2 Corintios 7

1Kuyashqa wawqikuna y panikuna, Dios Yaya tsaynö nikämashqaqa llapan jutsantsikkunata dëjashun. Jutsata rurarmi cuerpuntsikta espïrituntsiktapis qanratantsik. Tsaynö kaykaptinqa Dios Yayapita mantsakur pay munanqannö imaypis kawakushun.

Pablo yätsinqanta cäsukuyanqan

2Wawqikuna y panikuna, yarpaykayällämay. Qamkunata manam ni mayqaykitapis mana allita rurayashkaqtsu ni llullatsiyashkaqtsu ni engañayashkaqtsu. 3Tsaynö niyaq manam manakaqman churayarnikitsu, sinöqa ñawpata niyanqaqnöllam qamkunata kuyayaq. Tsaymi imaypis mana qonqar yarpäyäshayki. 4Niyanqaqkunata chaskiyänaykipaq kaqta musyarmi qamkunaman confiakü. Tsaymi ima päsamaptinpis llakikunqäpa rantin alläpa kushikü.

5Macedonia provinciaman chäyanqäpita manam jamaytapis tariyashkätsu. Tsaypa rantinmi runakuna conträ shäriyaptin y qamkunapaq y Titupaq yarpachakur alläpa llakikuyashkä. 6Peru tsaynö kaykäyaptïmi Tito chämuptin llakishqa kaykaqkunata animatsiq Dios Yaya animatsiyämashqa. 7Manam Tito chämunqanllapitatsu kushikuyashkä, sinöqa qamkuna kaqpita Tito kushishqa kutimunqanpitapis kushikuyashkämi. Paymi willayämashqa qamkunata watukaq shamunäta munaykäyanqaykita, jaqayätsinakunqantsikpita llakikuyanqaykita y noqapaq yarpachakuykäyanqaykitapis. Tsaynö willayämaptinmi masraq kushikuyashkä.

8Apatsimunqä cartata liyiskir llakikuyanqaykita musyarpis manam llakikütsu. Peru qellqamunqä höram sïqa alläpa llakikurqä cartachö niyanqaqta liyir llakikuyänaykipaq kanqanta musyar. 9Kananqa alläpam kushikü. Manam qamkunata llakikatsiyanqaqpitatsu kushikü, sinöqa tantiyakur Dios Yayata cäsuyanqaykipitam. Cartata apatsiyämunqä manam manakaqllapaqtsu kashqa, sinöqa Dios Yaya munanqannö llakikuyänaykipaqmi.

10Dios Yaya munanqannö llakikurqa jutsa ruraytam dëjantsik. Jutsa ruraykunata dëjaqkunatam Dios Yaya perdonan. Tsaynö perdonta tarirqa manam llakikuntsiknatsu, sinöqa kushikuntsikmi. Peru mana creyiqkunam sïqa llakikurpis jutsa rurayta mana dëjar wañushqanö kaykäyan.

11Dios Yaya llakikuyman churayäshunqaykim allipaq kashqa. Tsaymi kananqa perdonta mañakayämashkanki, conträ shäriq runapaq rabyayashkanki, Dios Yayata cäsuykäyanki, noqawan tinkuytana munaykäyanki, noqapaq yarpachakuykäyanki y jutsayuq runata corrigiyashkanki. Tsaynö kayaptikim musyayä llapanta sitiunman churayanqaykita.

12Tsay apatsimunqä carta manam conträ shäriq runata corrigiyänaykillapaqtsu ni noqa kushikunällapaqtsu kashqa, sinöqa tantiyatsiyanqaqta chaskikur rasunpa kuyayämanqaykita [y noqapis kuyayanqaqta] Dios Yayapa puntanchö tantiyayänaykipaqmi. 13Kuyayämanqaykita musyarmi alläpa kushikuyashkä. Peru masraqmi kushikuyashkä Tituta alli chaskiyanqaykipita y animatsiyanqaykita kikin willayämaptin.

14Manaraq qamkuna kaqman Tito shamuptinmi payta animatsir nirqä: <<Paykunaqa allim chaskiyäshunki>>. Tsay ninqänöllam llapan kashqa. Tsaymi qamkunata imaypis rasun kaqta ninqänö qamkunapaq payta ninqäkunapis rasun kaqlla kashqa. 15Kananqa cäsukuyanqaykipita y payta alli chaskiyanqaykipitam Titupis qamkunapaq yarparan. 16Tsaynöllam confiakuypaq kayanqaykipita noqapis kushikü.

Currently Selected:

2 Corintios 7: qxn

Highlight

Copy

Compare