2 Corintios 6
6
1Willakuqnin karmi llakipäkuq Dios Yayata mana yupaytupäyänaykipaq rugayaq. 2Palabranchömi nin:
<<Llakipanqä höram mañakamanqaykita wiyashkä.
Salvanaqpaq kaq junaqmi yanapashkaq>>.#Isa. 49.8.
Dios Yaya llakipäyäshunayki höraqa kanan höram. Dios Yaya salvayäshunayki junaqqa kanan junaqmi.
Imaykata sufrirpis Pablo willakunqan
3Willakuyanqäta pipis manakaqman mana churayänanpaqmi imatapis llutanta rurayätsu. 4Tsaypa rantinmi Dios Yayata serviq kayanqäta tantiyayänanpaq pay munanqannölla kawakuyä imaykata sufrirpis, ima faltäyämaptinpis, alläpa yarpachakurpis, 5astayämaptinpis, carcelman qaykatsiyämaptinpis, maqayämaptinpis, pishipashqa willakurpis y puñuyta mikuyta mana tarirpis. 6Tsaynöllam Dios Yayata serviq kayanqäta tantiyayänanpaq jutsata mana rurar kawakuyä, willakuyninta shumaq tantiyakuyä, chikiyämaqnïkunata perdonayä, pïmaytapis llakipäyä, Espíritu Santupa poderninchö kawakuyä, pïmaytapis kuyayä, 7Diospa willakuyninta willakuyä y pay yanapayämaptin imatapis allita rurayä. Conträ kayaptinpis pay munanqannöllam allillata rurayä.
8Wakin runakunam alli rikäyäman y wakinnam mana alli rikäyäman. Tsaynöllam wakinqa favornïkuna parlayan y wakinnam conträkuna parlayan. Rasun kaqllata parlayaptïpis llullakuyanqätam yarpäyan. 9Wakinqa reqiykäyämarpis manam reqiq tukayämantsu. Ushakäyanqäta yarpäyaptinpis kawaykäyäraqmi. Chikiyämar ñakatsiyämarpis manam wañutsiyämashqatsu. 10Llakishqa karpis kushishqallam kawakuyä. Waktsa karpis atskaqta rïcuyätsiqnömi kayä.#6.10 Atskaqta rïcuyätsiqnömi kayä ninqanqa atskaqtam willakuyä Jesucristupa alli willakuyninta imayka riquëzatanö chaskiyänanpaq ninanmi. Imäkuna mana kaptinpis noqakunapam llapanpis kaykan.
11Corinto wawqikuna y panikuna, llapan shonqükunawan kuyayarnikim imatapis mana pakaypa llapan yarpäyanqäta willayashkaq. 12Qamkunata kuyayarniki yarparaykäyaptiqqa ¿imanirtan qonqayämashkanki? 13Tsaymi wamräkunatanö niyaq: Noqakuna kuyayanqaqnö qamkunapis kuyayämar yarpaykayällämay.
Dios Yayapa templun kanqantsik
14Wawqikuna y panikuna, musyayanqaykinömi pipis törutawan ashnuta yuntantsu. Tsaynöllam qamkunapis Jesucristuman mana creyikuqkunawan yuntashqanö kayankimantsu. Alli ruraypis mana alli ruraywan manam iwalantsu. Aktsi kanqanchöpis tutapay manam kantsu. 15Jesucristupis Belialwan#6.15 Belialqa Satanásmi. manam tantiyanakuyantsu. Tsaynöllam Jesucristuman creyikuqkunawan mana creyikuqkunapis tantiyanakuyantsu. 16Tsaynöllam Dios Yayapa templunman ïdulukunata churayanqan allitsu. Noqantsikqa imayyaqpis kawaq Dios Yayapa templunmi kantsik.#1Cor. 3.16; 6.19. Palabranchömi Dios Yaya nin:
<<Paykunawanmi täkushaq.
Paykunawanmi purishaq.
Paykunapa Diosninmi kashaq.
Paykunam kuyanqä runakuna kayanqa>>.#Lev. 26.12; Eze. 37.27.
17Mastam palabranchö nin:
<<Jutsa ruraq runakunapita witikuyay.
Paykunapita yarqukuyay.
Imatapis impüruyätsikuqkunata ama yatayaytsu.
Tsaynö kawayaptikim chaskiyäshayki.#Isa. 52.11.
18Qamkunapa taytaykikunam kashaq.
Qamkunam wamräkuna kayanki.
Llapanpaq poderyuq Dios Yaya karmi tsaynö nï>>.#2Sam. 7.14; 1Crón. 17.13; Jer. 31.9.
Currently Selected:
2 Corintios 6: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
