2 Corintios 5

Mushuq cuerputa chaskinapaq ninqan

1Musyantsikmi kay cuerpuntsik ushakaptinpis mana ushakaq mushuq cuerputa Dios Yaya qaramänapaq kanqanta. Kay patsachö cuerpuntsikmi ushakaq tsukllanölla. Peru gloriachömi sïqa mushuq cuerpuntsik Dios Yaya ruranqan alli wajinöna kanqa. 2Kay patsachö kawanqantsikyaqmi mushuq cuerputa sas chaskiyta munar yarpachakur llakikuntsik. 3Mushuq cuerputa chaskirqa manam qarashtunötsu kashun, sinöqa alli llatapashqanömi kashun.

4Kay patsachö cuerpuntsik ushakaqlla kaptin llakikurpis manam wañuytaqa munantsiktsu, sinöqa cuerpuntsik mana ushakaq cuerpuman sas tikranantam munantsik. 5Mana ushakaq cuerpuyuq kanapaqmi Dios Yaya kamamashkantsik. Mushuq cuerputa chaskinapaq kanqanta musyanapaqmi Espíritu Santuta qaramashkantsik.

6Tsaymi Dios Yayaman imaypis confiakuntsik. Musyantsikmi kay patsachö kawanqantsikyaqqa Dios Yayata manaraq rikanqantsikta. 7Payta manaraq rikarpis paymanmi confiakuntsik. 8Payman confiakurmi cuerpuntsikta dëjaskir puntanman sas chayta munantsik. 9Tsaymi kawarpis o wañurpis Dios Yaya munanqannö kawanapaq imaypis yarpachakuntsik.

10Jesucristupa puntanman chaykushqam llapantsikta juzgamäshun.#Rom. 14.10. Kay patsachö kawar allita o mana allita ruranqantsikpitam premiuta o castïgutapis chaskishun.

Dios Yayawan runakuna amistayänanpaq willakuyanqan

11Señor Jesucristo juzgamänapaq kanqanta musyarmi paypita mantsakur willakuyninta imaykanöpapis willakuyä. Rasunpa serviyanqätam Dios Yaya musyan. Tsaytaqa qamkunapis tantiyayankimanmi. 12Tsaynö nï manam yachayyuq kayanqäta aläbakurtsu, sinöqa Dios Yayapa willakuqnin kayanqäta tantiyar kushikuyänaykipaq y pipis conträ parlaptin favornï shäriyänaykipaqmi.

Tsay conträkunaqa yachaq tukurpis janan shonqullam Dios Yayata serviyan. 13<<Löcum kayan>> niyämaptinpis Dios Yayata serviyänä raykum löcupis kayä. <<Alli yarpayyuqmi kayan>> niyämaptinpis qamkunata yanapayänaq raykum alli yarpayyuq kayä. 14Imanö niyämaptinpis noqakunaqa Jesucristo kuyamanqantsikta tantiyarmi wañur kawarpis payta serviyä. Jesucristo llapantsik rayku wañunqanta musyarmi tsaynö serviyä. Noqantsik rayku wañuptinmi llapantsikpis jutsa ruraypaq wañushqanöna kantsik. 15Manam kikintsik munanqallantsikta rurar kawakunapaqtsu Jesucristo wañushqa, sinöqa pay munanqannöna kawanapaqmi. Payqa wañurpis noqantsik raykum kawamushqa.

16Tsaynö kaptinmi Diosman mana creyikuq runakunanöqa pipaqpis llutanta yarpäyätsu. Mas unaynam noqakunapis mana creyikuq runakunanölla Jesucristupaq llutanta yarpäyarqä. Peru kananqa manam tsaynönatsu yarpäyä. 17Pipis Jesucristuchö karqa mushuq kamanqan runam kaykan.#Gál. 6.15; Efe. 4.24; Tito 3.5; 1Ped. 1.3, 23. Unay kawayqa päsashqanam. Kananqa llapanpis mushuqnam kaykan.

18Tsaynö kanapaq kikin Dios Yayam permïtishqa. Paymi Jesucristo noqantsik rayku wañunqanpita perdonamashkantsik. Tsaynöllam runakuna paywan amistayänanpaq willakuyninta willakuyänäpaq churayämashqa. 19Tsay willakuymi nin: Jesucristuchömi Dios Yaya karqan runakunata jutsankunapita perdonar kikinwan amistananpaq. Tsay willakuyta willakuyänäpaqmi churayämashqa.

20Tsaymi noqakunaqa Jesucristupa willakuqninkuna kayä. Willakuqnin karmi Dios Yaya rugakuqnö Jesucristupa shutinchö pïmaytapis rugayä: ¡Dios Yayawan amistayay! 21Jutsannaq karpis llapan jutsantsiktam Jesucristuman Dios Yaya churashqa. Tsaymi jutsayuq runanö noqantsik rayku wañuptin paychö kashqa Dios Yaya jutsannaqtanö chaskimantsik.

Currently Selected:

2 Corintios 5: qxn

Highlight

Copy

Compare