita yarquskir atska junaqtaraqmi ñakar Gnido markapa frentinpa päsayarqä. Tsaypita aywaykäyanqä kaqmanpa alläpa wayrämuptinmi Creta islapa tumar Salmón niyanqan lädunpa päsayarqä. 8Creta isla kuchunpa aywayta alläpa ñakarmi Buenos Puertos markaman ajataraq chäyarqä. Tsay markaqa Lasea markapa amänunllachömi kaykan. 9Atska junaqna päsashqa kaptinmi tamya witsay qallaykunanpaqna karqan. Tsaymi päsayänäpaq mana alli kaptin büquichö aruq runakunata Pablo nirqan: 10<<Taytakuna, amaraq aywashuntsu. Jinachö aywashqaqa büquim cargantin ushakanqa. Talvezqa noqantsikpis wañushun>>.

11Peru tsaynö Pablo nikaptinpis capitanqa manam cäsurqantsu, sinöqa büquiyuqta y büqui manijaqtam cäsurqan. 12Tamya witsay Buenos Puertuschö quëdayänäpaq mana alli kaptinmi llapäkunapis yarpäyarqä Cretachö Fenice markaman aywayta. Fenicichömi sïqa tamya witsaypis büqui ichïnanpaq alli karqan.

Wayrantin alläpa tamya kanqan

13Aywayänäpaq wayra alli kaptinnam büquichö aruqkuna yarpäyarqan Feniciman chäyänäpaqna kanqanta. Tsaymi büquipa anclankunata#27.13 Anclaqa jatusaq ganchuyuq fiërrukunam. qoriskir Creta isla kuchullanpa aywayarqä. 14Yarquyanqäpita pöcu tiempullatanam Euroclidón niyanqan shukukuy wayra Cretapita alläpa wayrämurqan. 15Tsaymi wayra shamunqanpa aywayta mana puëdir büqui manijaqkuna dëjaskiyarqan wayra apanqallanpana büqui aywakunanpaq. 16Tsaypita Clauda niyanqan taksha islapa aywarmi qarachaypa apanqan taksha büquita alläpa ñakar büqui jananman lätaskatsir watäyarqä.

17Tsaypitanam mana llaktikänanpaq aywayanqä jatun büquitapis waskakunawan watäyarqan. Tsaypitam lamar rurinchö Sirte niyanqan arenïllaman chänanta mantsakur allipita aywayänäpaq büquipa juk anclanta kacharpuyarqan. Tsaymi wayra apanqallanpa aywayarqä. 18Tsaypita waränin junaqpis tsaynölla alläpa wayrämuptinmi büquipita cargankunata lamarman jitariyarqan. 19Büquipa anclanta kacharpuyanqanpita kimsa junaqtanam büquichö alläpa mana wanakaqkunata jitariyarqan. 20Pukutay tsaparaptinmi rupaypis ni qoyllurpis atska junaq rikakarqantsu. Alläpa wayrämuptinmi ushakäyänäpaq kaqta yarpäyarqä.

21Atska junaq mallaqlla kayaptïmi chawpïkunaman ichiykur Pablo niyämarqan: <<Taytakuna, Creta islapita ama yarqushuntsu niyanqaqta cäsuyämaptikiqa manam kayläya ñakashwantsu karqan ni imaykakunatapis lamarman jitarishwantsu karqan. 22Peru tsaynö kaptinpis ama llakikuyaytsu. Manam ni mayqantsikpis wañushuntsu. Büquim sïqa ushakanqa. 23Qanyan paqasmi servinqä Dios Yaya kachamunqan ángel yuripaskamar 24nimashqa: <Pablo, ama mantsakaytsu. Romachö mandakuq César juzgashunaykipaq chankim. Büquichö kaykaq runakunatapis qam raykum Dios Yaya salvanqa>. 25Taytakuna, ángel tsaynö nikämaptinqa ama mantsakäshuntsu. Dios Yayamanmi confiakü. Tsaymi ángel nimanqannölla kanqa. 26Büqui ushakaptinpis isla kuchunmanmi lamar jitarimäshun>>.

27Adriático niyanqan lamarchö ishkay semänana wayra puriykätsiyämaptinmi büqui manijaqkuna pullan paqasnö tantiyaskiyarqan tsaki patsaman chaykäyanqäta. 28Yakupa jundunta mïdiyaptinmi kimsa chunka soqta (36) metru karqan. Yapay mïdiyaptinmi ishkay chunka qanchis (27) metrullana karqan. 29Tsaymi rumikunachö büqui takakänanta mantsakur büqui pärananpaq chusku anclankunata watarkur büquipa qepanpa jitarpuyarqan. Tsaypitam patsa waranqanyaq tsaychö shuyaräyarqä. 30Büqui manijaqkuna qeshpiyta munarmi büqui puntanpa anclata bäjatsiq tumpalla taksha büquita bäjatsiyarqan. 31Peru qeshpiyta munayanqanta tantiyaskirmi capitanta y soldädukunata Pablo willar nirqan: <<Büqui manijaqkuna aywakuskiyaptinqa manam salvakäyankitsu>>.

32Tsaynö niptinmi taksha büqui wataraq waskakunata soldädukuna roquskiyaptin lamarman shikwaskirqan.

33Patsa waraskiptinnam runakunata Pablo nirqan: <<Taytakuna, mikushunraq. <Imaraq päsamäshun> nir yarpachakurmi ishkay semänana mikushkantsiktsu. 34Kananqa kawanallapaqpis mikushunraq. Manam ni mayqantsikpis wañushuntsu>>.

35Tsaynö niskirmi tantata aptarkur llapanpa puntanchö Dios Yayata agradëcikurqan. Tsaypitam tantata pakin pakin mikur qallaykurqan. 36Pablo mikuqta rikarmi llapanpis mikuyarqan. 37Büquichö aywaqkunam ishkay pachak qanchis chunka soqta (276) runakuna kayarqä. 38Pacha junta mikuskirnam büqui ankashyänanpaq apayanqan trïguta lamarman jitariyarqan.

Büqui takakar ushakanqan

39Patsa waraskiptinnam chaykäyanqä tsaki patsata rikarpis büqui manijaqkuna reqiyarqantsu maychö kaykäyanqanta. Pläyata rikaykurmi büquita tsayman chätsiyta munayarqan. 40Tsaymi wataraq waskakunata roquskiyaptin anclakuna lamarchö quëdaskiyarqan. Tsaypitam timonnin wataraqta paskaskir büquita wayra apananpaq jatun rakta tëlata witsätsiyarqan. Tsaymi lamar kuchunman büqui aywar qallaykurqan. 41Aywaykanqanchömi büquipa puntan arenïllaman jatikaskirqan. Tsaymi yaku jaytar büquipa qepanta pakiskirqan.

42Tsaymi prësukuna mana qeshpiyänanpaq soldädukuna wañutsiyta munayarqan. 43Tsaynö yarpäyaptinmi Pabluta salvayta munar capitán nirqan: <<Ama pitapis wañutsiyaytsu. Nädayta yachaq kaqkunaqa yaku kuchunman yarquyätsun. 44Wakin kaqna tablakunata o büqui pakishqakunata achkukurkur yaku kuchunman imaykanöpis yarquyätsun>>.

Tsaynöpam llapäkuna yakupita yarquyarqä.

Currently Selected:

Hechos 27: qxn

Highlight

Compare

Copy