Romanos 1

Apóstol Pablo saludakunqan

1Noqa Pablum Jesucristupa serviqnin kä. Apostolnin kanäpaq Dios Yaya churamashqa kaptinmi paypa alli willakuyninta willakur puriykä.

2Dios Yaya prometinqan alli willakuy willakushqa kananpaqmi unay profëtakuna qellqayarqan. Tsay qellqayanqanmi Dios Yayapa sagrädu palabran. 3Tsay alli willakuyqa Dios Yayapa Tsurin [Señornintsik Jesucristupam]. Paymi rey Davidpa ayllunpita yurirqan.#Mat. 1.1; 12.23. 4Wañuskatsiyaptinmi Espíritu Santu poderösu kayninwan kawatsimushqa. Tsaynöpam Señornintsik Jesucristo Dios Yayapa Tsurin kanqanta musyantsik.

5Jesucristo noqantsik rayku wañushqa kaptinmi Dios Yaya llakipämar apostolnin kanäpaq churamashqa. Tsaymi maytsay nacionkunachö pïmayta willakü Jesucristuman creyikur y Dios Yaya munanqannö kawar payta alabayänanpaq. 6Qamkunatapis Dios Yayam akrayäshushkanki Jesucristupa poderninchö kawayänaykipaq.

7Romachö creyikuq majïkuna, Dios Yaya kuyayäshurnikim wamrankuna kayänaykipaq qayayäshushkanki. Taytantsik Dios Yaya y Señor Jesucristo llakipäyäshurniki alli päsakuychö kawakuyänaykipaq yanapaykuyälläshuy.

Romaman Pablo aywayta munanqan

8Wawqikuna y panikuna, Jesucristuman creyikuyanqaykita maytsaychöpis parlayaptinmi Jesucristupa shutinchö Dios Yayata qamkunapaq agradëcikü. 9Waran waran qamkunapaq mañakunqätam Dios Yaya musyan. Paytam servï Tsurin Jesucristupa alli willakuyninta llapan shonqüwan willakur.

10Tsaymi mañakü Dios Yaya permïtiptinqa imanöpapis qamkuna kaqpa watukaqnikikuna shamunäpaq. 11Qamkunawan paqta kanapaqmi shamuyta munaykä. Espíritu Santu tantiyatsimanqannömi Jesucristuman firmi creyikuyänaykipaq tantiyatsiyäshayki. 12Llapantsik juknin jukninwan animatsinakushun Jesucristuman firmi creyikunapaq.

13Wawqikuna y panikuna, atska kutim qamkuna kaqpa shamuyta munashkä.#Hech. 19.21. Peru kananyaqmi imayka atäjukunawan shamuyta puëdimushkätsu. Juk markakunachö willakuptï mana Israel runakuna Jesucristuman creyikuyanqannö qamkuna kaqchöpis Jesucristuman creyikuyänanpaqmi willakuyta munä. 14Griego o mana griego kayaptinpis, yachayyuq o mana yachayyuq kayaptinpis llapantam Jesucristupa willakuyninta willakunä. 15Tsaymi Jesucristupa alli willakuyninta qamkunatapis willayänaqpaq imaykanöpa Romaman shamuyta munä.

16Noqa manam penqakütsu Dios Yayapa alli willakuyninta willakur. Tsay willakuyqa Dios Yayapa poderninmi llapan creyikuqkunata salvananpaq.#Mar. 8.38; 1Cor. 1.18. Puntataqa Israel runakunatam musyatsirqan y tsaypitanam mana Israel runakunatapis. 17Alli willakuyninchömi Dios Yaya tantiyatsimantsik jutsantsikpita perdonamanqantsikta. Tsaynö perdonamantsik payman creyikushqam. Palabranmi nin: <<Munanqänö kawaq runaqa noqaman confiakamurmi kawanqa>>.#Hab. 2.4.

Runakuna jutsasapa kayanqan

18Ciëlupitam Dios Yaya rabyarnin pïmay jutsa ruraqkunatapis castiganqa. Tsay runakuna jutsata rurarmi tsapata churayan wakin runakunapis Dios Yayapa willakuyninman mana creyikuyänanpaq. 19Peru jutsata rurarpis runakunam musyayan Dios Yaya kanqanta. Pay kanqantaqa kikin Dios Yayam musyatsin. 20Llapan imayka kamanqankunata rikarmi unaypitana musyayan Dios Yaya kanqanta y poderösu kanqanta.#Hech. 17.24-25. Tsaymi Dios Yayapa puntanchö pipis tsapakur ninqatsu: <<Dios Yaya kanqanta manam musyallashkätsu>>.

21Dios Yaya kanqanta musyaykarpis runakuna manam payta cäsuyantsu ni agradëcikuyantsu. Tsaypa rantinmi manakaqkunaman umankuna churashqa kar yarpayninkunapis jankat ushakashqa.#Efe. 4.17-18. 22Alläpa yachayyuq kayanqanta yarparpis manam imatapis musyayantsu. 23Tsaymi imayyaqpis kawaq Dios Yayata adorayanqanpa rantin ïdulukunata adorayan. Tsay ïdulukunatam rurayan runatanö, päriqkunatanö, wätakunatanö y patsapa lätaypa puriqkunatanö.

24Ïdulukunata adorayaptinmi Dios Yaya rabyarnin paykunata dëjashqa shonqunkuna munanqannö melanaypaq kaqkunata rurayänanpaq y juknin jukninwan penqakuypaq mana allikunata rurayänanpaq. 25Tsay runakunam kamamaqnintsik Dios Yayallata adoranapaq kanqanta musyaykar pay kamanqankunata adorayan. Tsaymi rasun kaqman creyiyanqanpa rantin manakaqkunaman creyiyan. Dios Yaya imayyaqpis adorashqa kaykullätsun. Amén.

26Tsaymi Dios Yaya dëjashqa umankuna achachaptin penqakuypaq mana allikunata rurakäyänanpaq. Dëjaskiptinmi warmikunapis ollquwan kayanqanpa rantin warmipuralla kakuyan. 27Tsaynöllam ollqukunapis warmiwan kayanqanpa rantin ollqupuralla penqakuypaq kakuyan. Tsaymi jutsata rurayanqanman Dios Yaya castigaykan.

28Dios Yaya munanqannö kawayta mana munayaptinmi mana penqakuypa jutsata rurar kawayänanpaq Dios Yaya dëjashqa. 29Tsaynö kawarmi imayka jutsata rurar [fornicación jutsata rurayan,] mana alli kayan, kikillankunapaq imaykatapis munayan, chikinakuyan, envidiösu kayan, runa majinta wañutsiyan, achäquita ashiyan, engañanakuyan, mana allikunata rurayan y washarima kayan. 30Tsaynöllam pïmaytapis musyapäyan, [runa majinta tumpayan,] Dios Yayapa contran kayan, pïmaywanpis piñanakuyan, väliq tukuyan, aläbakuyan, llutan ruraykunapaq yarpachakuyan, mamanta y taytantapis cäsukuyantsu. 31Imata yätsiyaptinpis chaskikuyantsu, prometiyanqantapis cumpliyantsu, llakipäkuyantsu y perdonakuytapis yachayantsu. 32Paykunam musyayan tsaynö kawaqkuna wañutsishqa kayänanpaq Dios Yaya ninqanta. Tsayta musyaykarmi mana mantsakur jutsata rurayan. Tsaynöllam wakin kaqkuna mana allita rurayaptinpis kushikuyan.

Currently Selected:

Romanos 1: qxn

Highlight

Compare

Copy