1 Pedro 1
1
Apóstol Pedro saludakunqan
1Ponto, Galacia, Capadocia, Asia y Bitinia provinciakunachö kaykaq creyikuqkuna:
Noqa Pedrum, Jesucristupa apostolnin kar, kay patsachö juklä runanö kayaptiki qamkunaman cartakamü. 2Dios Yaya unaypitana reqiyäshurnikim Espíritu Santuwan akrayäshushkanki Jesucristuta cäsuyänaykipaq y yawarninta jichanqanpita perdonashqa kayänaykipaq. Dios Yaya llakipäyäshurniki alli päsakuychö kawakuyänaykipaq yanapaykuyälläshuy.
Dios Yayaman creyikur kushishqa kawanapaq ninqan
3¡Señornintsik Jesucristupa Taytan Dios Yaya alabashqa kaykullätsun! Llakipäkuq kayninwanmi yapay yurishqanö kanapaq mushuq kawayta qaramashkantsik.#Juan 3.3-7; 1Ped. 1.23. Jesucristo wañuskir kawamunqanpitam musyantsik noqantsikpis kawaskamur gloriaman chänapaq kanqanta. 4Gloriaman chaykurmi Dios Yaya shuyätsimanqantsik herenciata chaskishun. Tsay herenciaqa manam imaypis qarwatanqatsu, ismunqatsu ni illakanqatsu. 5Dios Yayaman confiakuyaptikim poderninwan tsapäyäshunki Jesucristo kutimuptin alistanqan salvacionta chaskiyänaykipaq.
6Tsayta musyarmi kay patsachö kawayanqaykiyaq imaykata ñakarpis kushishqa kawaykäyanki. 7Qorita tsullutsirraq püru kanqanta musyanqantsiknömi qamkunapis pruëbakunawanraq musyayanki Dios Yayaman rasunpa confiakuyanqaykita. Creyikuynikikunaqa qoripitapis masmi välin. Tsaymi alläpa sufrirpis Dios Yayaman confiakuyaptikiqa Jesucristo kay patsaman kutimur aläbayäshunki, alli rikäyäshunki y alliman churayäshunki.
8Jesucristuta mana rikashqa kaykarpis paytam kuyayanki.#Juan 20.29. Tsaymi payman creyikur kushishqa kawakuykäyanki. Tsaynö kushishqa kayanqaykitaqa manam ni imanöpa tantiyatsiytapis puëdiyankitsu. 9Tsaynö kushishqa kawaykäyanki Jesucristuman creyikur salvacionta tariyanqaykipitam.
10Dios Yaya kuyakuq kayninwan salvamänapaq kanqantaqa profëtakunam alli tapupakuskir willakuyarqan. 11Tsaynö willakuyänanpaqmi Jesucristupa Espïritun paykunata tantiyatsirqan Cristo ñakarnin wañunanpaq kanqanta y kawaskamur alläpa poderyuq kananpaq kanqanta. Tsaynöpam profëtakuna musyayta munayarqan Cristo pï kanqanta y imay shamunanpaq kanqanta. 12Tsay profëtakunatam Espíritu Santu tantiyatsirqan paykuna kawayanqan witsay shamunqanpa rantin shamuq watakunachöraq shamunanpaq kanqanta.
Jesucristo shamushqana kaptinmi kananqa ciëlupita kachamunqan Espíritu Santupa poderninwan Jesucristupa alli willakuyninta willakuykäyan. Jesucristo noqantsik rayku wañur salvamanqantsiktam angelkunapis imaykanöpa tantiyayta munayan.
Jutsannaq kawakunapaq ninqan
13Tsaynö kaykaptinqa shumaq tantiyakur Dios Yaya munanqannö kawakuyay. Jesucristo kutimur Dios Yayapa puntanman qorimänapaq kanqanta ama qonqayaytsu.
14Dios Yayapa wamranna kaykarqa payta cäsur munanqannö kawakuyay. Jesucristuta manaraq chaskir kawayanqaykinöqa ama kawayaytsu. 15Tsaypa rantinqa akramaqnintsik Dios Yaya santu kanqannölla qamkunapis santu kayay. 16Dios Yayapa palabranmi nin: <<Noqaqa santum kä. Qamkunapis santu kayay>>.#Lev. 11.44-45; 19.2.
17Pitapis mana jananpar juzgaq Dios Yayata <<Taytallä>> nikarqa kay patsachö juklä runanö kawayanqaykiyaq paypita mantsakur kawakuyay. 18Unay castaykikuna kawayanqannömi qamkunapis jutsata rurar kawayarqayki. Tsaynö kaykäyaptiki manam qellaywantsu ni qoriwantsu Dios Yaya rantiyäshushkanki, 19sinöqa Jesucristupa alläpa chaniyuq yawarninwanmi. Sänu cordëruta sacrificiupaq pishtayaptin yawarnin jichanqannömi Jesucristupis noqantsik rayku yawarninta jichashqa.
20Kay patsatapis manaraq kamar Dios Yaya destinashqa kaptinmi noqantsik kawanqantsik witsayraq Jesucristo kuyamarnintsik shamushqa. 21Pay raykum Dios Yayaman confiakuykäyanki. Wañunqanpita kawaskatsimurmi gloriachö alläpa poderyuq kananpaq Dios Yaya apakushqa.
22Willakuyninta#1.22 Wakin qepa kaq griego copiakunaqa Espïritupa yanapayninwan nirmi yapayan. cäsukuyaptikim kuyanakur kawakuyänaykipaq Dios Yaya purificäyäshushkanki. Tsaynö kaykaptinqa llapan shonquykikunawan juknin jukninwanpis kuyanakur kawakuyay. 23Tsaynö kawayänaykipaqmi imayka yapay yurishqanö kayanki.#Juan 3.3-7; 1Ped. 1.3. Manam mamaykikunapitatsu ni taytaykikunapitatsu tsay kawayta chaskiyashkanki, sinöqa Diospa palabranta chaskiyanqaykipitam. Paypa palabranqa kawaq karmi ni imaypis ushakanqatsu.
24<<Llapan runakunapis qewanö ushakaqllam.
Poderyuq kayninpis waytanö shushuqllam.
Qewapis tsakinmi y waytapis shushunmi.
25Peru Dios Yayapa palabranmi sïqa imayyaqpis kaykanqa>>.#Isa. 40.6-8.
Tsay palabratam Jesucristupa willakuqninkuna willayäshushkanki.
Currently Selected:
1 Pedro 1: qxn
Highlight
Copy
Compare
Share
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
